Bonjbauq siusik (gicej Cau Dwzfeih) 10 nyied 13 hauh, Swcigih Minzyijveij baij aen veij neix gihgvanh dangjveij (yinzswcu) conhciz fusuhgi Veiz Bazci daengj 4 boux bae daengz dinghdiemj bangfuz mbanjgungzhoj——Ningzmingz Yen Swlang Yangh Baidaiz Cunh、 Cwngzcungh Cin Gveizdangz Cunh haiguh “ngoenzbanggungz”giensoengq hozdung, aeu gij ngaenzcienz aen veij neix youq 10 nyied 12 hauh cujciz ndaw veij gihgvanh caeuq cizsuz danhvei ganbu cizgungh gienngaenz hozdung seiz soundaej haenx, faenbied soengq bae daengz ndaw fwngz 20 hoh vunzlai gungzhoj Baidaiz Cunh caeuq Gveizdangz Cunh dinghdiemj bangfuz mbanjgungzhoj aen veij neix, bang gyoengqde gaijgez mbangj hojnanz saedsaeh.

Ngoenzhaenx banhaet, giensoengq gunghcozcuj bae daengz Baidaiz Cunh haiguh “ngoenzbanggungz” giensoengq hozdung, giensoengq hozdung yizsi youq Baidaiz Cunh Baidaiz Siujyoz Guhlungz Diemjsonhag banh. Swlang Yangh Dangjveij suhgi Nungz Yenzswng, Swlang Yangh Yinzminz Cwngfuj Vujcanghbu bucangj Veiz Vangzbauj, Baidaiz Cunh youq mbanj suhgi daih’it、 “gyaeundei Guengjsae” lajmbanj hwnjguh(banggungz) gunghcoz duiyenz nem Baidaiz Cunh Cunhveij ganbu daengj vunz camgya hozdung yizsi. Giensoengq yizsi yienhciengz, giensoengq gunghcozcuj caeuq banggungz gunghcozdui itheij aeu gij ngaenzcienz aen veij neix giencomz ndaej haenx faenbied gien hawj 8 hoh vunzlai gungzhoj daengzciengz haenx; linghvaih, aen veij neix lij yienhciengz giensoengq 2 aen dennauj、 2 aen densi、 aen dajyingih ndeu、 dauq yaemsieng ndeu hawj Baidaiz Siujyoz caeuq Baidaiz Siujyoz Guhlungz Diemjsonhag, yienhciengz giensoengq 2 aen dennauj hawj Baidaiz Cunhveij yungh de hwnjguh lajmbanj densangh bingzdaiz, hawj gij daegsaek doxgaiq reihnaz mbanjgungzhoj doenggvaq gwnz vangj siugai, gya’gvangq gij roenloh siugai doxgaiq reihnaz, vih vunzlai gungzhoj vaiqdi vut gungz baenz fouq demlai ligliengh moq.

Ngoenzhaenx banringzgvaq, giensoengq gunghcozcuj daengz Cwngzcungh Cin Gveizdangz Cunh aeu gij ngaenzcienz aen veij neix giencomz ndaej haenx giensoengq daengz ndaw fwngz 10 hoh vunzlai gungzhoj, caemhcaiq bae ranzgungzhoj camnai, roxyiuj gij cingzgvang swnghcanj saedceij vunzlai gungzhoj dem.