Denzdungh Yen Siengzcouh Cin Cunghbingz Cunh doengh bi neix daeuj haenqrengz cauxguh lajmbanj moq seveicujyi daegsaek yienhda, ciuq ndaw cunh saedcaeq bae guh, baenz benq baenz doengh ndaemganq gocoeng, ietnangq daiqdoengh Bwz- du、Siengzcouh、Sibingz doenghgij cunh henzgyawj neix ndaemganq gocoeng 1.2 fanh moux, bingzyaenz moix ngoenz sou coeng gai 20 fanh dun, gai daengz daengx guek gak dieg, guhbaenz yiengh ginghci gocoeng “cunh ndeu cungj ndeu” daegsaek yienhda haenx, vunzmbanj souhaeuj ndaej demlai, saedceij bi beij bi ndei. Baenzneix gonqlaeng aeundaej daengx guek cunh guhyiengh “cunh ndeu cungj ndeu”、Guengjsae aenmbanj ndaem gocoeng ceiq lai、daengx guek aenmbanj guhyiengh minzcuj fazci doenghgij mingzdaeuz ndei neix.

Cunghbingz Cunh dieg youq hamq baihnamz rangh Dahyou- gyangh, gungh miz 8 aen mbanj sengcingz 21 aen cunhminz siujcuj, gungh miz 750 ranz 3300 lai vunz. Bi 2004 ndaw mbanj hainduj yinxhaeuj gocoeng seiqgeiq Guengjdoeng, riengzlaeng ndaemganq bi beij bi lai. Vih hawj hongsaeh ndaemganq gocoeng mingzdaeuz ndei souhaeuj lai, aen cunh neix laebbaenz le gocoeng nungzminz ciennieb hoz- cozse, cucwz le gocoeng binjbaiz sanghbyauh, doiq hong ndaemganq gocoeng saedhengz doengjit dajveh、doengjit cehfaen、doengjit gisuz、doengjit binjbaiz、doengjit siugai, hawj gij gocoeng ndaw cunh ok haw gai ndaej bieng gai ndaej ngaenz, hawj hong ndaemganq gocoeng engq hoengh, geij bi gvaqbae daengx cunh ndaem gocoeng dabdaengz 5000 lai moux, moix ngoenz ndaej gai gocoeng 20 dun doxhwnj, gai daengz Baekging、Sanghaij、Gvangjcouh、Vujhan doenghgij hawsingz hung neix. Dan gai gocoeng hangh neix daengx cunh vunzmbanj moix bi moix vunz bingzyaenz cinghsouhaeuj mauhgvaq fanh maenz, bi 2012 couh dabdaengz le 12158 maenz, ndaej baenz Denzdungh Yen aen mbanj ceiq fouq ndeu.

Seizneix, Cunghbingz Cunh ranzranz cungj guh le ranzlaeuz moq, guh miz diengzhaex biucinj, vunz- mbanj gangj veiswngh, gagrox youq najranz laengranz ndaem gova gomak, hawj ndaw mbanj heuswd gyaeundei; ndaw mbanj laeb miz nyapnyaj ngoenznaengz camhbeujdaeh, cingj 4 boux vunzmbanj beuj nyapnyaj; ndaw mbanj lij vatcaep le 2 aen daemz caeng raemxuq guh daihsaw, raemxuq ngoenznaengz daihsaw bae 91% doxhwnj, yiengh mbanj caez- cingj cinghseuq; ndaw mbanj doxgaiq giekdaej caezcienz, gak aen mbanj luengqhongh aeu suijniz bu, ranzranz ndaej yungh swlaizsuij; hangzhaw dajgai、bouqcauhsi、ranz yawjsaw、ranzyawjbingh、ranzbaijcuengq、daiz- heiq、lanzgiuzcangz doenghgij goeng- gungh doxgaiq neix miz caez; ndaw mbanj laeb miz “saeh lajmbanj ndaw mbanj banh” fuzvucan, vunzmbanj mbouj yungh ok mbanj couh ndaej cwngcau ndaw mbanj banh、boujdiep ndaw mbanj lingx、nungzswh ndaw mbanj cawx、gisuz ndaw mbanj hag、saenqsik ndaw mbanj cam、bingh mbaeu ndaw mbanj yw、doxdawz ndaw mbanj cek; bingzseiz vwnz dij hozdung guh ndaej hoengh, heiqgoengsae riuzmingz gij mbanj gij yanghcin henzgyawj.

Ranzlaeuz moqsup yiengh gingj gyaeundei, caemh yinx hekyouz haeuj mbanj daejniemh saedceij angqyangz lajmbanj, geij bi neix daeuj Cunghbingz Cunh bienqbaenz le dieg gyaeundei nungzyez yawjgingj ndeu, Yizliengz Hangzyin Suhniuj Gunghcwngz guhsat caeng raemx le, najdah Dahyougyangh hopngomx gij mbanj Cunghbingz Cunh haenx bienq gvangq haujlai, couh lumj aen huz hung ngaeugoz ndeu nei; gij reih gocoeng henz hamqdah vang’vet camca、nda miz gij gyongjraemx gag byoq dwkraemx haenx, baenz fog baenz benq heuswdswd, heiqhom biumbin, gyoebbaenz fuk dozveh yiengh gingj doenghnaz gyaeundei ndeu, yinxvunz raixcaix.