Aen codanzvei Hagdangz Sawcuengh Guengjsae laebhag 60 hopbi nem Gvangjsih Minzcuz Gauhcungh laebbanh 15 hopbi 11 nyied 26 hauh youq Nanzningz Si Vujmingz Gih gawjbanh. Swcigih Minzveij(cunghgyaugiz)、Minzyijveij cujyin Luz Yenbenj daengj lingjdauj camgya le codanzvei.

Luz Yenbenj youq gwnz hoih doeg gij cijsi Swcigih Dangjveij cangzveij、swcigih fucujsiz Vangz Siyungj. Vangz Siyungj hoh hagdangz aeundaej cingzcik lwenqda, de maqmuengh hagdangz laebdaeb haenqrengz, dajcaux cingzcik moq, hix maqmuengh gak fuengmienh laebdaeb cihciz hagdangz fazcanj.

Luz Yenbenj youq gwnz codanzvei naeuz, gij lizsij Hagdangz Sawcuengh Guengjsae 60 bi nem gij lizsij Gvangjsih Minzcuz Gauhcungh 15 bi, cigndaej raeuz geiqniemh, youq gwnz lizsij minzcuz fazcanj, aen hagdangz neix cigndaej raeuz ndaeng- gon. De naeuz, Baelaeng, hagdangz fazcanj aeu gaenjmaed lienzhaeh gij vanzging hung minzcuz gyauyuz caeuq vahsaw saujsu minzcuz daegbied dwg Sawcuengh sawjyungh、yenzgiu、swnjcienz fazcanj guek raeuz gih raeuz haenx; aeu gaenjmaed lienzhaeh gij gveihva、yinvu、cwngcwz cosih hong minzcuz gyauyuz nem minzcuz yijvwnz guek raeuz gih raeuz “cibsam haj” haenx；aeu gaenjmaed lienzhaeh gij dinghvih、laebdingh conhyez、muz- byauh hagdangz gensez haenx；aeu gaenjmaed lienzhaeh gij saedcaeq swhyenz naengzlig hagdangz caeuq minzveij、minzyijveij nem gij iugouz hableix gyoengq lauxsae haenx. Luz Yenbenj maqmuengh sevei gak fuengmienh aeu yawjnaek caeuq bangcoh hagdangz laebdaeb fazcanj baenaj.

Youq gwnz codanzvei, gyoengq lingjdauj caeuq conhgyah boux riengz boux gangjvah, doxyaeng hagdangz baenzlawz engq ndei engq vaiq fazcanj minzcuz gyauyuz, caemhcaiq daezok gij genyi caeuq yigen swhgeij.

Hagdangz Sawcuengh Guengjsae 1956 nienz laebbanh. 60 bi gvaqdaeuj, hagdangz fazcanj vaiqdangq, youq beizyangj ganbu saujsu minzcuz、lauxsae Sawcuengh Sawgun、yinzcaiz minzcuz vwnzva yisuz，daezsang giekdaej gyauyuz banhhag cizlieng daengj fuengmienh guh’ok le gungyen, vih dieg minzcuz gih raeuz beizyangj liux 4 fanh lai boux gak loih yinzcaiz, coicaenh le minzcuz doxgiet cinbu gih raeuz. Hagdangz hix daj yienzbonj banh donjyinbanh fazcanj daengz banh cunghconhbanh, daj yienzbonj aen conhyez he fazcanj daengz cibgeij aen conhyez, youz hagdangz cunghciz bingzciengz fazcanj baenz aen hagdangz swcigih cungdenj he, daj gauhcungh moq fazcanj baenz aen sifansing gauhcungh youq ndaw Guengjsae mizmingz he. Dangqnaj, hagdangz gungh miz hagseng 4500 vunz, ndawde hagseng saujsu minzcuz ciemq 95% doxhwnj.

Swcigih Minzveij、Minzyijveij gihgvanh gak cusiz、Swcigih Gyau- yuzdingh、Vujmingz Gih Dangjvei、Cwngfuj daengj bumwnz caeuq danhvei lingjdauj、conhgyah nem lauxsae Sawcuengh daengj 300 vunz baedauq camgya le codanzvei.

(Mungz Sugij)