Youq henz roen aen mbanj dogfwz ndeu, miz aen cinjsoj gaebgeb gaeuqgat ndeu, gwnz dou venj dwk gaiq baiz “XX Cinjsoj”. Aenvih cihsaw “十” hoengzgywg, cij hawj aen ranz deng laeuz sang seiqhenz homhhumx neix gig yienhda. Baihnaj cinjsoj dingz miz danci、dendungceh、mohdozceh, mizseiz lij miz ciiq, vanzlij gak cungj cidaehhuq, neix cungj dwg gij vunz daeuj yawj bingh haenx cuengq youq. Ndaw cinjsoj mboujseiz miz vunz haeujok, boux- laux、bouxcoz、lwgnyez hawj bohmeh daiq daeuj. Ndaw cinjsoj, boux canghyw laux ndeu, 70 lai bi, byoem hausak, saeknaj hoengzmaeq, cing- saenz gvaekgvaek, yawj hwnjdaeuj gig unqswnh. De daj haet daengz haemh naengh youq henz daiz, cam bouxbingh binghcingz、dawz dingh- cinjgi dingq duenq、gaemmeg、faensik binghyiengh. Mbouj miz vunz seiz de couh yawjyawj bauqceij roxnaeuz densi. De ngoenz dem ngoenz yienghneix hawj vunz yawj bingh, guh gij hong neix gaenq ndaej 50 lai bi lo. De couhdwg daxgoeng gou, boux canghyw lajmbanj ndeu.

Daxgoeng okseng youq 20 sigij 40 nienzdaih. De dawz gouqmingh ywsieng dangbaenz gij hong ciuhvunz de. De cib lai bi couh riengz goenggeq gip ywdoj caeuq yawj bingh. Youq aen seizdaih haenx, yw noix, yihyoz doeklaeng, daxgoeng ndaejhoengq couh hwnj gwnz bya bae gip ywdoj, aemq dauq ranz dak hawq le, daengz ngoenzhaw couh caeuq goenggeq dawz bae gwnz haw gai, yienghneix daeuj ra cienz ciengx ranz, soengq song daegnuengx bae doegsaw. Daxgoeng miz bonj bitgeiq ndeu, baihndaw geiq miz gak cungj bingh noix raen haenx, geiq miz cungj ywdoj lawz yw ndei gijmaz bingh, lij miz- mbangj bingh de mbouj rox baenzlawz yw. Daxgoeng gaemmeg ceiq maenh, cazbingh gig cinj, sou cienz noix, vunz ndaw mbanj miz maz bingh cungj haengj daeuj hawj de yawj.

Mboujguenj dwg rumz raq fwn hung, gyangngoenz gyanghwnz, cijaeu miz vunz daeuj yawj bingh, daxgoeng cungj sikhaek hawj vunz yw bingh. Daxgoeng ciuhvunz yw vunzbingh fouzsoq, mizmbangj vunz de gaenq lumz lo, hoeng haujlai bouxbingh cungj geiqmaenh gij aencingz de. Baez daengz ngoenzciet ndwencieng, ranz gou cungj dwg hek rim ranzding, nauhyied dangqmaz, mizmbangj dwg caencik daeuj baiqcieng, hoeng dingzlai dwg gij vunz daxgoeng gaenq bang yw ndei bingh haenx daeuj damqraen de.

Daxgoeng gou dwg boux vunz simndei ndeu. Ndaejgeiq lij iq seiz, miz ngoenz ndeu gou cuengqhag dauqma, byongh roen bungz boux vunz ndeu laemx youq ndaw mieng, maezmuenh mbouj singj, gwnz gyaeuj caeuq faj naj lwed laeyaeng’yaeng, haujlai vunz homh youq bangxhenz gangjnyibnyib. Gou raen le, sikhaek buet bae cinjsoj daxgoeng lwnh hawj de nyi. Daxgoeng dingq le mbouj ngeizvaeg saek di, cang geij bingz yw caeuq baengzmuengx roengz ndaw siengyw bae, heuh gou daiq de bae yawj. Doeklaeng, daxgoeng bang boux deng sieng najseng haenx coq yw, duk ndei baksieng, heuh vunz mbanj aeu benj ram boux dengsieng haenx bae cinjsoj, sijsaeq genjcaz yawj gwnz ndang de lij miz gizlawz deng sieng dem.

Daxgoeng gou gig haeujsim gij gyauyuz lwglan. Youq aen nienzdaih gwn mbouj imq daenj mbouj raeuj haenx, vunz mbanj cungj riuzcienz “doegsaw mbouj miz yungh”, hoeng daxgoeng cij saenq “cihsiz gaijbienq minghhoen”. De caeuq daxbuz gwn hoj ndoet haemz, mbaet gwn mbaet yungh rom cienz soengq sam daeglwg doegsaw. Song boux boh’au swnjciep gij saehnieb daxgoeng bae hag ywbingh. Seizneix, Aungeih gou youq ndaw yienh hai aen cinjsoj ndeu, de youq ndaw hagdangz hag、bizyez le hix laebdaeb gag hag caeuq gaengawq gij ginghyen daxgoeng, yw bingh gig ndei. Daxgoeng ciengz gangj, canghyw guh saeh aeu nyinhcaen、cazbingh aeu cinj、coq yw aeu siujsim. Gijneix Aungeih gou cungj guh ndaej daengz, moix ngoenz ndaw cinjsoj de cungj miz haujlai vunz caj hawj de yawj bingh.

Gyoengq doengzdoih Auiq buenqbangh dingz hag, doxiu bae Gvangjdungh dajgoeng ra cienz seiz, daxgoeng itcig gujli、 cihciz Auiq doeg daengz dayoz. Seizneix Auiq gaenq baenz boux canghyw vaigoh ndeu youq yihyen aen cwngzsi hung he. Daeggo gou ndaej daengz daxgoeng caeuq boh’au yingjyangj, daj iq couh doiq saw yihyoz mizyinx, laebceiq aeu hag ywbingh, de song bi gonq ndaej yihyoz bozsw yozvei, bienqbaenz fuengzcug boux daihseiq swnjciep gij conzdungj hag ywbingh. Daeggo gou ciengzseiz caeuq daxgoeng yaenglwnh yihyoz cihsiz, lwnh daxgoeng gij yihyoz gisuz moq guek raeuz. Daxgoeng ciengz doiq dou gangj:“Dou bouxlaux mbouj muengh sou bonjsaeh miz geijlai hung, cijaeu sou roxsoq, guh boux vunz mizyungh ndeu couh baenz lo.” Bi- gvaq, daegnuengx caeuq dahnuengx doengzseiz gauj ndaej yihgoh dayoz, daxgoeng yawj gij dunghcihsuh haeujhag gyoengqde, riunyumnyum naeuz: “Baenz lo, baenz lo.”

Daxgoeng coengzlaiz mbouj vih swhgeij yw bingh ak roxnyinh daekeiq, hawj de roxnyinh miznaj dwg, gyoengq lwglan de yunghsim bae son’gyauq haenx cungj mbouj hawj de saet- muengh, seizneix gyoengqde gaenq baenzcaiz lo.