11 nyied 19 hauh, Denzlinz Yen Lozlij Cin Denzbingz Cunh Mbanjveijyuz nauhyied dangqmaz. Meijgoz、Yeznanz、Laujvoh sam guek Yauzcuz beixnuengx gungh 23 vunz, daeuj daengz gizneix cetyawj, caeuq dangdieg vunzlai lienzvuen、yaenglwnh.

Gyoengqvunz Mbanjveijyuz daenj buh moq vaq moq,boq loxlez, eu fwen, dawz gij laeuj bonjfaenh gag ngauz haenx, youq bakmbanj laengz sam caengz, aeu “vanj ndeu seng、song vanj caen、sam vanj raen caensim”daeuj angqcoux beixnuengx dieggyae. Guh’angq seiz gyoengq Yauzcuz beixnuengx guekrog caeuq dangdieg vunzlai beixnuengx eu fwen, diuzdiuz cungj ndei dingq, sim caeuq sim doxgyau, itheij daem ceiz, caezgya yawj gij ndangdaenj doiqfueng, caez angq gvaq gij saedceij angqyangz neix.

Mbat hozdung neix, miz Gvangjsih Yauzcuz Yozvei、Swcigih Minzyijveij、Yinzda Minzcuz Gunghveij、Denzlinz Yenveij、Yen Minzcuzgiz daengj bumwnz lingjdauj camgya.

(Vangz Bizyen/黄碧艳）