□ Cinz Cwngz Cau Cauh ingj

Dwzbauj Yen Cuzyungz Cin Nazlieng Cunh Mbanjnazleiz yienz- naeuz liz yienhsingz cij miz cibgeij goengleix gyae, hoeng aen mbanj miz 72 aen ranzcanx vax gaeuq neix mbouj cab miz saek aen ranzlaeuz suijniz, louzce yiengh ranzcanx rin guh giek faex benj guh ciengz guh bam gang vax haenx ndaej caezcingj, aeu seizdaih seizneix daeuj gangj caen mbouj raen miz geijlai aen.

Mbanjnazleiz dieg youq gwnz aen bo henz roen yienhsingz daengz Yungzvaz Yangh ndeu, daj giz gyae yawj bae, ndaw mbanj miz roek caet coij ranzcanx, ing bo hwnjguh, baenz mbaek bin doxhwnj, baenz caengz baenz coij. Naj mbanj cix dwg Dieggumh Nazlieng namh bizbwd haenx, Dahgensuij ngutngeuj con gvaqbae, cungqgyang nem seiqhenz dieggumh miz hagdangz、dienhcamh caeuq aenmbanj, ranzlaeuz ndeiyawj baenz benq baenz gyoengq gyoeb- baenz fuk veh gyaeundei ndeu. Byaij haeuj Mbanjnazleiz, gij roen ndaw mbanj dingzlai dwg aeu ndaekrin bu baenz, gwnz rin gaenq deng muz dwk ngaeuzngubngub. Ca mbouj lai ranzranz najranz cungj baij cuengq miz aenrumrin hunghung iqiq haenx, mbangj lij baij miz ruqrin gueng mou、vaiz、max、gaeq bit haenx, hawj vunz yawjraen le dauqngeix gij saedceij gaxgonq. Ranzranz cungj aeu gij rindiuz ginggvaq gyagoeng haenx caep baenz mbaeklae, itbuen cungj miz cibgeij mbaek doeng daengz gwnz bam vunz youq haenx; mbangj ranz lij aeu rindiuz ma guh begdou, daengz seizneix lij mbouj hed bae saek di, ndeiyawj youh naihyungh. Moix aen ranzcanx cungj dwg rin namh faex habgap baenz gyaqgvaengh, daejgiek aeu diuz saeurin sang lumj boux vunzhung nei daemx hwnjdaeuj, gyaqgvaengh faex onjdwt dwk gaq youq gwnz saeurin, faqciengz aeu namhnding cuk baenz, guhbaenz aen ranzcanx faex gwnz gyang laj sam caengz ndeu; moix aen ranz dangqnaj cungj aeu donghrin roxnaeuz dongh- faex dingjdaemx guh baenz aen canxdak ndeu, mbangj lij geij ranz lienz baenz benq doxcaemh yungh. Ciuq goenglaux ndaw mbanj gangj, gij ranz aen mbanj neix aen ceiq gaeuq haenx gaenq miz baenz song bak bi lizsij. Bi 2008 gyoengqvunz aen mbanj neix gaenq senj bae daengz aen mbanj moq ranzlaeuz ranz suijniz henz goengloh haenx youq, aen mbanj gaeuq ranzcanx vax liz mbanj moq ngamq bak lai mij gyae neix vunzmbanj couh aeu daeuj gyaeng doenghduz roxnaeuz cuengq doxgaiq cab, baenzneix yiengh gaeuq aen- mbanj couh ndaej caezcingj louzce roengzdaeuj.

Seizneix, Dwzbauj Yen gaenq doenghfwngz bae baujhoh caeuq coihcingj gij yiengh gaeuq ranzcanx Mbanjnazleiz, yaek aeu benq ranzcanx vax gaeuq neix guh bingz- daiz, haenqrengz unglaeb gij hong- saeh miz daegsaek daegdiemj dang- dieg haenx, haifat hongsaeh daegsaek baijyienj vwnzva Bouxcuengh、daej- niemh gijgwn gijninz lajmbanj、suenmak reihbyaek mbaetsou doengh gijneix, guh hung guh ak ranzcanx Bouxcuengh vwnzva lijyouz binjbaiz, gyagiengz lijyouz banggungz, daiq- doengh gyoengq vunzlai henzgyawj doenggvaq camgya guh gij hongsaeh neix demlai souhaeuj, cingqcaen souh’ik ndaej vut gungz baenz fouq.