Loz Yinghvaz hagseng Vujmingz Gingloz Siujyoz lij geiq ndaej, bi 2014 ndwen 7 ngoenz 27 dwg ngoenz hawj de ciuhvunz nanzlumz he. Ngoenz haenx, de youq aen daizheiq gaihmusiz Cietyisuz Vwnzva Lwgnyez Gozci Sanghaij bi 2014 yienjciengq hot go gingqlaeuj Bouxcuengh 《Laeuj Cenjcenj Cungj Van》 yiedcingz gaksasa haenx. Gij sing go de vandiemz、 sing de cingh, hawj gyoengq bouxyawj cungj gamjdoengh, ndaej daengz yienhciengz bouxyawj bekfwngz haenh. Loz Yinghvaz ndaej baenz neix yienhda, cawz le de roengzrengz haenqguh, lij liz mbouj hai Vangz Denhhwngz boux lauxsae sonyinx “Lwg Gingloz” Yisuzdonz、 boux duiyouh ganbu Vujmingz Gih Vwnzva’gvanj neix yungh sim son- gyauq.

Simndei Soengq Hawj “Roegvenz Iq” Mbanjcuengh

Bi 2011, Vangz Denhhwngz ngamq daj gih vwnzva’gvanj duiyouh, de dingqnyi Gingloz Siujyoz cingq caepcawq laeb yisuzdonz, hoeng ra mbouj ndaej lauxsae ciengqgo, de cawjdoengh yiengq mizgven bumwnz cingjgouz, bae dang lauxsae ciengqgo Gingloz Siujyoz mbouj aeu cienz. Vih liux gikfat gij yinxdaeuz hagsib hagseng, Vangz Denhhwngz caeuq lauxsae wnq ciengzseiz caez bae saeddieg caijfungh, ciuq dangdieg saedceij、 lizsij、 baenzgya daengj faen loih soucomz、 cingjleix、 gaijbien、 cauxmoq Fwencuengh, yienzhaeuh doenggvaq gangj gojgaeq Boux- cuengh、 son sij saw、 ciengq damzraih、 guh’angq daengj fuengsik mizyinx son hawj hagseng. Raen de ngoenznaengz nyaengqnyatnyat, miz vunz gienq de youq ranz ndeindei yietnaiq gvaq, Vangz Denhhwngz cungj dwg naj riunyumnyum naeuz “yungh gij seizgan lw roengzdaeuj neix, bang gyoengq lwgnyez guh saeh, neix mbouj dwg gienh saeh angq ha?” dawz bang bouxwnq dangguh saeh angq swhgeij, Vangz Denhhwngz roengzsim yungh cingz swnjcienz vwnzva Bouxcuengh.

Vangz Denhhwngz aeu dinfwngz son hawj hagseng doengzseiz, hix aeu gij raeuj hawj hagseng. Cawz cingqciengz rogdangz hozdung baiz- lienh cezmuz, de lij yungh ngoenz- singhgiz son’gyauq boux hagseng dinfwngz ak mbouj aeu cienz, lumj Loz Yinghvaz、 Vangz Lifangh daengj doengzhag ranzgungzhoj, de yungh gij cienz duiyouh swhgeij mbouj lai haenx bang gyoengq lwgnyez, bang gyoengqde gaijgez gij hojnanz saedceij. Geij bi doxdaeuj, de gagnyienh dang lauxsae ciengqgo Gingloz Siujyoz mbouj aeu cienz, bang gyoengq lwgnyez saedyienh aen fangzhwnz gyoengqde. Gij hengz- doengh、 gij simndei de ndaej daengz lingjdauj、 lauxsae hagdangz nem bohranz haengjdingh caeuq hagseng ndiepgyaez.

Gyoeb Laeb “Lwg Gingloz” Yisuzdonz

Vihliux engq ndei baujhoh caeuq swnjcienz vwnzva Bouxcuengh, Vangz Denhhwngz daengz Gingloz Siujyoz gienh saeh daih’it couhdwg gyoeb laeb Gingloz Siujyoz “Lwg Gingloz” Yisuzdonz. “Fwencuengh dwg vwnzva Bouxcuengh ndawde ceiq miz daegsaek, ca mbouj lai baugvat vwnzva Bouxcuengh gak fuengfueng mienhmienh, ndigah dou maqmuengh doenggvaq gyoeb laeb aen yisuzdonz baenzneix, daj lwgnyez hainduj, aeu vwnzva Bouxcuengh swnjcienz roengzbae.”Gangj daengz gyoeb laeb “Lwg Gingloz” Yisuzdonz, Vangz Denhhwngz gag miz yawjfap swhgeij. Youq duenh seizgan ngamqngamq gyoeb laeb yisuzdonz, Vangz Denh- hwngz mbouj goq swhgeij bi’ndwen geq le, ciengzseiz daiq bang “haj geq”(dwg ganbu geq、cansw geq、conhgyah geq、 lauxsae geq、lauzmoz geq) daj haet daengz haemh, youq ndaw hagdangz nyaengqnyinyi. Vih hawj hagseng doiq vwnzva Bouxcuengh miz yinx, Vangz Denhhwngz ciengzseiz caeuq hagseng ciengq damzraih、 guh- angq…… de aeu gij fwen gag bien gag yienj、 diuqfoux Bouxcuengh、 go Bouxcuengh、 vaiqbanj Vahcuengh, damzraih Bouxcuengh nem dijyuz Bouxcuengh、 gak cungj hongdawz Bouxcuengh、 gijgwn ndei Bouxcuengh daengj vwnzva Bouxcuengh yinx haeuj ndaw hagdangz、 yinx haeuj ndaw dangzgoq bae, hawj hagseng doiq vwnzva Bouxcuengh miz yinx; couzveh guh hagdangz “ranz langhbaij vwnzva minzsuz Bouxcuengh” caeuq “ranz langhbaij hongdawz gaeuq”, Vangz Denhhwngz daiqdaeuz sij sawiudaeuz, baenz ranz baenz ranz bae dungyenz, daiqdoengh bohranz caeuq boux- simndei gwnzbiengz giensoengq hong- dawz gaeuq, hawj hongdawz gaeuq bienqbaenz swhyenz dijbauj minzcuz vwnzva gyauyuz; vih banh ndei ciet hozdung swnjcienz vwnzva Boux- cuengh, Vangz Denhhwngz gyaban gyadiemj itmienh baizlienh itmienh caux sij, caengz daengz ndwen seizgan, de sij ok 《Hawj Lwg Mbanjcuengh Byaijcoh Seiqgyaiq》gohag Gingloz Siujyoz gig miz daegsaek Bouxcuengh、 yungh Vahcuengh、 miz cingznaek haenx、 《Cingz Rim Haeuxnaengj Haj Saek》 gocawjdaez ciet hozdung、 fwen daihhek、 fwen laeuj、 fwen soengqhek daengj.

