11 nyied ndawcib, dou miz seizheiq ndaej bae Gveicouh Swngj Hinghyi Si camgya aen nienzhoih Bi 2016 Faenhoih Bauqceij Dieg Siujsoq Minzcuz guek raeuz, baez daih’it byaij haeuj le Genzsaenamz Buyihcuz Myauzcuz Swcicouh gizdieg saenzgeiz gyaeundei ndoengbya daengjdwt deihdaenx、mbanj Bouxyaej mbanj Myauzcuz ranzcanx doxdaeb doxing、beixnuengx Bouxyaej Myauzcuz ndangdaenj lwenqda neix, bya heu raemx saw, sing fwen goksad, gijgwn feihhom, yiengh dem yiengh gaiq youh gaiq, cungj hawj vunz maezmwd.

Gveicouh Swngj caemh heuh baenz “Genz”, Genzsaenamz Buyihcuz Myauzcuz Swcicouh youq bi 1982 ndwen 5 ngoenz 1 laebbaenz, ndaw couh miz Gun、Bouxyaej、Myauz、Yiz、Veiz daengj 35 aen minzcuz comzyouq. Ndaw gyaiq gingj gyaeu rizgeq lai, youq rog singz Hinghyi, couh miz Lueglaeg Majlingjhoz sangloet、geizheih、yungyiemj、lengjlet、raemhcaem neix. Ndaw lueglaeg bya sang raemx raez, raemxdiuqdat nga dep nga fangienj doek roengz, raemxdah sawyau ngutngeuj iet bae, hawj vunz yawj le simdiuq ga’unq. Baihnamz singz Hinghyi 4.5 goengleix gyae haenx, couhdwg Guekgya Diciz Gunghyenz Vanfunghlinz, gizneix song fanh lai goengq byasang doxlienz doxdaeb deihdaenx iet bae cienleix, lumj baenz cien baenz fanh bouxbing duzmax foedfoed nanghnangh buet bongh youq baihnaj nei; goengqbya geizheih gyaeundei caeuq doenghnaz loegheu、diuzdah utngeuj laerat、aenmbanj gaeuqgeq ndeiyawj、ndoengfaex mwncup heuswd doxcomz doxyungz youq giz ndeu, gyoebbaenz cungj funghgvangh doenghnaz ndoengbya lajmbanj noix raen ndeu. Aenmbanj Bouxyaej Mbanjnazveih couh baizlele dwk sebsieng youq ndaw ndoengbya, bya heu raemx saw doenghnaz baenz benq, aenranz ciengz hausak vax mongmuq, lumj dwg diegsien nei gyaeundei caemdingh.

Aenhoih anbaiz daiq dou bae ndaw yienh caijfangj, aenci hai coh baihsaebaek, gij gingj goengqbya gyaeundei song henz roen cungj yap haeuj lwgda mbouj dingz. Ci hai sam diemj lai cung le bae daengz dieg Cingzlungz Ngeihcib Seiq Utngaeu. Gizneix dwg duenh roenbya riengz lingqbya vatguh ndeu, seiz ciengz ciengq hung seiqgyaiq baez daih- ngeih haenx, gij cihuq bing Meijgoz daehyinh doxgaiq hoenxciengq guek- rog soengq bang Cungguek haenx haeujok Yinznanz Gveicouh cungj aeu gvaq gizneix, ngeihcib seiq utngaeu cingq dwg giz haeujok ceiq youqgaenj ndeu, cihuq hwnzngoenz hwnjroengz mbouj dingz, ndigah baenz le “roenut lizsij” daengx seiqgyaiq mizmingz ndeu. Dou daengz gizde seiz mok lij nanwt yawj mbouj raen diuz roenut, yawj gep sigbei daengj henz dat gaisau le couh coh baihbaek bae daengz Bujanh Yen miz mingzdaeuz ndei “aenmbanj gocazgeq Cungguek” neix, caenhraen 10 fanh moux suencaz baenz benq baenz ndoeng ietnangq bae gvangqyub, baenz coij baenz caengz heuswdswd, gij gocaznding Bujanh youq doenghcungj diuzgienh “haijbaz sang、veijdu daemq、ndit ciuq siuj、fwj mok lai” haenx gyuemlongz lajde sengmaj, hom caz biu doh seiqlengq, baenz le hangh hongsaeh youqgaenj vunz- mbanj Bouxyaej daengj beixnuengx dangdieg vut gungz baenz fouq ndeu.

Genzsaenamz minzcuz lai, fung- cingz daegsaek naekgywg, gak minz- cuz yaem’wenq、 gofoux、 ngoenz- ciet、fungsug、aenranz、ndangdaenj doenghgij neix gak miz daegsaek, gyoebbaenz gij vwnzva minzsuz minzcuz lai cungj lai yiengh haenx, lumjbaenz Bouxyaej “sam nyied sam”“loeg nyied loeg”“cietfwen Cazbwz”, Myauzcuz “bet nyied bet” doenghgij ngoenzciet minzcuz neix, daegsaek yienhda, ciengzmienh nauhyied hoenghhwd, hawj vunz yawj mbouj rox mbwq. Youq gizneix, mwngz ndaej itmienh cimz gwn dinmou aeuq duhhenj、faenjnohbyoiq、haeuxnaengjraiz doengh gijgwn feih- hom “Bouxyaej bet vanj hung” neix, itmienh yawjngonz gofoux minzcuz: Yaem’wenq Bouxyaej “bet yaem naengh ciengq”, gaeuqgeq sohsed yaem rwenz neuzned, ndaw guek rog guek cungj haenh dwg “sing mbwn sing deih”; foux Yizcuz “Ahmei Cizdoh” (foux dahsau baehaq) doq ciengq doq bekfwngz doq daemhdin, hawj vunz gikdoengh angqyangz, ndaej haenh dwg “foux dikdaemh baihdoeng”; gwnz imq yawj sat le mwngz lij ndaej bae camgya aen hozdung Bouxyaej langhsau, hawj mwngz youq ndaw angqyangz mbouj sij biek ma……