Mbanjraiqhau dieg youq laj fai guekgya 4A gaep gingjgih Cwngz- bizhuz, gij bya、rin、raemx、faexcuk、ndoengfaex youq raemxdah cienbak bi cungdongj gatgvej lajde, yienj ndaej gyaeundei yinxvunz. Daj bi 1995 324 roenguek gaij guh gya- gvangq le, Mbanjraiqhau caeuq singz Baksaek couh bienq gyawj ngamq miz 6 goengleix gyae, ndaej daj aen mbanj ndaw runghbya gyae’gyangq ndeu bienqbaenz rogsingz Baksaek, caiqlij miz cigoenggyau cigsoh doeng daengz ndaw mbanj, doidoengh hong lijyouz aenmbanj hwngfat.

Mbanjraiqhau dwg aen mbanj Nanzloz Cunh Yungjloz Yangh Yougyangh Gih Baksaek Si. “Raiq- hau” dwg Vahcuengh, eiqsei dwg gij yiengh gingj gyaeundei raemxlangh hau raemxdah laegit daemjbongj ndaekrin gyang dah le sinz sanq baenz haenx. Byaij daengz bakmbanj, couh raen miz diuz giuzndojfwn guh ndaej gyaqciq ndeiyawj ndeu vang gvaq gwnz daj doeng haeuj ndaw mbanj, henz giuz faexcuk heuswd ngauznged, reihgyoij baenz benq mwncup homfwt; ndwn youq gwnz giuz, caenh raen gij raemxdah sawyau menhmenh lae gvaqbae, henz dah guh miz aendiengz roqluengq, diuz roenbenjrin ngutngeuj iet coh song mbiengj, gag miz cingzdiuh de; byaij haeuj ndaw mbanj, couh raen baenz aen baenz aen ranzlaeuz moqsag gyaeundei daengjbaij youq song henz roen, diuz roen suijniz gvangq youh bingz ndeu con gvaq gyang mbanj, saek seiz ndaej raen miz geij ranz vunz loengh bya daih hek, fungh ranzdajcawj henz roen cingq miz geij boux saimbwk nyaengq haeuj nyaengq ok, baihneix cingq youh at youh yaenj youq henz cauq guh daeuhfouh; baihhaenx cix aeuq dinmou naengj nohgouyuz dumq gaeqdoj, raq rumz ndeu ci daeuj, feih hom biu doh daengx mbanj.

Mbanjraiqhau bi 2006 nienzdaej ndaej Baksaek Si dingh guh si、gih song gaep diemjguhyiengh hwnjguh lajmbanj moq. Ciuq gij diegyouq、yienghgingj caeuq canjyez hwngfat saedcaeq cingzgvang, baez hainduj guh couh dingh baenz guh aen mbanj moq seveicujyi ndaej lijyouz yawj- gingj、youqndwi youzangq cungj miz ndeu. Ginggvaq roengzrengz guh, aenmbanj guhbaenz le dieg vunz- mbanj comzyouq、dieg epbya、dieg- ringgangq、dieg youzangq、dieg gingj ndoengfaex、dieg suenmak mbaetsou 6 yiengh neix, lij boiqdauq guhbaenz le giuzndojfwn doenghgij lijyouz sezsij neix, hawj mbanj moq demlai gij yiengh gingjgih. Daj bi 2008 nienzdaej ndaw mbanj demlai banh nungzgyahloz lijyouz gvaqdaeuj, haujlai hekyouz bae Cwngzbizhuz youzcet roengzma le, lij haeuj ndaw mbanj bae yawj gingj cimz gijgwn feih haenx, hix caemh haenh mbouj dingz. Bouxcoz 28 bi ndaw mbanj Liengz Fanz, youq bakranz bonjfaenh hai aen dan ringgangq ndeu, moix bi cinghsouhaeuj 10 fanh maenz doxhwnj. Daengx mbanj 119 ranz 440 lai vunz, daj guh nungzgyahloz lijyouz le souhaeuj bi beij bi lai, bi 2015 couh ciepdaih hekyouz 10 fanh vunzbaez, gyonjgyoeb souhaeuj 500 lai fanh maenz, moix vunz bingzyaenz souhaeuj 1.5 fanh maenz.

Ginggvaq roengzrengz guh lai bi, seizneix Mbanjraiqhau gaenq daj aen mbanj gungzndoq ndeu hwngfat baenz gizdieg gyaeundei yinxvunz ndaej hawj hekyouz daejniemh saed- ceij lajmbanj、gamjsouh fungcingz lajmbanj、cimz byaekhaeux lajmbanj、sup heiq fulizswj ndeu. Bi 2007, ndaej bingz guh Guengjsae maenh- ndei singzmbanj gveihva sezgi bingzbeij cunhcin gveihva loih it daengj ciengj, bi 2009 aeundaej aen cwnghauh “Guengjsae aen mbanj cib daih rengz hoengh”.