Youq de daiqlingx lajde, “Lwg Gingloz” Yisuzdonz gveihmoz cug- yamq guhhung, daj yienzlaiz 12 boux hwngfat daengz 40 boux. Bi 2012, youq ciet yisuz minzgoh gozci Namzningz, bouxyienj iq yungh sim yienjciengq hot go Vahcuengh 《Cingzngeih Ciengxlwenx Mbouj Bienq》 youz Vangz Denhhwngz bien haenx, hawj yisuzgyah guek rog caemh daiz biujyienj haenx caeuq yienhciengz bouxyawj roxnyinh caengz raen gvaq gig mizyinx, yienhciengz bouxyawj cungj bekfwngz haenhndei, gak meizdij hix gig haenhndei. Vangz Denhhwngz naeuz:“Vihliux gij daengzcog minzcuz, dou guh hoj di mbouj suenq maz!” Goengfou mbouj nguh bouxmizsim, gohag Gingloz Siujyoz 《Hawj Lwg Mbanjcuengh Byaijcoh Seiqgyaiq》、 《Cingz Rim Haeuxnaengj Haj Saek》 youz Vangz Denhhwngz cujdauj caux sij haenx faenbied ndaej daihgouj、 daihcib gaiq daengx guek cungh siuj hagdangz yingjsi yisuz loih gim、 ngaenz ciengj.

Vih Saehnieb Vwnzva Boux- cuengh Okrengz

Ndaej daengz haenhndei, Vangz Denhhwngz cix mbouj dwg gag rimhoz gij cingzgvang baihnaj, cix dwg engqgya giendingh bae gyaepgouz vwnzva yisuz Bouxcuengh. De leih- yungh hagdangz binaengz banh ciet hozdung swnjcienz vwnzva Boux- cuengh guh caidij, mboujduenh gungganq guhhung aen doih “Lwg Gingloz” Yisuzdonz, lij cungdenj yenzgiu caeuq swnjcienz 《Foux- saegoeng Bouxcuengh》 doihyienjheiq Mbanjgingloz, soucomz caeuq caux sij Fwencuengh yenzswnghdai、 go Boux- cuengh、 vaiqbanj Vahcuengh、 diuq- foux Bouxcuengh daengj, gyoebbien baenz minzcuz yaubwnj sawsonhag, hawj yisuz vwnzva Bouxcuengh youq seiz gyauyuz sonhag ndaej engq ndei fatyiengz caeuq hwngfat. De vih ndaw yienh、 gak mbanj、 segih caux sij cezmuz caeuq son cezmuz 40 lai aen, sonyinx hagseng 200 lai boux mbouj aeu cienz. De ndaw sim cang rim saehnieb vwnzva Bouxcuengh, gizlawz miz aeu yungh gizlawz couh miz de. Binaengz vwnzyi daihcomzyienj, de cungj gaenxmaenx camgya, de vih Lingzsuij Segih caux sij diuqfoux ciengqgo “nauh seizcin dajndaem” caemhcaiq dang bouxdaujyenj; vih Sinhhingh Segih caux sij diuqfoux ciengqgo cezmuz “cingz rim haeuxnaengj haj saek” caiqlij bang baizlienh yienjok; vih Hungzlingj Segih bienbaiz diuqfoux 《Cingz Aen Faengx Angqfaengfaeng》 ndaej senj haeuj bi 2016 daengx guek segih vangjloz cunhvanj mingzdan. De lij lai baez sonyinx baizlienh Cung laux- nienz Yisuzdonz、Caijyaz Yisuzdonz、 Dunghfanghhungz Yisuzdonz daengj vwnzyi donzdij mbouj aeu cienz. Gij yiedcingz de mboujdan gyalaeg le cingzngeih caeuq gak bouxvunz yisuzdonz, caemhcaiq hoenghvuengh le saedceij vwnzva vunzlai.

Bi 2012 ndwen 9, ginggvaq vwnzva bumwnz caeuq ndawbiengz donzdij doengzcaez doigawj, daengx- cungq bingzveijvei veijyenz douzbiuq, Vangz Denhhwngz ndaej senj baenz “bouxvunz yisuz gamjdoengh Cung- guek bi 2012”. Bi 2015 ndwen 1 ndaej aen cwngheuh ndei Vujmingz daudwz mozfan haengj bang vunz mozfan daezmingzciengj.