Gaenh geij bi neix daeuj, Fuconh Yauzcuz Swciyen aeu hwngfat iengangq dangguh hangh ginghci canjnieb youqgaenj bouxguhnaz vut gungz baenz fouq、 nungzyez laisou he, yungh gak cungj banhfap, sonyinx gujli vunzlai gaenxmaenx hwngfat iengangq canjnieb, gya’gvangq diuz roenloh vunzlai laisou, gyavaiq doidoengh yamqdin cingcinj bangrex daengx yienh, rengzbang vut gungz gunggeng.

Vih coicaenh daengx yienh iengangq maenhndei、 gauhyau hwng- fat, Fuconh mboujduenh gyahung ak nungz leih nungz cwngcwz ligdoh, vih ranz ndaem ien daezhawj doxgaiq swnghcanj, nem conhyezva ganq golwg、 gihgi dajndaem、 gangq hawq、 faengaep daengj fugsaeh, doengzseiz lij vih ranz ndaem ien cawx nungzyez baujyiemj, baujyiemj cwzyin baugvat fwnhung、 raemxrongz、raemxdumh、 rumzhaih、 doek lwgbag、 mbwnnit、 mbwnrengx、nonhaih daengj fueng- mienh, gyangqdaemq gij yungyiemj bouxguhnaz ndaem ien, gikfat le gij yiedcingz vunzlai nem miz mbangj cingcinj bangrex doiqsiengq ndaem ien. Bi 2016 daengx yienh seizcin ndaem ien mienhcik 2.39 fanh moux, ranz ndaem ien 1860 ranz. Seizneix, cingq dwg seiz soucawx iengangq Fuconh, daengx yienh hong soucawx iengangq cingq gaenjcieng miz bouhloh guh, daengz seizneix, daengx yienh gungh soucawx mbawien 32428 rap, soucawx soqcienz 3737.6 fanh maenz. Iengangq canjnieb vih vunzlai Mbanjyauz daiqdaeuj souik gig ndei, ndaej haenh baenz “vuengzgim” canjnieb bouxguhnaz laisou baenz fouq.

(Dwng Vangzyi/邓黄玉  Vangz Yiyungz/黄玉荣)