lij coz seiz ndang cangq lumj duz vaizdaeg nei, vunz ndaw mbanj cungj naeuz danghnaeuz dahsau lawz daeuj haq hawj de guh yah, couhcinj dan baengh Goenghaj hwnj gwnz bya raemj fwnz gai, hix mbouj lau deng dungxiek.

Bihaenx, miz cungj saehcingz ndeu heuhguh gaemh bouxcoz, couh- dwg gaemh bae dangbing. Yenzlaiz mbouj gaemh vunz, dauq dwg nyaebgou, boux damengz cungj rox, haenx dwg baujcangj guh yienghceij hawj bouxwnq yawj, boux miz cienz ciengxlwenx nyaeb mbouj deng mbawceij sij miz cih “ding” haenx, hoeng bouxgungz mboujguenj dwg bouxlawz, cungj nyaeb deng mbawceij hawj vunz ga saenzdigdig. Boux nyaeb deng gou haenx mbouj nyienh bae dangbing, couh deng gaemh bae, gyaeng geij ngoenz gonq, caiq rag bae budui, boux deng rag bae haenx haujlai cungj lix mbouj raen vunz, dai mbouj raen seihaiz.

Ngoenzhaenx, mbwn bumzbwd- bwd, rumzbaek cihuhu. Baujcangj riengz geij boux hak daeuj daengz laj gorungz hung gyaeujmbanj, yaep he roq laz yaep he roq gyong, gauj ndaej ndaw mbanj luenh dangqmaz, hoeng mbouj raen miz vunz daeuj humx. Ndaek dang bing ndeu yut cungq coh gwnzmbwn nyingz geij baez, vunz ndaw mbanj cij danqheiq naiqnuek- nuek daeuj, gyoengqde hozndat dwk cimyawj gyonglaz aeu mingh boux- vunz.

“Gak boux beixnuengx, baihnaj hoenxciengq gig youqgaenj, ngoenz- neix baihgwnz ma daeuj ciu vunz bae dangbing, maqmuengh daihgya miz cienz ok cienz, miz rengz ok rengz!” Baujcangj lumh aen daeh, riuhihi dwk naeuz. Ndaek vunz lumj boux hak haenx coh vunz ndaw mbanj laeb- cingq, gingqlaex, naeuz:“Guekgya deng nanh, bouxboux cungj miz cwzyin! Souh baihgwnz minghlingh, ngoenzneix gou daeuj mbanj raeuz ciu bing, maqmuengh daihgya roengzrengz cihciz!”

Gyoengqvunz caemlwglwg, ciep- dwk couh miz vunz gangj lo. Miz vunz naeuz, bibi ciu bing, bae le mbouj raen miz geij boux dauqma! Miz vunz naeuz, bae dangbing youh mbouj dwg bae hoenx bingcaeg Yizbwnj, dauq dwg bae “gyaep caeghoengz”, vunz swhgeij hoenx vunz swhgeij, dub dai cungj mbouj bae! Miz vunz naeuz, mbouj bae, ndaej lwi? Mbouj ndaej ha！

Yenznaeuz gangj, lij ciuq banh- fap gaeuq, nyaebgou. Mbouj doengz dwg, bineix lwgdog gien cienz mbouj yungh nyaeb. Goenghaj dwg lwgdog, hoeng ndaw ranz gig gungz, mbouj miz cienz hawj baujcangj, couh deng nyaebgou lo.

Baizdoih nyaebgou. Cijraen Goenghaj fwngz gvaz gaem aen ceijduenz ndeu, menhmenh mbe hai, aen cih “ding” ingj haeuj najda gyoengqvunz, seizhaenx daxboh Goenghaj gyad naengh youq gwnz dieg mbouj baenz vunz lo, daxmeh Goenghaj gvih youq boux hak baihnaj, daej dai daej lix, cuengq sing dwk naeuz:“Bouxhak ha, mwngz guh saeh ndei ha! Dou couh daeglwg neix ndwi, lij maqmuengh de daeuj ciengx dou ha! Mwngz couh langh de ba!”

Cijraen boux hak ndeu baez vad fwngz, boux bing ndeu gaem fagcax hung ndeu ndwn youq laj gofaex, boux hak naeuz:“Mbouj bae dangbing hix ndaej, hoeng deng raemj lwgfwngzyinx baihgvaz bae!” Sing’yaem mbouj hung, hoeng hawj vunz baez nyi gig siengsim.

Gyoengqvunz cungj fatok gij sing’yaem cici, cungj yawj Goenghaj. Goenghaj naeuz:“Cungcig caeuq hauq- swnh song cungj neix nanz ndaej caezcienz, hoeng seizneix aen cungcig neix mbouj aeu cixbah.” Ndaek hak naeuz:“Yienghneix mwngz couh guh boux vunzfeiq ba.”

Goenghaj iet fwngzgvaz okbae, dawz lwgfwngzyinx cuengq youq gwnz heng, naj mbouj bienq saek di naeuz:“Daeuj ba!”

“Dangh!” Fagcax baez raemj, lwgfwngz mbin deuz lo, gij lwed sinz seiqhenz, Goenghaj nyaenx gij in, haeb heuj yiengj gyaggyag dwk, saemxsaemx saxsax byaij bae geij yamq, ngunh laemx youq gwnz dieg. Ngoenzhaenx, daegmbauq ndaw mbanj deng gaemh bae cibgeij boux, cijmiz Goenghaj mbouj deng. Vunz ndaw mbanj cungj daejsasa, bouxhak caeuq baujcangj muenxeiq dwk byaij deuz lo.

Baezlaeng, Goenghaj hwnj bya dwk nyaen raemj fwnz, hauqswnh bohmeh.

Cinjbi gaijfang bihaenx, miz aen duivuj gwed mbaw geiz gwnzde miz fagliemz caeuq fagfouj byaij gvaq mbanj raeuz, gyoengqde hoenx dujhauz, faen nazleih, youq gwnz ciengz sij “Hoenx baih fanjdungbai, aeu gwzming guh daengz daej!” Ndaw mbanj nauhyied ndaej lumj gvaq ndwencieng nei.

“Bouxhak, sou gou ba! Gou siengj riengz sou bae nauh gwzming!” Goenghaj gaem fwngz boux bing ndeu couh naeuz. Boux bing naeuz:“Mbouj ndaej, ginhdui dou mbouj aeu bouxndangcanz, gangjnaeuz mwngz dwg boux lwgdog dem.” “Gou miz rengz, gou nyingz cungq mbouj ndaej, hoeng gou ndaej bang sou cawj ngaiz gwed lwgmax!” Gij vah Goenghaj gig miz rengz.

“Doengzdoih, budui dou miz gijliz, lwgdog mbouj ndaej daeuj dangbing!” Budui lingjdauj naeuz. Goenghaj naeuz:“Guekgya miz nanh, bouxboux miz cwzyin!” Doeklaeng, lingjdauj gaem fwngz Goenghaj maenh dwk naeuz:“Mwngz ha, couh ndeindei youq ndaw ranz hauqswnh bohmeh ba!” Gvaengzda Goenghaj dumz lo.

Duivuj haidin seiz, Goenghaj ciep gvaq gouh haizbaengz daxmeh ngamq nyib, riengz laeng duivuj, gyaeuj hix mbouj ngeux byaij bae lo.

Goenghaj