11 nyied 10 hauh, Fuconh Minzcunghgiz youq Sinhvaz Yangh Dagingj Cunh banh “Fuconh minzcuz doxgiet cinbu cauxlaeb haeuj Mbanjyauz” baenzdauq hozdung.

Baez hozdung neix haiguh siujsoq minzcuz conzdungj dijyuz doxdax、 vwnzyi comzyienj、minzcuz cwngcwz senhconz gyauyuz daengj hozdung. Hozdung seiz, doenghgij dijyuz doxdax bau aendomq、 sam vunz haizgieg raez daengj hozdung mizyinx haenx, ndaej daengz yienhciengz bouxyawj bek- fwngz haenhndei. Gyoengq beixnuengx Yauzcuz daj Mbanjyauz daeuj haenx baijyienj le gij vwnva gofoux Yauzcuz gaeuqgeq、 nyuenz miz haenx. Beix- nuengx Yauzcuz ciengq hwnj le gij go ndeidingq, diuq fouxgyongraez Yauzcuz, yungh cungj fuengsik vunzlai haengjgyaez neix, cienzdap gij ciengzmienh saedceij nem gij siengj- muengh caeuq gouz saedceij gyaeu- ndei beksingq Yauzcuz.

Baez minzcuz doxgiet cinbu cauxlaeb hozdung neix, vih vunzlai Mbanjyauz daiq daeuj gij minzcuz cunghgyau cwngcwz cihsiz caeuq siujsoq minzcuz vwnzva cihsiz mbouj caengz raen gvaq nyi gvaq haenx, gikfat gij yiedcingz vunzlai Mbanjyauz. Yinx ndaej vunzlai Yauzcuz gak mbanj doxceng daeuj camgya, caenh’itbouh gyagiengz gij yisiz gak cuz ganbu vunzlai doengzcaez haenqguh, comz- giet gij naengzliengh ndei minzcuz doxgiet.

(Dwng Vangzyi/邓黄玉 Lij Lingz/李 玲)