“Yawj, cej eu fwen gyauhgingj dadui youh hwnjdaiz eu fwen lo”, gyoengqvunz cauzhuhu yaepyep caem roengzdaeuj, caezgya cungj doxceng yawj gij yienghsiengq boux gyauhgingj mehmbwk neix.

Ndwen 10 ngoenz 10 hauh, Ningzmingz Yen Cwngzcungh Cin Bwzdouj Cunh ciet gouj nyied cogouj eu fwen doxdax cingq youq gizhaenx hoenghhwd guh. Nungz Cidingz boux gyauhgingj mehmbwk、 ndaejdaengz vunzlai haenh baenz “cej eu fwen” gyauhgingj dadui senhconz cunghdui aen yienh neix hwnjdaiz yungh sim yungh eiq eu fwen ndaejdaengz vunzlai bekfwngz huhu.

“Gyauhgingj fapgvi aeu ciuqsouj, mboujnex dai le mbouj beij ma”, ndaw neiyungz fwen singsing miz cingz、 cihcih miz lwed, hawj gyoengq vunz- mbanj naj riunyumnyum doengzseiz, hawj gyoengqde engq roxyiuj gyau- doeng ancienz faplwd fapgvi youq henz ndang swhgeij haenx.

Nungz Cidingz guh gyauhgingj 20 lai bi le, roxnyinh ceiq laeg couhdwg gyoengqvunz lajmbanj noix rox gyaudoeng ancienz faplwd fapgvi. Bi lai doekgonq, Ningzmingz Yen aen mozdozceh samloek he vunz naengh gvaqmauh doekroengz ndaw Dah- mingzgyangh bae, gij ciengzgingj dangseiz dai bae 4 boux neix hawj de sim in dangqmaz, daengz seizneix yaep da lij siengj daengz. Baeznaengz siengj daengz gij ciengzgingj baenzneix, de couh sim in, hix hawj de siengj gij banhfap baenzlawz hawj gyoengq vunzmbanj gagnyienh rox gyaudoeng ancienz cihsiz gyauyuz.

Ningzmingz Yen diegyouq gap- gyaiq baihnamz guekcoj, vunzlai lajmbanj haengjgyaez eu fwen. Dingz- lai vunz youq seizhoengq cungj doxcomz daeuj, song boux sam boux guhdoih yungh fwen gangj ok gij cingzgamj swhgeij、 son’gyauq lwglan、 geiqdak maqmuengh、 yungh fwen gangj ceiq daengj. Ciemhciemh gvaqdaeuj, haujlai mbanj couh comz canghfwen daeuj, dingh ngoenz hawfwen banh doxdax, doenghgij hozdung neix cungj yinx ndaej vunzmbanj mbanj gyawj mbanj gyae daeuj camgya doxdax roxnaeuz yawjngonz dingq fwen.

Nungz Cidingz bineix nienzco daj yienh gyauhgingj dadui cehgvanj cunghdui cienj daengz senhconz cunghdui doeklaeng, de siengj youq gyaudoeng ancienz senhconz hozdung seiz swhgeij hix eu fwen yawjyawj. De couh ra daengz canghfwen dangdieg mizmingz Maj Yungjcenz dang lauxsae sonyinx swhgeij. Ra daengz Maj Yungjcenz doeklaeng, Nungz Cidingz cingj de son swhgeij bien fwen eu fwen, baenzlawz cij hawj gij fwen swhgeij depgaenh beksingq, baenz- lawz ciengq cij ndei dingq, Maj Yungjcenz canghfwen laux neix deng boux gyauhgingj mehmbwk giemhaw gyaez hag neix dajdoengh lo, buqlaeh sou boux lwgsae mehmbwk neix.

Hainduj ngamq hwnjdaiz biuj- yienj seiz, Nungz Cidingz miz di vueng caeuq lau. Hoeng daengzlaeng yawjraen laj daiz bouxyawj bekfwngz haenh caeuq ndaw da gyoengqde cungj miz maqmuengh, Nungz Cidingz haeb faenz haeb heuj, mboujguenj sam caet ngeih’it cungj aeu hoenx roengz ciengz daih’it. Hai bak eu fwen seiz, Nungz Cidingz mbouj gamj saenq dwg swhgeij ciengq okdaeuj, gawqyienz yungh Vahcuengh yienj ndaej baenz- neix cinjdeng. Yawjraen laj daiz gyoengq bouxyawj gig nyinhcaen dingq seiz, Nungz Cidingz ndaw sim gig gikdoengh, beksingq caen maqmuengh roxyiuj doenghgij gyau- doeng ancienz faplwd fapgvi cihsiz doengsug ngaih rox caeuq saedceij seizseiz miz gvanlienz neix ha! Ndaej daengz bouxyawj bekfwngz haenh, de ciengq ndaej engq miz rengz lo, sing fwen vandiemz de daj baihnaj cienz daengz ndaw ndoeng faexcuk bae, con haeuj ndaw sim gyoengq vunzmbanj bae!

