Youq bien singz miz aen mbanj he heuhguh Mbanjcab, miz 600 lai vunz. Gij vunz Mbanjcab cungj dwg daj seiq mienh bet fueng comz daeuj, dingzlai dwg co ranz youq. Mbanjcab miz boux he heuhguh Hozci, 40 bi, ndaenggiuz haemq gvangq, dwg boux fouz laeuj mbouj baenz donq ndeu. Gij vunzhung Mbanjcab cungj dwg bae ndaw singz guh hong dajcaep, dan Hozci bae sou haizliengz vaih, ngoenz bae laeuq ndaej 80 maenz baedauq.

Mbanjcab mbouj miz vunz rox Hozci daj gyawz daeuj, miz mbouj miz lwgmaex, cij rox de lij miz boh, baizban heuhguh Goengdaih, gaenh 70 bi lo. Bi’gvaq, raen Hozci baema ranzmbanj mbat he.

Mbanjcab miz vunz guh ndaej ranzmoq、aeubawx、haq lwg、lan rimndwen、lwgnyez gauj ndaej dayoz roxnaeuz bizyez le haeuj ndaej danvih、bouxlaux gvaqseiq daengj cungj guhlaeuj. Miz haujlai vunz naeuz:“Cingj youh gyangz, mbouj cingj youh raemhfangz. Nanz gangj ha.” Moix mbat vunzmbanj cingj laeuj cungj noix mbouj ndaej heuh Hozci. Hozci yinx laeuj youh gwn ndaej, byawz cingj de cungj bae gwn. Mizseiz, youq henz daizlaeuj boux vunzseng roxnaj Hozci, gvaqlaeng cingj laeuj hix heuh de. Ndigah, youq aen singz gaenh Mbanjcab miz geijlai aen diemqlaeuj, gizlawz haeuxbyaek ndei gwn, Hozci cungj rox. Gak aen diemq bouxcawj hix roxnaj Hozci caez. Hozci daeuj Mbanjcab youq le, ngoenzlawz bae gwn laeuj, gwn maz laeuj, de cungj geiq youq bonj sawbouh he.

Bineix, miz ngoenz he, Hozci bae gwn laeujgyaeu goenggeq he rim 80 bi. Dauq ranz le, de dawz bonj bitgeiq daeuj yawj, baez yawj, couh doeksaet. De suenq ok gaenh 4 bi daeuj, moix bi cingh bae gwn laeuj couh yungh bae 8000 lai maenz. De sim gig nyap: Yienghneix roengzbae nanz guh bw. Hai, nanz aeu ndaej dauq ha. Hei, bohvunz 80 bi cingj laeuj, boh gou rim 70 bi hix ndaej guhlaeuj lo…… Ngeix daengz neix, de sikhaek dawz soujgih okdaeuj dwk.

Ngoenzhaenx, boh Hozci rim 70 hopbi, Hozci cingj laeuj lo. Gij vunz gaxgonq guh laeuj cingj de cienzbouh cingj daeuj. Boh de naengh youq ndaw ding aen diemqlaeuj he, caencik baengzyoux daeuj le, cungj hoh de:“Fuk lumj daihhaij, gyaeu lumj goengqbya!” Gangj sat, couh gyau hoengzbau hawj Hozci lo.

Daihgya gwn ndaej caetcaet betbet seiz, sawqmwh soujgih boh Hozci naeng lo, miz vunz ra de. De heuh boux ra daeuj ndaw diemq nyaemq laeuj gonq. Yaep he, boux ra daeuj daengz ndaw diemq. De baez raen boh Hozci couh naeuz:“Goengseiq, byawz cingj mwngz daeuj neix gwn laeuj?” Hozci siengj lanz hix mbouj ndaej lo. Caezgya dingq le gig doeksaet:“A? Neix mbouj dwg Goengdaih? Mbouj dwg boh Hozci?” Boux haenx naeuz:“Mbouj dwg bw, Goengdaih boh Hozci, bi- gvaq gvaqseiq lo.”Caezgya dingq le, bouxboux caengz yawj Hozci. Hozci naj nding bak aj ngoemxngod, song fwngz dawz aen daeh cang hoengzbau ndaetndaet bae. Caen dwg: Ciq vunz guh laeujgyaeu, cienz gwn laeuj ndaej ma, saetlaex youh saetgah, mbouj miz naj raen vunz.

Gvaqlaeng, Hozci baez bungz raen “boh” de, naj gag nyaenq, daengx ndang mbouj cwxcaih, gyae raen gyae bienq deuz. Daihgya caiq hix mbouj cingj Hozci bae gwn laeuj lo.