Youq lajdin Byacinghsiu, miz aen gunghyenz ndeu, heuhguh Cinghsiuhuz Gunghyenz. Byaij haeuj gunghyenz, doiqnaj dwg aen huz ndeu, rumz baez ci daeuj, hawj vunz roxnyinh sim sangj raixcaix. Gizneix baengh bya henz raemx, bya heu raemx saw, raemxrij laesisi mbouj dingz, va gyaeu mak hom, gingjsaek daengx bi seiq geiq cungj lumj seizcin; gizneix swyienz swnghdai vanzging baujhoh ndaej gig ndei, raemxhuz sawdikdik, duzbya baenzgyoengq youz. Mboujdanh baenzneix, aenvih ndaw huz maj miz gyoengq go’ngox caeuq gohaz, yinx daeuj haujlai roeghanqbuengz daj baihbaek mbin daeuj gizneix gvaq seizdoeng. Neix engqgya yinx ndaej gyoengqvunz daeuj ngonz aen funghgingj gyaeundei neix.

Banhaet, youq Cinghsiuhuz Gunghyenz, nditndat ciuq youq boux daeuj lienhndang haenx, caiq dingq gij roeg ciengqgo, simcingz engq hailangh, hawj vunz daiq daeuj maqmuengh, lumjbaenz diendeih fanh yiengh cungj singj gvaqdaeuj. Najhuz raemxdingh mbouj miz fubfab, boux daeuj lienhndang caeuq gingjsaek ndaw huz yungz baenz daengxcungq, hawj vunz gamj daengz caemrikrik.

Banringz seizhaeuh, aenhuz dwg gizdieg yietliengz gig ndei ndeu. Seizhah banringz ndawsingz ndat ndaej hawj vunz hojsouh, baez byaij haeuj ndaw gunghyenz neix, couh ndaej yiengjsouh cingliengz. Doenghgo cungj hawj hoengheiq bienq ndaej engqgya moqsak, moix baez supheiq couh lumj dwg doiq aen bwt bouxvunz guh aen mizyangj anmoz ndeu. Youq ndaw gunghyenz menhmenh byaij hop ndeu, naengh roengzdaeuj yawjngonz doenghgo youq nditndat lajde angqlangh, doiq gyoengqvunz youq ndawsingz swngh- hoz gig nanz daeuj gangj, dwg aen diendeih linghvaih ndei ndeu.

Banhaemh, nditndat cugciemh bienq liengz, najhuz bienq ndaej dinghrikrik, mwhhaenx couhcinj dinghdingh dwk naengh roengzdaeuj yawjngonz najhuz, hix gamjdaengz ndawsim gig angq. Danghnaeuz dwg banhaemh ngamq doek fwn sat, daengngoenz dauqcungz ingj youq najhuz, gij liengzsangj seizneix hawj vunz engq sangj. Daengngoenz cugciemh roengzbae lo, cij youq gwnz najhuz louz roengz caemrwg, mwhhaenx, ndaw huz daegbied lengj, najraemx ingj ok aen daengngoenz banhaemh, hawj vunz gamjdaengz unqswnh……

Gij faex henz huz hix dwg ndaw gunghyenz aen funghgingj ndei ndeu, riengz dienheiq caeuq nditndat bienqvaq, yienh’ok yienghsiengq gak cungj gak yiengh. Youq henz gofaex laep da sup gaemz heiq ndeu, caiq cugciemh hai da, daengx ndang cungj ndaej cuengqsoeng. Aen gunghyenz neix gaenq saedyienh daengxcungq loegvaq, youq ndaw neix hawj vunz ndang sangj sim angq.

Cinghsiuhuz lij dwg gizdieg ndei lienhndang ndeu. Youq laj goliux lienhndang, diemheiq ndaej yangjgi engq lai, lienhndang yaugoj ndaej gya boix. Baez cengq da yawj ndaw gunghyenz, miz haujlai vunz lienh- ndang, caemhcaiq ndaej ngonz gingjsaek gyaeundei, ndaej lienh- ndang youh ndaej cuengqsoeng, neix hix dwg aen yienzyinh bouxyouz senj daeuj youz aen gunghyenz neix.

Cinghsiuhuz Gunghyenz vanzlij dwg aen suen gyoengq roeg angq youq dem, gyoengq roeg ndaw faex seizseiz angq dwk ciengqgo, lumj mbouj rox baeg mbouj rox you nei. Bouxyouz laep da dingq roeg ciuz, gamjsouh gij dijbauj daihswhyienz daiq daeuj. Youq ndaw gunghyenz duzroeg caeuq bouxvunz ndaej caemh youq giz ndeu, bouxyouz ginggvaq hix mbouj yingjyangj duzroeg angqyangz dwk ciengqgo, neix couhdwg bouxvunz caeuq swhyienz doxhuz caemhyouq.

Youz sat Cinghsiuhuz, hawj vunz ndaej ngonz aen funghgingj gyaeundei ndeu, yiengjsouh baez simcingz soeng sangj ndeu.