Cien congh bak da,

Cungj dwg caemh goek.

Haet haemh sam bienq,

Doeng raeuj hah liengz.

Sam doeng rengx mbouj mboek,

Haj bi dumh mbouj hoemq.

Mboq bauj dwg eiqmbwn,

Ginhvaz daengz neix dingh goek mboq.

Swz gwnz neix daihgaiq eiqsei dwg: Dieg youq Bingzgoj Yen Seiq- dangz Cin Yinsanh Cunh Mbanj- gumzva miz aen Mboqlingzmbwn, dwg cien bak congh mboq dengj okdaeuj hab baenz. Riengzlaeng dienheiq bienqvaq, raemxmboq bienqbaenz nding、henj、loeg、aeuj daengj haujlai cungj saek, moix cungj saek gvaq geij ngoenz hix mbouj doiqsaek. Aen mboq neix doeng raeuj hah liengz, mboujguenj aen dieg neix rengx rox dumh, hix mboujguenj rengxdumh seizgan raezdinj, gij raemx cungj dwg yienghde mbouj bienq.

Vah gangj Sungdai Gyanghsih Swngj Gizan Conhgih Gizsuij Yen Mingzguz Cunh Lij Cicaih gauj ndaej gyazbangj, guh Fuzgen yisij. Yah de heuhguh Liu Ginhvaz. Aenvih gij ginhdui Yenzcauz hoenx Namzsung, goeng’yah deuz daengz Guengjsae Gveilinz、Liujcouh caiq daengz Vujmingz henz Mboqlingz ndoj youq. Yah Lij Cicaih Liu Ginhvaz seizhaenx nienzgeij gaenq laux lo, de fatyienh Mboqlingz doeng raeuj hah liengz, gingjsaek hab vunz caemhcaiq miz lingzheiq, couh gietdingh youq henz Mboqlingz coihndang, de gangjboq naeuz gvaq:“Gou coihndang baenz sien liux itdingh ra raen gij goek Mboqlingz.” Riengzlaeng de yaek dai seiz, bouxfugsaeh de cam:“Fuhyinz, gij goek Mboqlingz youq gizlawz?” De naeuz:“Gou dai liux mwngz dawz hab ndokdaeuh gou venj hwnj aen hoz duzmax gou bae, byonghhwnz gwih hwnj duzmax, fad duzmax mbat bien ndeu, hawj duzmax buet, duzmax youq gizlawz daengx, gizhaenx couhdwg gij goek Mboqlingz.” De dai liux, bouxfugsaeh couh ciuq gij vah de gangj, byonghhwnz haidin, yaek ranzrongh seiz cingqngamj daengz Luegmboek、 Da’giu、 Giuya sam aen mbanj neix mbaenq roencamca he, duzmax baenq hop ndeu daengx roengzdaeuj, ngiengxgyaeuj coh mbwn rongx mbat raez ndeu. Bouxfugsaeh naemjnaeuz daengz aen dieg fuhyinz gangj lo, de youq gwnz max doq yawj seiqhenz, sawqmwh duzmax bongh coh baihsae, daengz henz ngauq rin hung he daengx roengzdaeuj, iet hoz gwn gij raemxmboq heiqfwifwi. Youq duzmax ngaemgyaeuj gwn raemx seizde, aen hab ndokdaeuh fuhyinz venj youq hoz max doek roengz conghmboq bae lo, bouxfugsaeh doeksaet yat, fanndang roengz max diuq roengz ndaw mboq bae, siengj vez aen hab ndokdaeuh fuhyinz, sikhaek byajraez byajmig, mbwn bi deih saenq, diendeih laep- nyamq, rumzfwn doxgyauz, raemx- mboq dengj hwnj lumhlumh, boux- fugsaeh deng bau daengz gwnz ngamhbya bae. Bouxfugsaeh byaengq- da litlit yawj duzmax gaen rumz coh baihbaek buet deuz. Raqrumz raqfwn gvaqbae, mbwn gvengqliuliu, fanhfaed hoizheiq, bouxfugsaeh baez singj gvaqdaeuj couh gipgipmuengz- muengz dawz fag giemq okdaeuj, youq ndaek rin hung gwnzde deu “Gumzva daengz mboq lingz neix” 6 cih. Aenvih gij rin deu miz gij cih neix, ndigah aen mboq youq gizhaenx miz mbanj couh heuhguh “Mbanj- gumzva”, aen mboq couh heuhguh “Mboqlingzmbwn”.

Doeklaeng Bouxfugsaeh daek aeu huz raemx ndeu couh ciuq gij rizdin duzmax daeuj fandauq Mboqlingz. De doq veh doz doq byaij dauqma, yienzlaiz duzmax byonghhwnz molaep daj Mboqlingz haidin mbouj dwg cigsoh byaij okdaeuj, dwg van gvaq haujlai dieg cij daengz gizhaenx. Bouxfugsaeh yungh 8 ngoenz seizgan cij dauq daengz Mboqlingz. Gaengawq gij lohsienq duzmax byaij gvaq veh doz, bouxfugsaeh ciuq gij fueng- yiengq duzmax bae couh geiqguh “Majsanh”, aen mboq hab ndokdaeuh fuhyinz doek couh geiqguh “Duh’anh”, siengj daengz neix cienzbouh dwg gij cauva fuhyinz couh geiqguh “Dava”. Dauqdaej duzmax gaengawq maz ra daengz gizhaenx, bouxfugsaeh hix siengj mbouj doeng, hoeng fuhyinz gaenq cangq youq mbaenq goek raemx Mboqlingzmbwn, gyoengq goengdaeuz cijndei gaij “Mboqlingz” baenz “Raemxlingz”. Vahcuengh “raemx” Vahgun heuhguh “suij”, doeklaeng “Raemxlingz” couh gaij baenz “Lingzsuij”. Ndigah, gij coh Lingzsuij、Dava、Duh’anh、Majsanh couhdwg yienghneix daeuj, caemhcaiq itcig daj seizhaenx yungh daengz seizneix.