Aen Hoihnaenghdamz Dauqyawj 10 Bi Aumwnz Suijden Gunghvei

Daengz Guengjsae Gien Cienz Banghag Youq Namzningz Banh

□ bonjbauq gicej Cau Dwzfeih/赵德飞

10 nyied 29 hauh banringzgvaq, aen hoihnaenghdamz dauqyawj 10 bi Aumwnz Suijden Gunghvei daengz Guengjsae gien cienz banghag youq Namzningz banh. Swcigih Gyauyuzdingh Minzcuz Gyauyuzcu cucangj Veiz Lanzmingz, Swcigih Cungj- gunghvei Doiqrog Lenzlozbu bucangj Lij Yiyungj, Aumwnz Suijden Gunghvei gien cienz banghag gyauhliuzdonz nem mbangj boux hagseng ndaej daengz bang cienz gvaq youq Namzningz doegsaw、 guhhong haenx daengj camgya hoihnaenghdamz.

Gwnz hoihnaenghdamz, Veiz Lanz- mingz angqcoux gyoengq bouxsimndei Aumwnz Suijden Gunghvei daeuj daengz. De naeuz, Aumwnz Suijden Gunghvei 10 bi daeuj laebdaeb gien cienz bang cungh siuj hagdangz dieg gungzhoj Guengjsae gig mbouj yungzheih, Guengjsae gyauyuz bumwnz gvaqlaeng yaek laebdaeb haeuj- coengh guh ndei faenh hong neix, bouxsimndei Aumwnz Suijden Gunghvei gien cienz banghag, itdingh cingzdoh coicaenh dieg gungzhoj gyauyuz hwngfat; doenggvaq simndei banghag bingzdaiz, hawj engq lai vunz roxyiuj gij cingzgvang vwnzva gyauyuz Guengjsae caeuq Aumwnz, hawj engq lai vunz miz cienz haenx ndaej bangcoh dieg gungzhoj, gaijndei gij gyauyuz diuzgienh dieg gungzhoj, doengzseiz hix gyagiengz le Guengjsae caeuq Aumwnz vwnzva doxgyau doxrox, coicaenh song mbiengj vwnzva hwngfat.

Gyoengq hagseng ndaej bang gvaq camgya hoihnaenghdamz haenx doxlwnz gangjvah, gyo’mbaiq gyoengq bouxsimndei bangcoh gyoengqde, caemhcaiq gangj daengz gij simcingz mwh ndaej iucingj bae Aumwnz guh doxgyau hagsib, cungj naeuz youq seiz doxgyau hagsib hag ndaej cihsiz gig lai, hawj swhgeij yawj ndaej engq gyae, doiq saedceij hagsib、 guhhong swhgeij gig miz yungh; naeuz gvaqlaeng aeu ndeindei hagsib、 guhhong, guh boux vunz doiq gwnzbiengz mizik he, vih gwnzbiengz guh ok gungyen, yungh neix daeuj gyo’mbaiq gyoengq bouxsimndei bang gvaq gyoengq- de haenx. Mbangj bouxsimndei camgya hoihnaenghdamz haenx hix gangj ok gij maqmuengh swhgeij, muengh gyoengq hagseng ndaej bang gvaq haenx ndeindei hagsib、 guhhong.

Lij Yiyungj cujciz hoihnaenghdamz caiqlij guh cungjgez gangjvah.

Ciuq cam rox, aen gunghvei neix miz sim haeujcoengh gyauyuz goeng’ik saeh- nieb cungh siuj hagdangz dieg gungzhoj Guengjsae, 10 bi daeuj, giensoengq 300 lai fanh maenz ngaenz yinzminzbi hawj cungj siuj hagdangz dieg gungzhoj yungh guh laeuzsonhag hwnjguh、bang hagseng gungzhoj, lai baez giensoengq doxgaiq sonhag caeuq saw, caemhcaiq iucingj 8 buek 200 lai boux hagseng、 lauxsae maenhndei siujsoq minzcuz Guengjsae daengz Aumwnz guh “simndei hagsib lijyouz” doxgyau hozdung.