Ngoenzlwenz Siujgangh yawj gou cauj byaek hawj daxgoeng, sawqmwh naeuz “Gou roxnyinh mwngz seizneix dwg youq boizcaiq” coenz vah neix. Gou nyengh le yaep ndeu, cam, vih gijmaz ne? De naeuz, doenghbaez daj hagdangz dauqma ranz, cungj dwg daxgoeng daxbuz cawj haeux byaek hawj sou, seizneix gyoengqde geq lo, vuenh daengz sou lo. Gou damz le gaemz heiq ndeu, ndawsim soemjsatsat, yaep lwgda yawj dwk denhvahbanj, gou dauqfanj maqmuengh ndaej yienghneix guh, hoeng, seizneix gaenq miz boux ndeu mbouj youq seiqvunz lo, gou siengj boiz, de hix mbouj ndaej daeuj gwn gij haeux byaek neix lo.

Seiziq, riuzsaet youq aen nungzcangz gvangq- langh Gvangjdungh haenx, gyoengq doih mwhhaenx, cij raen Siujgangh ceiq lai, gizyawz, caen dwg gag vunz gag dieg, mbouj miz saek di siusik lo. Geiqndaej baez daih’it raen daxgoeng daxbuz, dwg youq ndaw aen ranz gaeuq laepamq, mwhhaenx gyoengqde 60 lai bi. Daxbuz riuhoho, maeq dwk lwgda, daxgoeng angqvauvau, mbe dwk gij gokbak mbeuj haenx. Youq henz feizgiengz, gyoengqde naeuz:“Ahgez, dauqma la?” Coenz vah neix daj mwhhaenx hwnj couh buenxriengz gou ndaej cibgeij bi.

Mwh lij iq, ndaw naz mbouj dwk ywgajnon, duzgoep dauqcawq luenh diuq. Seizcin, fiengz haeuxnaz cug baenz yienghyenzcuih aen dem aen laeb youq ndaw naz, deihdwddwd. Daxgoeng baez bae cae naz, cungj daiq diuz faex youh saeq youh raez ndeu bae, senj nyangjfiengz bae, riengjvaiq dwk gaemdawz duz dem duz goep luenzlumlum haenx, roix baenz roix. Caj daengz mbwn yaek laep roengzdaeuj seiz, gwed fag cae yien duzvaiz, riuj roix goepbiz ndeu, doq byaij doq eufwen baema ranz. Mwhhaenx, cawj byaekhau gig noix ndaej cuengq youz, nohmou hix gig noix ndaej gwn, haeuxbieg cij gwn ndaej saek buenq bi lai, cujyau dwg gwn haeuxyangz gyaux miz mbameg haenx. Duix iq noh duzgoep ndeu, couhdwg gij byaek feih dangqmaz lo. Hoeng moix daengz miz nohgoep seiz, daxgoeng cungj dwg riunyumnyum, dawz gij nohgoep faen baenz song faenh, cienzbouh aeu hawj song beixnuengx dou, yawj dou gwnguk, lij nai dou naeuz, daxgoeng daxbuz cungj gwn mbwq lo. Cigdaengz doeklaeng, gyoengqde bi’ndwen engq geq lo, daengz donq haeux seiz ciuqyiengh lij sibgvenq dwk gangj “Daxgoeng daxbuz gwn mbwq lo” coenz vah neix, gou cij roxnyinh daengz, yenzlaiz gij doxgaiq ndei gwn, daxgoeng daxbuz cungj “gwn mbwq” lo, couhcinj dwg gyoengqde lij caengz ndaej cimz gvaq……

It、ngeih nienzgaep seiz dwg youq bakmbanj aen hagdangz iq haenx doegsaw, doegcaeux baez liux couh sikhaek buet ma ranz, daj henz feizgiengz hung coemh mokmou haenx gaeu gvaq gij maenz daxbuz gangq ndei haenx, youh buet bae gyausiz, dangqguh ngaizromh. Hoeng daxbuz youq mbwn ngamq wenjrongh seiz couh hwnqcongz coemh feiz lo, aen mbwn mwhhaenx, youq ndaw yinsieng cungj dwg mokfoenfoen, gyuemlumx dwk gij lwgndae longz mwi haenx, yawj mbouj raen bya gyae, yawj mbouj cingcuj faex gyawj. Geiq ndaej dan miz geij baez dwg daxgoeng coemh feiz, dwg aenvih daxbuz bingh lo. Mwhhaenx lij caengz miz dienh, banhaemh gyoengqde diemjdawz daengyouzhaeu, caez ronq byaek, caez cawj byaek, yiengj “gvangdang gvangdang”, boiqhab le geijcib bi, cang rim le gij fwen ndwenngoenz, gij cezcou soengswt ronghsag, gij sing’yaem ronq byaekmou caeuq iensei haenx, yiengjcaca, ciuznganga, lumjbaenz roegenq ciuz, lumjbaenz cingzvah maengxangq, ciuhvunz saedceij sinhoj, hoeng vuenyungz dangqmaz. Youq song cungj sing’yaem mbouj miz saek di doxdoengz ndawde, gou bungqdeng yinhyoz, hix gyaez hwnj gij yinhyoz goksadsad neix, hoeng cix mbouj miz banhfap ciengq okdaeuj, aenvih mwhhaenx gou lij oiq lai. Seizneix roxnyinh di, hoeng gyoengqde gaenq youq ndaw ndwenngoenz menhmenh geq bae geq bae……