Gaeqmeh miz song dahlwg, boux hung heuh dahcej, boux iq heuh dahnuengx.

Miz ngoenz ndeu, dahnuengx fatbingh, youqgaenj raixcaix. Daxmeh gip dwk lae raemxda. Dahcej buet daengz gyanghongh, gvih roengzdaeuj, song fwngz doxgoeb youq najaek, lwgda yawj hwnj gwnzmbwn bae, gag nam gag gangj:“Mbwn daxgoeng, cingj mwngz guh saeh ndei, gouqgouq dahnuengx gou ba!”

Seizneix, duz manaez cingq youq rog dou gvaengz bae gvaengz dauq, ndawsim cingq siengj baenzlawz cij ndaej gwn gaeqlwg. Dang de dingqnyi gaeq dahnuengx fatbingh seiz, ndawsim angq dangqmaz, gihvei daeuj lo, cien bi bungz mbat ndeu a! Manaez ganjvaiq ma ranz, daiq hwnj fouq gingqda ndeu, daenj geu buh hau ndeu, cang guh boux canghyw.

Manaez angqvauvau riuj aen loengx iq he, lumj mbin nei yiengq ranz gaeqmeh buet bae. De siengj daengz caj yaep ndeu couh ndaej gwn nohgaeq lo, ngah dwk myaiz rihnangnang bae. Daeuj daengz ranz duzgaeq lo, manaez menhmenh roq dou, unqswnh naeuz:“Gaeqmeh dax- simj, dingqnaeuz lwg mwngz fatbingh lo, gou dwg canghyw, rox yw haujlai cungj bingh, hawj gou haeujbae yw lwg mwngz ba.”

Dahcej baez dingqnyi miz canghyw daeuj lo, sikhaek buet okbae hai dou, gig roxsoq dwk naeuz:“Canghyw, mwngz daeuj ndaej caen doiqseiz, docih mwngz, cingj haeuj- daeuj!” Manaez riunyumj naeuz:“Gaej yungh guhhek lai.” Doq gangj doq yamq hung dwk byaij haeuj ndaw ranz bae. De goq mbouj ndaej caeuq gaeqmeh gangjvah, cig byaij haeuj ndaw rug, daengz henz congz dahnuengx ninz, gyajcang yawj gij bingh dahnuengx.

Seizneix gaeqmeh raen boux hek neix mbouj cingj gag daeuj, ndawsim miz di ngeiz, de gaen youq baihlaeng sijsaeq yawj boux canghyw neix. Dai lo, mbouj yawj mbouj rox, mbat yawj doeksaet liux. De yawjraen diuz rieng youh bwnnyum youh raez ndeu, ndawsim sikhaek mingzbeg lo.

Manaez genjcaz liux, cienq ndang doiq gaeqmeh naeuz:“Daxsimj, gij bingh lwg mwngz youqgaenj bw, danghnaeuz mbouj vaiq di yw ngaiz dai bw.” Gaeqmeh daegdingq sim- vueng dwk naeuz:“Yiengh ma, hoeng mbouj yungh gip, mwngz ganjroen dwgrengz lo, ok rog ding bae gwn cenj caz gonq caiq yw.” Manaez gaen gaeqmeh daj ndaw rug okdaeuj, gaeqmeh ndenq aen daengq hawj de naengh. Manaez gyawz gamj naengh, aenvih diuz rieng de youh bwnnyum youh raez, baez naengh roengzbae couh conh okdaeuj, yienghneix gaeqmeh baez fatyienh giva couh satsoq lo. Gaeqmeh raix cenj caz ndenq hawj manaez, naeuz:“Cingj mwngz naengh roengzdaeuj menh- menh gwn caz deq gou, gou bae ndaw ranzdajcawj aeu noh okdaeuj hawj mwngz.” Manaez naeuz:“Gou mbouj naengh, ndwn gwn ndaej lo.” De itmienh gwn caz itmienh siengj: Mbouj loek, lij miz noh gwn, gwn noh sat le caiq gwn gaeqmeh caeuq song boux lwg de. Siengj sat gag laeglemx riu hwnjdaeuj.

Gaeqmeh daj ndaw ranzdajcawj dawz deb noh homfwtfwt ndeu okdaeuj lo, de caemdingh dwk doiq manaez naeuz:“Canghyw, mwngz sinhoj lo, daeuj, gwn imq le caiq yw lwg gou.” Gaeqmeh ngamq cuengq aen deb, manaez couh vax gaiq noh oet haeuj bak bae, ngamq geij gaemz couh gwn liux lo. Gaeqmeh ndwn youq gizhaenx mbouj doengh, song da cimyawj manaez. Ngamq gvaq yaep he, manaez hemq dungxin hwnjdaeuj, youq gwnznamh rouxringx geij mbat. De caengzyawj gaeqmeh, siengj aj bak gangjvah. Hoeng lij caengz gangj, bak couh conh ok fugfauz hau, seiq ga baez iet, gatheiq lo.

Gaeqmeh baez duet geu buh gwnz ndang manaez, duz manaez yakrwix he couh loh okdaeuj lo. Dahcej yawj dwk bak ajloengloeng. Daxmeh doiq de naeuz:“Lwg a, aen sim fuengz vunz mbouj ndaej mbouj miz, hix mbouj ndaej seizbienh saenq vunz.”