Diuz gai baihsae miz ranz he cungj miz 4 boux vunz, gvanbaz, daeglwg ndeu miz 3 bi caeuq daxdaiq. Ranz neix gvan heuhguh Daegliengh, bouxvunz sanghung, dang ganbu. Yah de baeznaengz guh vunz guh saeh ged lai, ndigah vunzwnq heuh yah de guh “Yahged”. Yahged bae gwnz haw gai mak. Daegliengh ciengz doiq yah de naeuz:“Gaej nyen lai, daeng gwn couh gwn, daeng yungh couh yungh.” Yah de naeuz:“Mbouj laemz baenzlawz rom ndaej cienz lai?”

Liggaeuq bet nyied cibngux lajbyonghngoenz, Yahged cij bae rag cisamloek makbug ndeu hwnj haw bae gai. Seiz ok dou, daeglwg doiq de naeuz:“Daxmeh ndeigai! Geiq ce song aen makbug dauq hawj gou bw.” “Baujboiq daxmeh a, gou geiq lo. Mbouj dwg daxmeh ndeigai, dwg makbug ndeigai.” Daxboh daxdaiq dingq le, riuhehe hwnjdaeuj.

Gvaiq la, mbouj rox maz yenzyinh, bineix makbug gig ndei gai, youh ndaej gyaqcienz. Bingzciengz moix gaen 1.3 maenz daengz 1.5 maenz, bineix 2 maenz daengz 3 maenz gaen he. Ci makbug ndeu hwnj haw, ngamq 2 diemj cung, Yahged couh gai liux lo. Seizhaenx, miz daegcoz he daeuj cam de:“Gou cawx song aen makbug.” “Doiq mbouj hwnj, mbouj miz gai lo, gizwnq bae cawx ba.” “Gizwnq hix mbouj miz gai lo, gou yawjraen ndaw swx mwngz lij miz song aen, cingj gai hawj gou, gou hawj mwngz gaen 3 maenz.” “Neix dwg gou ce hawj lwg gou, gaen 5 maenz hix mbouj gai.” “Mehliuz, gouz mwngz gai hawj gou, gou gaenq dapwngq cawx song aen makbug hawj daxdaiq gou. Mwngz caiq bae bued ci mak ndeu daeuj, itdingh lij gai ndaej sat. Neix gou hawj mwngz aen he 30 maenz ndaej loba.” “Yo, daegnuengx, gou gai mak baenzlai bi lo, boux daeuj cawx cungj naeuz cawx mak baema hawj lwgnyez, caengz nyi byawz naeuz cawx hawj bouxlaux gvaq. Sim hauqswnh mwngz gig ndei. Gou gai hawj mwngz.”

Daegcoz haenx dawz mak deuz lo, Yahged gag naeuz:“Aen mak he couh canh 20 lai maenz, guh ndaej gvaq bw.” Gangj sat, de couh rag ci youh bae bued moq.

Banhaemh, caezgya naengh youq gyanghongh gangj gojgaeq. Yaep he, Ronghndwen swng hwnjdaeuj lo, daeglwg Yahged dauq ranz siengj dawz bingj、makbug okdaeuj caeq ronghndwen. De cam daxmeh:“Makbug gou youq gyawz?” “Yo, gou gaenq gai bae lo, dauq bae bued, gizde hix mbouj miz gai lo. Gou con geij diuz gai hix cawx mbouj ndaej. Baujboiq, ngoenzcog gou aeu daeh makbug ndeu dauq hawj mwngz.” “Ha……gou aeu makbug……” Daeglwg sikhaek youq gwnznamh rouxringx daej hwnjdaeuj. Daegliengh ndaq yah de:“Caen dwg lwg ndaej meh, meh ndaej daiq, gofaiq ndaej goraeu bw. Gai byaek lienz gij byaek daiq maij gwn hix mbouj miz gwn. Seizneix haeb cienz gwn vei. Daeg iq, gaej daej, daxboh bae ranznden aeu bingj vuenh makbug dauq hawj mwngz.” Gangj sat, de sikhaek bae bongx dou ranznden. De laebdaeb cam doh diuz gai, gyoengqde cungj dwg bouxlaux youq ranz, cij cawx bingj mbouj cawx makbug. Daegliengh hoz gig ndat dauqma ranz, raen daeglwg lij ninz gwnznamh daejcupcup. De youh ndaq yah de geij coenz, yah de hix daej lo, daxdaiq hix gaen daej hwnjdaeuj. Sam mehlwg lumj ciengqheiq nei daejsiebsieb.

Seizde, miz aen ciiq ndeu hai gvaqdaeuj daengx roengzdaeuj, daj gwnz ci byaij roengz daegcoz he, de couhdwg aeu 60 maenz caeuq Yahged cawx song aen makbug haenx. Daxbuz ranznden dwg daxdaiq de, de yinh doxgaiq dauq caeuq daxdaiq de gvaq ciet. De raen 3 mehlwg neix daej, cam rox cingzgvang le couh dawz song aen makbug daeuj hawj daeg iq. Daeg iq sikhaek caem roengzdaeuj. Yahged doq uet raemxda doq mbon cienz okdaeuj, naeuz:“Caen doiq mbouj hwnj, gou doiq 50 maenz hawj mwngz.” “Gou mbouj aeu. Gaicawx swyouz, nyienh cawx nyienh gai. Byawz rox yah gou hix cawx ndaej makbug gvaq. Neix dwg gou soengq hawj lwg mwngz. Daxdaiq lij miz song aen dem.” Daegliengh gig vaiq dauq ranz dawz song bau bingj okdaeuj, ndaw bau bingj he miz 100 maenz, de ndenq hawj daxdaiq daegcoz haenx, naeuz:“Gou aeu song aen bingj vuenh song aen makbug.” Daxdaiq ciep dwk riu naeuz:“Ndei, docih mwngz.”

Seizde, ronghndwen ronghsaksak saj youq gwnzdieg, cibfaen gyaeundei, caen maez vunz.