Nungz Cidingz yienznaeuz dwg lwg Bouxcuengh dangdieg, hoeng Ningzmingz mbouj doengz deih gangjvah hix mbouj doengz. Aeu ciengq ndei fwen, dawz gij eiqsei swhgeij cinjdeng gangj okdaeuj, couh deng aeu hag rox Vahcuengh bonjdieg. Hoeng aeu guh daengz baenzneix mbouj dwg gienh saeh yungzheih he, Nungz Cidingz moix bae aen hawfwen he, cungj aeu roxyiuj yaem Vahcuengh gizhaenx gonq, lij aeu eu fwen hawj bouxfucwz hawfwen dingq gonq, hawj de bang gaijcingq. Sug gangj vah le, lij aeu vahsug、 vah riuzhengz dangdieg bien haeuj ndaw swz fwen bae, mboujnex vunzmbanj mbouj nyinh- doengz, gij yaugoj couh nanz ndaejdaengz. Nungz Cidingz mbouj lau nyaenq cam vunz, seiqlengq baiqsae. Mbangj seiz de dingqnyi bouxwnq gangj vahhaeu, de cungj riuriu cungj gvaqbae lo, mboujgvaq dauq caemh hawj gij swz fwen Nungz Cidingz mizyinx caeuq vadgei lai gvaq dem.

Boux ciengq boux riengz dwg gij gyaepgouz Nungz Cidingz. Dan ciengq mbouj ndaej, lij aeu caeuq bouxyawj doxgyau, yienghneix de bien swz fwen seiz couh aeu miz mbangj hawj vunz siengj mbouj daengz, hawj bouxyawj dingq seiz ndaej siengj ndaej ngeix. Youq seiz bouxyawj siengjngeix, Nungz Cidingz couh habseiz gangj gij vwndiz gyaudoeng ancienz, gig vaiq couh miz vunzmbanj hoizdap, boux cam boux dap sat le, gij heiqfaenh daengx hoihciengz engq nauhyied lo. Gig vaiq Nungz Cidingz youh ciengq hwnjdaeuj lo, doenghgij vahdoj bonjdieg mizyinx neix dawz gij saeh gyaudoeng ancienz yaezrwix haenx gangj okdaeuj ndaej gig ndei, laj daiz bouxyawj dingq ndaej gig nyinhcaen. Cingq youq seizneix gij fwen goksadsad youh angqyangz haenx lumj raq rumz cin neix ci haeuj daengz ndaw sim gyoengqvunz bae, hawj gyoengqvunz roxyiuj baenzlawz bae ciuqsouj gyaudoeng faplwd fapgvi. Gij fwen Nungz Cidingz ndaejdaengz gyoengqvunz haenhndei.

Gij fwen Ningzmingz Yen lizsij gyaenanz. Aeu ciengq ndei fwen, hawj vunzlai daezsang gij yisiz gyaudoeng ancienz, itdingh aeu ciengzgeiz genhciz roengzrengz guh, engq youq- gaenj dwg aeueiq gij cauxguh bek- singq, hawj gij faplwd diuzvwnz mbouj miz feihdauh、gyoetnit doegsieb haenx bienqbaenz gij yaem’wenq goksasa de, hawj vunzlai haengj dingq gyaez yawj, ndaej ciepsouh yungznab. Gij maqmuengh Nungz Cidingz hainduj couhdwg yienghneix, de ra daengz Maj Yungjcenz hawsim cam. Maj Yungjcenz sug rox gij lizsij fwen Ningzmingz, roxyiuj Nungz Cidingz gig ngah aeu hag bonjsaeh, de ciengzseiz caeuq Nungz Cidingz doxyaeng gij fungsug gak dieg Ningzmingz, son de eu fwen seiz baenzlawz cinjdeng yungh ndei biujcingz、 singdiuh、 ndangfwngz, aeu yinx ndaej lwgda bouxyawj, hawj bouxyawj riuhoho doengzseiz, rox faplwg cihsiz.

“Ciengq ndei fwen gyaudoeng ancienz, gij gyaepgouz baenzneix ciengxlwenx byaij youq gwnz roen”, Nungz Cidingz baenzneix gangj, hix yienghneix guh lo. Bineix doxdaeuj, de leihyungh seiz gak yanghcin gak mbanj banh hawfwen daengj minzsuz hozdung, gonqlaeng hwnjdaiz vih vunzlai yienjciengq fwen gyaudoeng ancienz 20 lai ciengzbaez, bouxdingq 2 fanh lai vunzbaez, vunzlai gig haengjgyaez. Seizneix, gij maqmuengh Nungz Cidingz couhdwg roengzrengz baenz boux caencingq “fwenvuengz” gyoengq lauxcoz saimbwk Mbanj- cuengh haengjgyaez he, laebdaeb yungh gij sing fwen vandiemz de, hawj fwen gyaudoeng ancienz cienz daengz gak mbanj gak dieg Ningz- mingz bae.