Vangz lauxsae yienghlawz cungj ndei, hoeng beizheiq miz di gaenj, baengh ceiqheiq guh saeh. Youq ndaw yozyau, Vangz lauxsae hwnj sam aen ban yinghyij, lij dang aen ban banhcujyin ndeu, gunghcoz nyaengq ndaej lumj aen gyangq baenq nei.

Yaucangj naeuz:“Siuj Vangz ha, mwngz gunghcoz nyinhcaen dwgrengz, gou yawj ndaej raen, mwngz haenqrengz bae guh, gihvei dwg hawj boux gaenx guhhong.” Vangz lauxsae lumj nyouq daengz maz nei, gangj:“Yaucangj miz maz saeh couh gangj ba! Gou guh ndaej itdingh guh.” Yaucangj naeuz:“Aen singhgiz baihlaj miz boux yinghyij lauxsae ndeu cingjgyaj bae seng lwgnyez, mwngz haeb heuj caiq dingj aen ban dem. Baenz mbouj baenz?” “W! Ndei! Mbouj youqgaenj!” Vangz lauxsae naeuz.

Vangz lauxsae engq nyaengq lo, baenzngoenz hwnjdangz caeuq gaij cozyez, mbouj ndaejhoengq saek di. Gyanghaet cawj rek souh ndeu, caiq cawj di byaek couh gwn ngoenz ndeu. Bouxcoz caen ak, ninz hwnz ndeu, ngoenz daihngeih baez iet hwet, couh lumj duz vaiz iq nei, rengz dangqmaz.

Vangz lauxsae ngoenznaengz anqseiz hwnjban, mbouj cingjgyaj, gaij cozyez caeuq gaujgenj, 4 aen ban yinghyij cingzcik baeznaengz cungj ndaej mingz daih’it. Gyoengq lauxsae cungj naeuz:“Siuj Vangz dwg boux lauxsae ndei ha! Vunz lauxsaed, gyauyoz cingzcik hix mbouj loek! Cungj vunz neix couh wnggai ndaej daezswng!” Vangz lauxsae swhgeij hix gamjdaengz dang lingjdauj aen yozyau hix ndei ha! Bouxcoz ha, miz gihvei couh lai guh di, duenhlienh swhgeij.

“Vangz lauxsae, mwngz gunghcoz nyaengq lai lo, sinhoj lo!” Yaucangj naeuz.

“Mbouj miz maz, lij dingj ndaej!” Vangz lauxsae naeuz.

“Ndei!” Yaucangj haenh.

“Lij miz maz gunghcoz aeu gou bae guh, mwngz couh anbaiz ba!” Vangz lauxsae naeuz.

“Bangunghsiz noix boux gansw ndeu, mwngz daeuj guh ba, hoeng banhcujyin caeuq 4 aen ban yinghyij mwngz lij aeu laebdaeb guh.” Yaucangj naeuz.

“Ndei!” Vangz lauxsae naeuz.

Gij cizcwz bangunghsiz gansw dwg bang lauxsae yaenq swhliu, bang lingjdauj sij vwnzgen, nyaengq seiz baenz ngoenz baenz hwnz, mbouj nyaengq seiz hix youq ndwi. Hoeng gya banhcujyin gunghcoz caeuq 4 aen ban gyauyoz gunghcoz, Vangz lauxsae gaenq dwgrengz lai lo. Vangz lauxsae guh gansw le, aenvih cinjbi gaujsi, youh dwg haggeiz satlaeng, aeu yaenq swhliu gig lai, lingjdauj aeu cungjgez caizliuh hix lai. Vangz lauxsae nyaengq ndaej mbouj miz seizgan saeg buh cawj haeux.

“Siuj Vangz, mwngz dwgrengz lai dou cungj rox, dou cinjbi daezswng mwngz lo.” Yaucangj naeuz.

“Daezswng gou guh maz?” Vangz lauxsae naeuz.

“Camhseiz mbouj lwnh mwngz nyi. Mwngz haenqrengz bae guh gunghcoz ba!” Yaucangj naeuz.

Gij hong caiq dwgrengz, hix bae guh ha! Yaucangj gaenq gangj gvaq aeu daezswng gou! Vangz lauxsae youq ndawsim swhgeij gag ngeix.

Haggeiz sat hai cungjgezvei. Yaucangj naeuz:“Yozyau raeuz aeu daezswng boux lauxsae coz ndeu daeuj dang yozyau lingjdauj. Gou doeg mingzcoh song boux lauxsae hawj caezgya daujlun, yaep he couh douzbiuq.” Aen sim Vangz lauxsae lumj duzdouq nei diuqyetyet. Dauq- daej caj daengz ngoenzneix lo.

Yaucangj doeg mingzcoh Mauz lauxsae caeuq Dwng lauxsae liux, caezgya couh haicij douzbiuq lo. Vangz lauxsae nyinhnaeuz swhgeij dingq loek lo, yawjraen bouxwnq youq gwnz ceij sij mingzcoh mbouj dwg Mauz lauxsae couhdwg Dwng lauxsae, cij rox yenzlaiz mbouj miz swhgeij. Aen sim Vangz lauxsae liengz daengz caekhaex bae. Vihmaz yienghneix ne? Aen gezgoj neix hawj vunz gig doeknaiq.

Ngoenz daihngeih, Vangz lauxsae ra yaucangj naeuz:“Lingjdauj, aenvih gou naengzlig miz hanh, mbouj miz banhfap guh gij hong banhcujyin caeuq 4 aen ban yinghyij, youh guh banhgunghsiz gansw dem, cingjgouz aen haggeiz baihlaj cij hwnj song aen ban yinghyij.”

Yaucangj naemj yaep ndeu cij naeuz:“Ndei! Doengzeiq gij yauhgiuz mwngz.”

Vangz lauxsae hozndat dwk yaek byaij ok bangunghsiz yaucangj, dingj- lingz bungz deng fujyaucangj gip dwk byaij haeujdaeuj, fujyaucangj ndaw fwngz gaem aen geb vwnzgen, vwnzgen doek youq gwnz dieg. Vangz lauxsae gungj hwet bae gip hwnjdaeuj, yawjraen vwnzgen biudaez sij dwk: Gij cingjsi baugau gvendaengz doi Vangz XX guh fujyaucangj. Vangz lauxsae seizneix da dumz lo. Aen mingzcoh couhdwg de, hoeng ceiz lo.

Yaucangj naeuz:“Bouxcoz ha, dou caj mwngz baenzvunz di gonq.”

Vangz lauxsae ngaez dwk ndwn youq bakdou, haujlai nanz cij lizhai.