Daj ngoenz ndeu Bohgiuj bae yinzhangz geij mbat liux, de vunz couh bienq lo, daengxngoenz cungj caemlwdlwd mbouj gyaez gangjvah, hongranz caemh noix guh lo, gag boux vunz ndeu naengh youq bakdou ranz “ba ba ba” dwk ndoet iendoeng. Ndwen ndeu roengzdaeuj, de naj henjhwk, ae’gopgop, vunz yawj hwnj- daeuj fuemfwk caez. Geij boux vunz caeuq de doengz aen mbanj haenx yawj mbouj roengzbae lo, daeuj daengz ranz de doiq de naeuz, caznaeuz ndaw hoz mbaet miz gij saeh maz couh gangj okdaeuj, vunzlai rox doxdag baenzlawz guh, mboujnex caiq yienghneix roengzbae, swhgeij ndonj haeuj lajnamh bae dauq ndei, hoeng dahlwg couh yaek bae hwnj dayoz lo, mbouj yungh daengz mwh dahlwg bizyez okdaeuj ra ndaej hong ndei seiz, gienh saeh daih’it couhdwg bae biufaenz daxboh lo. Bohgiuj baez dingqnyi gangj neix, song diuz bwncaeuz couh coh cungqgyang gyonj bae, gij hoenzien gien riengz gien daj gaeubak mauh ok. Hoeng, mboujlwnh gyoengqde yienghlawz gangj, Bohgiuj cungj lumj ndaek rin deng byaj bag mbouj dek ndeu nei, mbouj gangj mbouj coenz.

Gangjnaeuz Bohgiuj, caen doek- caw dahraix, 30 bi cij miz dahlwg ndeu, mehyah youh aenvih nanzseng dai bae dem. Bohgiuj caeuq Dahgiuj doxbaengh gvaq ndwenngoenz, yienz- naeuz ranz hojnanz di, hoeng Dahgiuj roxsoq, mwh hwnj siujyoz it nienzgaep couh rox gag cawj haeux cawj byaek, soengq bae reihnaz hawj boh gwn. Bohgiuj baez gwn gij haeuxbyaek dahlwg guh haenx, hanh dumzcupcup hix mbouj raen naiq, gij nyaeuq gaeuda siu haeuj fajnaj riu bae caez. Bohgiuj ciengzseiz caeuq gyoengq- vunz mbanjranz naeuz, Dahgiuj couhdwg minghgaen de, buekmingh hix yaek soengq de bae doeg dayoz, hawj de gajlaeng saedceij gvaq ndaej ndei.

Dahgiuj mboujfouq boh de maqmuengh, daj siujyoz daengz gauhcungh, cingzcik bibi baiz haeuj baihnaj. Bineix gauhgauj cingzcik gig ndei, gauj ndaej Bwzgingh aen dayoz ndeu. Gyoengqvunz mbanjranz cungj naeuz baezneix Bohgiuj miz fuk lo. Bohgiuj baez dingqnyi cungj riu ndaej heujhenj gingz ok naengbak daeuj, ndawsim angqvauvau.

Byawz rox, banneix Bohgiuj bae mbat yinzhangz dauqdaeuj, vunz couh bienqbaenz gudog bae.

Ngoenzneix, Daeglij boux ndaw mbanj youq yinzhangz guhhong miz saeh dauq ranz, Bohgiuj rox liux gig gikdoengh, mbouj caj Daeglij daengz ranz, de couh sam yamq byaij guh song yamq muengzfwdfwd buet daengz gyaeuj mbanj, rag fajfwngz Daeglij gangj neix gangj haenx.

Vunz ndaw mbanj raen Bohgiuj ndwen lai neix daeuj cungj mbouj gangjvah, baenzlawz baez raen Daeglij couh vah lai baenz hauhneix, siengj mbouj doeng, couh caj daengz Bohgiuj caeuq Daeglij gangjgoj sanq bae liux caiq bae cam Daeglij. Daeglij naeuz, Bogiuj naeuz yaek faenz cibgeij go faex baihlaeng ranz de bae gai. Gyoengqvunz couh naeuz, faenz faex miz maz lau hoj, heuh gyoengqvunz mbanjranz bae bang couh baenz lo, haengjdingh mbouj dwg vih gij saeh neix. Daeglij raen bouxboux gvansim Bohgiuj caez, couh naeuz, Bohgiuj yaek gai gij faex haenx bae, canh ndaej di ngaenz bae cawx faenh baujyenj ndeu. Yenzlaiz Bohgiuj mbouj siengj lwnh gij saeh neix hawj vunz nyi.

Cawx baujyenj? Gyoengqvunz dingqnyi cungj doeksaet caez. Daeglij naeuz, ndwen gonq ngoenz ndeu, Bohgiuj bae yinzhangz lingx ngaenz, ngamj bungz daengz baujyenj gunghswh caeuq yinzhangz doxgap gai faenh baujyenj ndeu. Bohgiuj raen vunz baizdoih lingx ngaenz lailai, couh bae caeuq gyoengq gai baujyenj haenx gangjgoj, doeklaeng couh siengj cawx faenh baujyenj ndeu lo. Dingqnyi Daeglij gangj gij saeh neix, gyoengqvunz cungj siengj mbouj doeng vihmaz Bohgiuj yienghneix guh.

Ngoenz daihngeih, geij boux lauxyoux Bohgiuj couh hwnj ranz Bohgiuj bae. Bohyoz naeuz:“Bohgiuj ha, Dahgiuj yaek bae dayoz lo, yozfei lai dangqmaz, mwngz mbouj ce cib- geij gofaex haenx hawj Dahgiuj guh yozfei, yaek bae cawx baujyenj guhmaz ne? Nanzdauh mwngz lij mbouj siengj hawj Dahgiuj bae doeg dayoz ma?” Vah neix baez gangj ok, Bohgiuj naengbak miz di saenz lo. Mehmauz nyaenx mbouj ndaej couh roengzrengz gangj okdaeuj:“Bohgiuj ha, mwh mehyah mwngz dai, gou youq henz de bw, de daengq gij vah haenx banneix lij lumjbaenz yiengj youq henz rwz gou bw, de cengj ok baez heiq dauqlaeng naeuz, hawj mwngz soengq lwg doegsaw……” Mehmauz caengz gangj liux, raemxda couh doek roengzdaeuj lo.

Bohgiuj yawj hwnjbae naj lumj hwnjgeuq nei, simsoz mbit naj hawj henz bae, mbouj gamj yawj gyoengqvunz, yienzhaeuh gveng coenz vah ndeu okdaeuj:“Sugvah gangj ndaej ndei, lwgmbwk haq vunz liux couh baenz lwg ranz wnq lo, mwngz lij muengh de dauqdaeuj ciuqgoq gou daengz geq dem? Gou geq lo, gangj mbouj dingh ngoenzlawz ninzndaek le couh hwnq mbouj ndaej lo, banneix cawx baujyenj, daengz mwhhaenx lij miz di baujyenjginh goq vunz ram bae haem!”

Geij boux lauxyoux dingqnyi Bohgiuj gangj gij vah neix, yienznaeuz miz di doiq mbouj gvaq dahlwg de, hoeng hix