Mbanjyinzlungz ing bya dep raemx, seiqhenz byasang hophumx, rangh bya doxdaeb doxlienz lumj- baenz duzlungz nei duz riengz duz ngiengx gyaeuj bongh mbin; gyang mbanj dwg Byasiujcinghsanh, laj dinbya raemxdaemz sawyau faexgeq daemx mbwn, doxingj doxdaengh; henz mbanj gomak baenz ndoeng, godauz gomaenj, miz sang miz daemq, baenz bi seiq geiq mak homfwtfwt. Ndaw mbanj seizneix lij louzce miz geijcib aen ranz gaeuq seiz Ciuhmingz Ciuhcingh hwnjguh haenx, cienheu、vaxmong, aenranz hunggvangq, yienghsiengq gaeuqgeq miz daegsaek, dwg Guengjsae raeuz aen mbanj miz ranz gaeuqgeq louzce henhoh ndaej haemq ndei ndeu, dwg yienghndei mbanj gaeuqgeq Lingj- namz.

Mbanjyinzlungz caemh heuhguh Mbanjsiujcinghsanh, dieg youq baih- doengbaek Libuj Yen Majlingj Cin geij goengleix gyae haenx, youq Ciuhsung satbyai couh hainduj hwnj- guh. Riuznaeuz Ciuhsung Yinzcungh vangzyou haj bi (1053 nienz) Diz Cingh daiq bing daengz baihnamz hoenx bingfanj, ciengginh ranz Yangz daih daihsam Yangz Vwnzgvangj capbing youq rangh Byasiujcingh- sanh, gyoengq bing raen dieg neix mbwn raeuj gingj gyaeu, couh youq laj Byasiujcinghsanh guh ranz youq sanj daihlaeng, cugciemh baenz mbanj. Aenvih aenmbanj dep Gamj- yinzswj aen conghgamj okmingz neix, caiq gyahwnj ndaw mbanj dingzlai vunz dwg singq Lungz, aenmbanj couh heuhguh “Mbanjyinzlungz”. Ndaw mbanj gaeuq seizneix lij louzce miz aenmiuh gaeuq、laeuzdou gaeuq、luengqhongh gaeuq、daizhoenzfeiz、aenmoh bouxyinghyungz hoenx bing Fazgoz Cinz Gyah doenghgij rizgaeuq neix. Cinz Gyah Ginen’gvanj couh youq henz roen ndaw mbanj, dwg aen ranz gaeuq Ciuhcingh seiz Genzlungz hwnjguh ndeu, naj ranz daengj miz aen siengqdoengz Cinz Gyah (gunghyenz 1839-1885 nienz).

Byaij haeuj laeuzdou gaeuq le, cix dwg diuz roenbenjrin iq seuq- cingh ndeu, song henz roen miz baenz aen baenz aen ranz gaeuq ndoj youq laj raemh faex geq, yienghsiengq gaeuqgeq gyaqciq, hawj vunz rox- nyinh lumjbaenz byaij haeuj le seizdaih Ciuhmingz Ciuhcingh. Ndaw mbanj seizneix lij miz bet aen ranz gaeuq seiz Mingz Cingh hwnjguh haenx, yiengh ranz cungj dwg ranzseiqhab, aenranz sangvid, baenz caengz baenz gek, baizlele daengj youq; faqciengz aeu rindiuz caep giek, cienheu caep daengz dingj, vaxmong hoemqgang, baihndaw ranz aeu faex benj gekfaen guh sam fungh, dou cueng deu va; gyanghongh aeu benjrin bubingz, ngaeuzngub seuq- cingh, yienghsiengq ndeiyawj. Gij luengqhongh ndaw mbanj, aeu benjrin bu baenz, aeu ngeuqrin、rinmaxluenx gop bien, seuqcingh、caezcingj、caemdingh. Ndaw mbanj gungh miz luengqhongh cibngeih diuz, moix diuz luengqhongh cungj guh aen dou ndeu, daengx mbanj gyoebbaenz aen dijhi ndaej gung- hoenx ndaej hensouj ndeu.

Baihbaek aenmbanj, dwg benq raemx gvangqyub ndeu, henz daemz miz aen loekraemx hung gaeuqgeq ndeu, dwg lajmbanj Cungguek cungj hongdawz dwkraemx ceiq gaeuqgeq ndeu lo, ciuq goenggeq ndaw mbanj gangj, gizneix nyuenz miz aen ranzdajnienj loekraemx baenq ndeu, haujlai bi gaxgonq aenvih aenranz vaih lai lid bae lo, seizneix caenh louz roengz aen loekraemx neix.

Byaij ok aenmbanj, riengz diuz roenbenjrin mbaeklae bin doxhwnj, caenh raen byongh bya miz haujlai conghgamj gak cungj gak yiengh aen hung aen iq, saekseiz hix raen miz lwgnyez comz youq ndaw conghgamj guhcaemz. Bin daengz gwnz dingjbya, raen miz benq diegbingz ndeu humx dwk hawj vunz yawj gingj, miz vunz nyaengq dwk baihneix yawjyawj baihhaenx ngonzngonz, caemh mbouj dingz dwk ingjsiengq louzniemh. Yawj roengz laj dinbya, Mbanj- yinzlungz youq ndaw faexheu loq raen loq mbouj raen; ngonzyawj seiqhenz, Byasiujcinghsanh raemx sawyauyau faex heuswdswd hop- humx, ndeiyawj raixcaix, hawj vunz roxnyinh lumjbaenz haeuj daengz le diegsien nei.