Geij bi gonq Daegsam yawjraen mbanj ranznden miz vunz bae gai lwed ndaej cienz daeuj yungh, roxnyinh ndangdaej bonjfaenh gig cangq, hix couh caeuq gyoengqde caez bae gai le song bi lwed. Hoeng, song bi neix ndangdaej Daegsam cix bienq haw lo, daengx boux vunz youh roz youh byom. Vunz ndaw mbanj ciengzseiz yawjraen Daegsam bae yenyihyen aeu yw daeuj gwn, miz vunz cam de baenz maz bingh, de cijdwg riuriu, dap naeuz deng di bingh iq, mbouj miz maz saeh. Mboengqneix ndangdaej Daegsam engqgya ca, baez ning couh baegfofo. Mehyah yawjraen le cam de baenzlawz lo, Daegsam cix naeuz bonjfaenh mbouj miz maz saeh, heuh mehyah gaej okbae luenh gangj. Hoeng, song ndwen gvaqbae, ndangdaej Daegsam cix yied daeuj yied ca. Ngoenz ndeu mbwn ngamq angj, Daegsam couh hwnq mbonq gip geij geu buh, gag bae yenyihyen yw bingh lo. Mehyah siengj caeuq Daegsam caez bae, hoeng deng Daegsam hat dauq lo.

Ngoenzhaenx mehyah Daegsam gwn mbouj van, sim mbouj onj, caj daengz banringz, Daegsam cij daj denva hawj mehyah naeuz bonjfaenh aeu cuyen, heuh mehyah gaej sim you, bonjfaenh gvaq geij ngoenz couh ndaej dauq ranz. Mehyah cam Daegsam baenz maz bingh, Daegsam vanzlij mbouj dap, cijdwg naeuz mehmbwk gaej guenj baenzneix lai, youq ranz ndeindei ciengx duznonsei caj de dauq ranz couh ndaej.

Mehyah Daegsam simsoh, youq ndaw ranz sojmiz saeh cungj dwg Daegsam guhcawj, seizneix mehyah dingqnyi bouxgvan yienghneix gangj, laihnaeuz bouxgvan caen dwg mbouj miz maz saeh, sim’onj youq ranz guh hong.

Aen singhgiz ndeu gvaqbae, mbouj raen Daegsam dauq ranz, mehyah youh vueng lo, daj denva cam Daegsam seizlawz dauq ranz, Daegsam youq ndaw denva naeuz lij gvaq mboengq ndeu, heuh mehyah caiq naihsim caj.

Song aen singhgiz gvaqbae, Daegsam vanzlij mbouj caengz dauq ranz. Mehyah caj mbouj roengzbae lo, ngoenzneix ranz baez rongh de couh hwnqdaeuj sousib doxgaiq, hwnj gyaq ci daih’it bae ndaw yienh. Mehyah daeuj daengz yenyihyen, cam haujlai vunz, byaij le haujlai roen cij ra daengz aen ranzvunzbingh Daegsam youq.

Aen ranzvunzbingh Daegsam dwg youq yihyen dieg ceiq doekfwz, henz mbouj miz maz vunzbingh, Daegsam gag boux vunz ndeu youq aen rug ndeu. Mehyah haeujdaeuj seiz, Daegsam cingq naengh youq gwnz mbonq yawj densi, ngiengxgyaeuj baez yawjraen mehyah ndwn youq bakdou, doeksaet yat, gipmuengz heuh mehyah haeujbae. Mehyah Daegsam mbouj ndaej doegsaw gvaq, hix mbouj rox mbaw ceij nem youq henz mbonq Daegsam sij maz, de ndwn youq henz mbonq Daegsam cigsoh cam naeuz: “Sam ya, baezneix mwngz cuyen miz buenq ndwen lo, seizlawz cij ndaej dauq ranz ha? Dwg mbouj dwg bouxcanghyw mbouj hawj mwngz dauq ranz ha?”

Daegsam hat naeuz:“Luenh gangj gijmaz! Bingh caengz ndei couh mbouj ndaej dauq ranz, mwngz gaej daeuj gizneix luenh gangj, saetnaj lai.”

Mehyah de youh cam:“Mwngz seizlawz cij ndaej dauq ranz ne? Ndawranz duznonsei yaek ninz baez daihhaj lo, mwngz caiq mbouj dauq ranz, gij hong ndaw naz cij gou gag boux he guh mbouj sat lo.”

Daegsam dap: “Seizneix lij guenj maz duznonsei! Bingh gou ndei le couh gag roxyiuj dauq ranz lo. Mwngz ndeindei dauq ranz, caeuq daeglwg ciengx ndei cauz nonsei neix.”

Mehyah de cam mbouj ok maz, bonj siengj bae ra bouxcanghyw cam Daegsam baenz maz bingh, cix deng Daegsam caenndang soengq daengz cehcan.

Mehyah Daegsam bonj couhdwg boux vunz mbouj gyaez suenq mbouj gyaez siengj, yawjraen saeknaj Daegsam beij mboengqgonq ndei lai di lo, hix couh cuengqsim hwnj ci dauq ranz. Nanznanz mbouj raen Daegsam dauq ranz, vunz ndaw mbanj cam, mehyah Daegsam hix couh riunyumnyum dwk naeuz Daegsam youq yihyen cuyen, gvaq mboengq ndeu couh dauq ranz lo. Vunz caiq cam Daegsam baenz maz bingh, mehyah cix dap mbouj okdaeuj lo.

