Lingzyinz Yen Swcwngz Cin Lungjduih Cunh youq mwh haenqrengz hwnjguh lajmbanj moq seveicujyi, vuenhmoq naemjsiengj, naek youq comz rengz guh gezgou canjnieb diuzcwngj、unglaeb canjyez daegsaek、daezsang gij naengzganq baenz fouq vunzlai baengh gohgi bae demsou gwnzde bae, laebbaenz le ndaem gosangh ciengx nonsei、goywdoj、dajciengx、okrog dajgoeng、dangjyenz doxbang 5 aen hezvei canjnieb neix, hwngfat cungj ginghci “gehrin” aeu ndaem gosangh ciengx nonsei guhcawj、ndaem goyw guhbouj neix, aeundaej ginghci yauyiz ndei. Geij bi gvaqbae, goengqbya bienq heu lo, mbanj bienq gyaeundei lo, vunzmbanj bienq fouq lo, hawj vunzlai dwen haenh mbouj dingz.

Lungjduih Cunh dieg youq ndaw runghlaeg diegbya, vunz dangdieg aeu coenz fwen “Bya sang rin hix lai, ok dou ngaiz bin lingq; dieg fouz sam cik bingz, bouxsien cingh ngauz gyaeuj” neix daeuj dajbeij gij dieg yaezrwix gizneix. Gungz cix naemj fouq. Gyoengq vunzmbanj youq cunh dangjcihbu dazyinx lajde, caezsim haenqrengz buek guh, aeu goeng- rengz bonjfaenh baenz yamq baenz yamq gaijbienq yiengh gungzndoq, ndaej gvaq gij saedceij angqyangz vuenyungz haenx.

Vunz Lungjduih gaijbienq yiengh gungzndoq byaij yamq daih’it dwg aeu naz ndei reih ndei ndaem gosangh. Geij bi gonq, cunhcihsuh Vuz Denhlaiz nyinhnaeuz ndaw mbanj ndaem gosangh ndaej hwngfat, couh gag sawq ndaem le 11 moux gosangh, bi haenx ciengx nonsei 16 dungh, souhaeuj 1.5 fanh maenz, bi daihngeih vunzlai couh riengz guh hwnjdaeuj lo, mbouj daengz song bi seizgan ndaw mbanj ndaem gosangh 3000 lai moux, baengh ndaem gosangh ciengx nonsei bingzyaenz moix bi moix ranz demsou 5000 maenz doxhwnj, baenz hongsaeh daeuz daengx mbanj. Yamh daihngeih dwg ciengx mou, youq mwh hwnjguh lajmbanj moq, vunzmbanj couh guh daengz bouxvunz caeuq doenghduz faengek, bae giz liz ranzyouq haemq gyae haenx guh rienghmou, banh ciengzciengxmou, aeu mbawmaenz、byaekheu caeuq raemz daeuj gueng mou, mou caengz maj hung couh miz lauxbanj dingh cawx, gai daengz Gvangjcouh daengj singzhung, vunzlai caemh demlai le souhaeuj. Yamq daihsam dwg ungganq goywdoj, gwnz bya seiqhenz mbanj Lungjduih miz haujlai gocibdaihgoenglaux doenghgij goywdoj neix, ndaw cunh youh roengzbiu ceng ndaej ndaw yienh 2000 moux hanghmoeg ungganq gocibdaihgoenglauz, riengzlaeng cuj- ciz、sonyinx vunzmbanj youq gwnz bya gaglouz ndaemganq, doengjit sougai, demlai souhaeuj, seizneix gij byafwz Mbanjrunghbiz、Mbanjbit- doengh daengj 5 aen mbanj ndaw cunh gaenq baenz Guengjsae cibdaihgoenglauz cwx yenzgiu gihdi. Ndaw cunh lij hwnjfat ndaem- ganq gosisaux (铁皮石斛), laebbaenz gosisaux nungzminz ciennieb hoz- cozse, lij laebbaenz le Cangzswngh Senhcauj Swnghvuz Gohgi Gaihfaz Youjhan Gunghswh, banh le ndaem- ganq gihdi, youz gunghswh bau ungganq miuzyw caeuq son ndaem- ganq gisuz, vunzmbanj bau ndaem, gunghswh bau soucawx gyagoeng, moix bi ungganq miuzyw mauhgvaq 400 fanh go, ndaej gai daengz Yizbwnj、Majlaizsihya bae, vunz- mbanj youh demlai le yiengh souhaeuj ndeu.

Vunz Lungjduih baengh rengz bonjfaenh byaij ok diuz roen vut gungz baenz fouq ndeu, saedceij bi beij bi ndei, ndaw swcigih raeuz caemh miz haujlai gihcwngz cujciz daiq dangjyenz bae habsib aeu gingniemh.