Haenhhaenh bohmeh baz,

Guh hong ma daengz ranz;

Lij swiq byaek swiq vanj,

Cungj mbouj ngvanh haemzhoj.

Bohmeh miz bonjsaeh,

Ciengx gaeq caiq ciengx mou;

Gwndaenj couh mbouj you,

Cienzngaenz haeux mbouj duenh.

Bohmeh raeuz leixhaih,

Guh gaiqgaiq cungj baenz;

Faek haeuxmaex sam gaen,

Sou raen gvaq mboujcaengz.

Bohmeh gaenx guh hong,

Mbwn rongh couh hwnqcongz;

Ok reih bae guh hong,

Daengngoenz roengz cij ma.

Bohmeh cingsaenz cuk,

Song de uk gaenx naemj;

Guhmax cungj mbouj caem,

Ngoenz gaem ngaenz gvaq cien.

Bohmeh mbouj lau haemz,

Dajndaem youh dajciengx;

Mou max vaiz baenz riengh,

Sim siengj lwg gwndaenj.

Bohmeh raeuz caemh gyaez,

De simsaej ciz ndei;

Guh hong naz hong reih,

Cungj mbouj ngeix dwgrengz.

Ngeix doenghbaez gij raeuz,

Lij oknyouh gwnz congz;

Meh mbouj ndaq mbouj mboengj,

Baez boengzhangx cix gvaq.

Seiz ngeix raeuz lij iq,

Miz saek di nohnyeq;

Bohmeh song boux de,

Cungj ce hawj raeuz gwn.

Ngeix gyoengq raeuz lij iq,

Cungj miz di saeh loeng;

Meh mbouj ndaq mbouj mboengj,

Aeu leix loenghdoeng raeuz.

Raeuz daihgya lwgnyez,

Dingq bohmeh gangjvah;

Roengzrengz hag vwnzva,

Daeuj baudaz gyoengqde.

Raeuz gak boux lwgnyez,

Niemh bohmeh aencingz;

Dawz Cunghgoz vwnzmingz,

Caenhcingz cienz roengzbae.