Duznonsei cauz laeng cungj ndaej hwnj fanghgwzcuz lo, Daegsam vanzlij mbouj caengz dauq ranz. Reh nonsei ndaej gai seiz, Daegsam dauqdaej daj denva dauq ranz lo, heuh daeglwg bae yihyen yawj de baez ndeu, miz saeh yaek daengq daeglwg. Daeglwg dingq le, ngoenz daihngeih couh bae yihyen lo. Daegsam menh- menh naeuz hawj daeglwg nyi, ndawranz lij miz geijlai cienz, cunzcez yo youq gizlawz, bouxlawz lij yiemq cienz gag ranz.

Daeglwg roxnyinh gig geizheih, cam Daegsam naeuz:“Boh, mwngz gangj gij saeh neix hawj gou dingq guh maz?”

Daegsam dap:“Mbouj roxyiuj gou aeu cuyen daengz seizlawz, seizneix gangj hawj mwngz dingq, cij siengj hawj mwngz hag danggya a. Daeglwg a, mwngz seizneix 25 bi lo, gou lumj mwngz baenzneix hung seiz gaenq miz daxcej mwngz lo.”

Daeglwg baez dingq daxboh yienghneix gangj, riuhaha dap naeuz: “Bi’gvaq Dahcaij mbouj dwg daeuj ranz raeuz youq le seiq haj ndwen, daxmeh mbouj siengj aeu de guh dahbawx, gou miz maz banhfap.”

Daegsam dingq le doeknaiq sing ndeu, hix mbouj caiq gangj maz, cigsoh soengq daeglwg bae cehcan naengh ci.

Daeglwg banhaemh dauq daengz ranz, gangj gij vah Daegsam daengq hawj daxmeh dingq, song vunz siengj bae siengj dauq, hix siengj mbouj ok vihmaz Daegsam aeu daengq cungj vah neix. Aenvih hong nyaengq lai, song vunz dajsuenq ciengx cauz nonsei neix sat caiq bae yihyen cam Daegsam.

Hoeng, ngoenz daihngeih ban- ringz, mehyah Daegsam cix ciep ndaej le denva yihyen daj daeuj. Vunz yihyen naeuz daj haemhlwenz hwnj couh ra mbouj raen Daegsam lo, heuh vunz ranz de gaenjgip bae yihyen. Mehyah Daegsam baez dingq, mbaw nonsei hix mbouj gip lo, beng dwk daeglwg couh bae yihyen. Song vunz daeuj daengz yihyen seiz, yencangj caenndang okdaeuj ciepdaih gyoengq- de, naeuz dwg ngoenzlwenz banhaemh Daegsam byaij ok bakdou yihyen, mbwn laep le husw souj rugvunzbingh fatyienh Daegsam mbouj caengz dauq, sikhaek okbae ra. Hoeng, ndaw yihyen ra doh le hix ra mbouj raen vunz, henz yihyen hix ra doh lo, vanzlij ra mbouj raen vunz.

Bak douhung yihyen gek diuz roen hung ndeu couhdwg diuz dah hung ndeu, yihyen ngeiz Daegsam dwg mbouj dwg doek roengz ndaw dah bae lo. Doeklaeng, gingjcaz doenggvaq cazyawj genhgung lusieng henz roen, fatyienh mbwn laep seiz Daegsam gag boux vunz ndeu byaij hwnj aen giuz gwnz dah hung, hoeng, ndaw genhgung lusieng cix caiq hix yawj mbouj raen Daegsam roengz giuz, ndigah, gingjcaz buenqduenh Daegsam dwg diuq dah gaggaj lo.

Gvaq le geij ngoenz, youq donh dah baihlaj ra ndaej seihaiz Daegsam lo. Ndang Daegsam gaenq deng duzbya gaet ndaej mbouj miz benq naeng ndei ndeu. Yihyen roxnyinh bonjfaenh yawj mbouj ndei vunzbingh, nyienh boiz 10 fanh maenz ngaenz hawj ranz Daegsam.

Mehyah Daegsam caeuq daeglwg cix mbouj nyienh lo, song vunz nyinhnaeuz 10 fanh maenz ngaenz dij mbouj ndaej vunz diuz mingh ndeu, iugouz yihyen caiq boiz lai di cienz, ceiqnoix aeu boiz cibgeij ngeihcib fanh. Yihyen mbouj doengzeiq, meh- yah Daegsam caeuq daeglwg Daegsam mbouj miz banhfap, hujdengdeng dauq ranz lo.

Fuengzcug Daegsam dwg aen fuengzcug hung ndeu, gyoengq vunz ndaw fuengzcug dingqnyi gienh saeh neix, gyoengq bouxsai couh youq daeglwg Daegsam daiqlingx lajde, caez bae daengz yihyen, comz youq bakdou yencangj aeu aen gangjfap. Yencangj yawjraen gyoengq vunz neix comz youq bakdou nauhfaenfaen, baenzlawz gangj gyoengqde cungj mbouj dingq, cijndei heuh vunz ndaw yihyen dawz bonj binghlig Daegsam baij youq dangqnaj gyoengq vunzlai. Cij raen gwnz binghlig sij dwk:“×××, Cazbingh gezgoj: Bingh’aiswh.”

Gyoengq bouxsai ndwn youq baihnaj baez yawjraen cazbingh gezgoj, sikhaek cienq ndang coh rog byaij bae, gyoengq bouxsai ndwn youq baihlaeng yawjraen couh comz hwnjbae cam baenzlawz yaek deuz, dang gyoengqde dingqnyi Daegsam dwg deng “bingh’aiswh” seiz, hix riengzlaeng coh rog byaij bae. Gyoengqvunz baez yaep da couh cienzbouh sanqnyaengq sat, cij lw mehyah Daegsam caeuq dwglaeg Daegsam song vunz naj saujrangq gag ndwn youq gizhaenx.