Ahnez dwg bouxvunz Mbanjmbwk, bineix 38 bi. Gwnz ndang Ahnez ciengz daiq miz fouq ginhgiz he, baez ndaejhoengq de couh iu doih youq gyang mbanj dwkgeiz. Ndigah, gyoengqvunz heuh de guh ginhgiz duicangj. Ahnez dwkgeiz gig ak, ciengzseiz ndaej hingz.

Ndaw mbanj miz cibgeij bouxsai, ndawde cibgeij bi daengz 50 lai bi cungj miz. Gyoengqde lwg mbouj maex, ok haex dauq youh gwn, ciengz caeuq Ahnez dwkgeiz, roxnaeuz iu Ahnez bae dienhbya diemjgoep gwn siuyeh.

Bineix ndwensam miz ngoenz he, Ahnez sawqmwh bungz raen Augit. Augit ngamq duiyiuh dauq ranzmbanj ndaej geij ngoenz. Ahnez iu Augit dwkgeiz. Augit hix dwg boux geizyinx he, couh caeuq Ahnez youq gwnzdieg dwk ginhgiz. Dwk song mbat le, mbouj faen saw hingz, caen dwg ak doiq ak. Mbat daihsam, gyoengq saimbwk daeuj le, raen Ahnez saw lo, cungj swenj hwnjdaeuj:“Hu! Duicangj saw lo!” Ahnez naj nding naeuz:“Swenj gijmaz, mbouj miz boux saw baenzlawz miz boux hingz daeuj? Sou ak lai daengz sou daeuj dwk.”

Gvaqlaeng, vihliux lai ndei dwkgeiz, Augit doiq Ahnez naeuz:“Youq gwnzdieg mbouj ndei dwkgeiz, dawz daizeij okdaeuj youh mbouj fuengbienh, raeuz caep song aen daizgeiz ndei lwi? ”Ahnez angq naeuz:“Ndei, ranz gou miz cien、sa、suijniz. Mwngz cawx song gaiq cienmeng dauq couh ndaej lo.” Doeklaeng, song boux de youq laj gofaex henz giuzcangz caep ndaej song aen daizgeiz. Guh baenz le, Augit aeu camx bae siuq lohsienq ginhgiz geizciengh, lij aeu bit youzndaem veh ndei. Yienghneix, fwn conx mbouj bae lo. Augit lij bae hamz ndaej song aen daizdiet daemq dauq guh daizgeiz, youh cawx 8 fouq Ginhgiz、2 fouq geizciengh caeuq geij aen giuz dauq. Hawj geij boux daegcoz boux dawz fouq geiz caeuq aen giuz ndeu. Gyoengqde gig angq, baez ndaejhoengq couh bae geij aen daiz haenx dwkgeiz. Ndit ndat roxnaeuz doek fwn, couh aeu daizdiet laj daizgeiz bae dwk. Augit caeuq Ahnez ciengz doxiu daeuj dwkgeiz. Mizseiz, Mbouj miz vunz youq henz, Augit doiq Ahnez naeuz:“Vunzwnq gangj mwngz baenzlawz dwk, mwngz gaej saenq bw, cungj saenq vunz gangj mwngz couh saw, byaij yamq loh ndeu aeu ngeix sam ngeix seiq gonq……” Ahnez naeuz:“Deng, baezlaeng gou mbouj saenq gyoengqde luenh gangj lo.” Augit caeuq boux ndeu dwkgeiz seiz, de cungj daj gak fuengmienh daeuj daezsingj gyoengqde aeu haeujsim gijmaz. Gyoengq daegsai gig maij caeuq Augit dwkgeiz. Aenvih Augit miz ien ndei coemh, gig ndei gangj, daeng nyiuz vunz de couh nyiuz, hingz mbouj baeh vunz, saw mbouj fatheiq, youh rox gangj vahriu.

Seizhah, sou miuz lo. Miz ngoenz he, Liuzseiq aeu vaizdiet rag ci duhdoem ndeu dauq daengz ndaw mbanj, de baez raen Augit couh dingz ci roengzdaeuj heuh Augit aeu duhdoem. De angq naeuz:“Augit, gig docih mwngz! Geij bi gonq, gyoengq geizyinx neix baez ndaejhoengq mbouj miz maz guh, couh bae caegmiuz、ciemz duhdoem、euj haeuxyangz、saz duhheu、coemh maenz yiuz…… Gomiuz ndaw mbanj mbouj rox saet bae geijlai bw. Bineix, gyoengqde ndaejhoengq couh ngeix dwkgeiz dwkgiuz, doenghgo ndaw mbanj mbouj raen saet di ndeu, gyaeujreih sing ndaq hix mbouj dingqnyi lo.” Augit riu naeuz:“Neix couhdwg gou vihmaz iu Ahnez guh daizgeiz bw. Docih mwngz, gou mbouj aeu duhdoem mwngz. Gou bae iu Ahnez gyoengqde dwkgeiz gonq.” Gangj sat, song boux de riugwkgwk hwnjdaeuj.