Gyanghwnz, gij vahojlungz gwnz yangzdaiz dingjlaeuz laeglemx hai lo. Yienznaeuz dwg vunz lajmbanj, hoeng caengz raen gvaq gij yiengh vahojlungz, couh lumj lwgnyez ndaw singz nei, gwn gvaq haujlai nohmou, cix caengz raen gvaq duzmou byaij roen ityiengh.

Vahojlungz hai ndaej gig gyaeu, limqva hausek, simva maeqoiq, gij yiengh de lumj aen lajbah iq nei gyaeundei .

Gou baengh gij rongh dendungz yawj vahojlungz. Naemj haujlai nanz, gou lij mbouj cingcuj dujva baenzneix hung, aen mak daj gizlawz maj okdaeuj. Gou raen geizheih, ganjgip buet ma ndaw rug, hwnj vangj cazyawj.

Yienzlaiz, vahojlungz vaboux vameh caemh duj ndeu, mauh gvaq vasim biujmienh dwg vaboux, daemq gvaq vasim biujmienj dwg vameh, danghnaeuz mbouj miz duznon daeuj raih, couh yaek aeu vunz daeuj coengh cienz vafaenj, yienghneix cij ndaej dawzmak.

Gwnz vangj sijsaeq gaisau gij banhfap aeu vunz cienz faenj haenx. Gou gig angq, lumj gip ndaej gaiq dijbauj nei, sim siengj: Mbwn baez rongh, gou couh hawj vahojlungz dang “maexnoiz”, doengh va cienz faenj, cauh ok geij aen makhojlungz gyaeundei daeuj.

Hwnzneix, lumj gvaq ndaej daegbied vaiq, ngamq ninz ndaej ndiu ndeu, couh ngaiz sing roeg rog cueng cauz singj lo. Gou bazlaz roengzcongz, dawz hwnj gaiq ciemfaiq caeux couh cinjbi haenx, buet hwnj gwnz yangzdaiz dingjlaeuz bae.

Hai dou ok yangzdaiz bae, raq heiq rang ndeu cung haeuj ndaeng daeuj, rang daengz ndawsim bae. Daih’it baez roxnyinh, gij va gwnz yangzdaiz daegbied caenciet, swhgeij lumj byaij haeuj ndaw suenva iq bae nei. Vahojlungz gwnz gyaq, hai ndaej daegbied sien, daegbied rongh……

Gij fajfwngz gou dawz ciemfaiq lij caengz dep vahojlungz, couh sawqmwh yawjraen geij duz rwi mbin bae mbin dauq, gyoengqde “yingying vwngvwng”, youq gwnz vahojlungz ciensim aeu faenj.

Gou geizheih raixcaix, youq aen singz iq neix, cawzliux vunz vanzlij dwg vunz, rwi daj lawz daeuj? Caemhcaiq gyanghwnz ngamq hai geij duj va, cungj deuz mbouj gvaq ceh da duzrwi! Gou naemj aiq dwg va caeuq rwi bonjlaiz couhdwg gig maedcaed, miz va itdingh miz rwi, miz rwi itdingh miz va, gyoengqde ndawsim doxdoeng, ciengxlwenx mbouj liz. Mboujnex, va hai rwi daeuj, couhdwg gij gveihliz daswyenz lo.

Gou ndwn youq henz, maz cungj mbouj guh, maz cungj hix mbouj ndaej guh, dinghdingh cimyawj gij rwi gaenx aeu faenj neix, dingq gij sing va hai……