Daeglij ngamq okbae mbouj geijlai nanz, Bohgiuj couh heuh Mehmauz daeuj, dawz faenh baujyenj habdoengz hawj de, daengq naeuz: “Gou miz di saeh yaek okdou bae geij ngoenz, caznaeuz geij ngoenz dem caengz dauq ranz, mwngz couh dawz faenh caizliuh neix hawj Dahgiuj, gij yozfei bae dayoz haenx couh youq ndaw caizliuh neix caez lo.” “Gij caizliuh neix dwg maz, ndaw miz hauhneix lai ngaenz?” Mehmauz cam. Bohgiuj naeuz:“Daengz mwhhaenx mwngz gyau hawj Dahgiuj, hawj de bae ra Daeglij aeu ngaenz couh baenz, hauhneix, gou bae gonq lo.” Gangj liux couh byaij ok dou bae lo. De menh byaij menh dauqyawj aen ranz swhgeij, youh gveng coenz vah ndeu hawj Mehmauz:“Mwngz caeuq Dahgiuj naeuz, itdingh hawj de roengzrengz doegsaw, de banneix majhung lo, roxsoq lo, ranz miz saeh maz hix rox dajleix lo.” Mehmauz dingqnyi gij vah neix couh riu hwnjdaeuj, naeuz:“Ok baez dou ndeu gangj baenzlai vah bae, lumjbaenz mbouj dauqdaeuj nei, cuengqsim.”

Bohgiuj okdou bae mbouj geijlai nanz, Daeglij couh muengzfwdfwd buet dauq daengz dou ranz Bohgiuj, “dung dung dung” dwk roq aen bakdou. Mehmauz dingqnyi couh byaij daeuj, naeuz Bohgiuj gaenq okdou bae banhsaeh, miz saeh maz couh caeuq de gangj gonq. Daeglij naeuz de haxbaenh youq ranz Bohgiuj ciem habdoengz, banh liux Bohgiuj gikdoengh lai de dingj mbouj ndaej couh okbae, byawz rox lumz aen baugunghvwnz youq ranz Bohgiuj lo. Mehmauz swnhbienh couh dawz ok gij caizliuh Bohgiuj hawj Daeglij yawj, lij naeuz:“Haxbaenh Bohgiuj hawj gij neix hawj gou, de naeuz danghnaeuz gvaq geij ngoenz dem de caengz dauq couh hawj Dahgiuj aeu gij caizliuh neix bae caeuq mwngz lingx ngaenz, mwngz banneix youq gizneix, bang gou yawj neix dwg maz?” Daeglij ciep gij caizliuh daeuj yawj, dwg habdoengz baujyenj ha! Ngamqngamq gyau ngaenz, baenzlawz ndaej lingx vaiq lai? Couh cam Mehmauz naeuz dauqdaej ok maz saeh. Mehmauz hix mbouj rox baenzlawz gangj, couh lwnh gij vah Bohgiuj haxbaenh caeuq de gangj haenx hawj Daeglij nyi caez. Daeglij dingqnyi liux, naemj yaep ndeu, fwt couh diuq hwnj heuhnaeuz: “Liux lo liux lo, yaek ok saeh hung lo, vaiq, vaiq, heuh Bohgiuj dauqdaeuj!” Mehmauz yienznaeuz mbouj rox yaek ok maz saeh, hoeng raen Daeglij vueng baenzneix bae, hix ndang saenz caez, de naeuz de hix mbouj rox Bohgiuj bae gizlawz, cij rox vix baih gyaeujmbanj, naeuz Bohgiuj couh swnh aen yiengq haenx byaij bae. Daeglij lumj deng feiz byaeu laenghaex nei, muengzfwdfwd coh gyaeuj mbanj buet bae lo.

Daeglij buet daengz henz goengloh gyaeuj mbanj, cingq raen Bohgiuj ndoj youq laeng gofaex hung ndeu, seizhaenx miz aen ci ndeu cingq hai gvaqdaeuj. Daeglij cung daeuj daengz sikhaek umj Bohgiuj maenhmaenh bae, heuhnaeuz:“Guh neix mbouj baenz bw, guh neix mbouj baenz bw!” Bohgiuj siengj cak okbae, hoeng Daeglij dailix mbouj cuengq. Gvaq yaep ndeu, gyoengqvunz mbanjranz daeuj daengz lo, Daeglij naeuz Bohgiuj siengj bae daemj ci.

Gvaqlaeng, gyoengqvunz cij rox, Bohgiuj siengj hawj ci daemj dai bae, yienzhaeuh hawj Dahgiuj bae aeu ngaenz yivai baujyenjginh, yienghneix couh gaeuq de bae doeg dayoz lo.

Yenzlaiz, Bohgiuj daj bae yinzhangz rox miz yiengh baujyenj neix liux, couh menhmenh naemj lo, de rox dahlwg de gauj ndaej dayoz, yozfei yienzbonj couh lai, daengz mwh bizyez okdaeuj ra hong guh youh yaek yungh haujlai ngaenz dem, de naemj bae naemj dauq, roxdaengz cij gauq de boux vunz ndeu youq ranz guh hongnaz, yienghlawz cungj canh mbouj ndaej haujlai ngaenz. Simsoz cawx faenh baujyenj neix, aenvih faenh baujyenj neix danghnaeuz ok yivai deng dai, baujyenj gunghswh couh ok 15 fanh ngaenz boiz.

Rox gij saeh neix liux, Daeglij gaem fajfwngz Bohgiuj naeuz:“Au- giuj ha, gungz maz cungj gungz mbouj daengz aeu mingh bae vuenh ngaenz ha, mwngz guh neix mbouj doiq bw, caznaeuz baujyenj gunghswh caz rox, caemh mbouj ndaej ngaenz bw! Dahgiuj gauj ndaej dayoz, mbanj raeuz vunz bouxboux haenh caez, caen miz maz hojnanz, vunzlai doengz daeuj bang, mwngz guh yienghneix, Dahgiuj rox liux hix ciuhvunz sim mbouj net nw!” Gyoengqvunz mbanjranz cungj doengzcaez daeuj naeuz Bohgiuj, Bohgiuj cungjsuenq caem roengzdaeuj lo.

Daeglij dauq bae daengz yinz- hangz, lwnh gij saeh neix hawj gyoengq doengzsaeh nyi, gyoengqde bouxboux deng gij saeh boh vih hawj lwg hwnj dayoz nyienh bae dai gamjdoengh caez. Laeng aen yinzhangz Daeglij gietdingh, hawj Dahgiuj daigvanj ngaenz bae doegsaw, mbouj sou leihsik.

Ngoenz Dahgiuj bae yozyau haenx, haujlai vunz mbanjranz daeuj soengq de hwnj hojceh. Gyoengq vunz haenx haujlai boux mbouj roxnaj cihsaw, daengz hojceh cam gizlawz dwg giz niemh biuq, gizlawz dwg giz hwnj ci cungj mbouj rox, hoeng, gyoengqde maqmuengh cihsiz, cungj saenq aen dauhleix daj ciuhgeq daengz ciuhneix mbouj loek ndeu: Cij miz cihsiz, rox gaijbienq minghhoen.

（sat）