“Hagseng Yez Ciuh, cunjgauj cingqhauh dwg 132411006, dang’an mwngz caengz soengq daengz, doek- laeng loegyungh cingzgvang aeu yawj sawloegyungh……” Henz gou cungj dwg gig caemdingh, cijmiz duzbid hemq goksad caeuq sing denva ndeu. Cuengq roengz denva, ndawsim gou dauq mbouj lumj baihrog aencueng nei nauhyied.

Gaenq dapwngq gvaq haujlai vunz aeu gauj ndaej hwnj Gvangjsih Minzcuz Dayoz. Haujlai vunz doiq gou maqmuengh gig hung, seizneix gij maqmuengh haenx cungj bienqbaenz saetmuengh lo.

Gaenq lumz seizhaenx dwg aen seizhah baenzlawz yiengh, cij geiq ndaej rog cueng duzbid hemq ndaej yienghhaenx nauhyied. Gou cijndaej naengh youq ndaw gyausiz, boux dog yawj gyoengq vunz youq gwnz cauhcangz dwkgiuz.

Diegsieng cungj yw ndaej ndei, nanzdauh mbouj dwg? Gou yungh 3 ndwen seizgan, youh lumj gaxgonq nei simvuen, mbouj gvaq ndangdaej yied daeuj yied nyieg. Gaenq geiq mbouj ndaej youq yihyen seiz daj geijlai cim, geiq mbouj ndaej gwn geijlai yw, geiq mbouj ndaej…… Duenh seizgan haenx, couh lumj loq gij fangzhwnz nei, 3 ndwen seizgan cungj mbouj rox dauqdaej dwg baenzlawz gvaqbae, mbouj miz maz roxnyinh, couh lumj bae ninz mbat he.

Gou hix siengj gauj ndaej hwnj Gvangjsih Minzcuz Dayoz, gig siengj gig siengj, caemhcaiq dawz de dangq- guh aen simnyienh cang haeuj aen bingz moek youq ndaw namh bae. Hoeng, de mbouj dwg naed ceh he, hix giet mbouj ok gij mak gou siengj aeu. Gaenq gangj gvaq gij vah cungmuenx gikcingz, ceiqheiq hungmbwk, hoeng mbouj ndaej saedyienh, couh lumj swxcuk daek raemx nei song fwngz bauz. Dandingh gangj:“Byaij roen swhgeij, hawj bouxwnq bae gangj ba.” Swnghhoz dauqdaej dwg swhgeij bae gvaq, mbouj yungh cungj dwg geiq gij vah bouxwnq youq ndawsim, dawz yawjfap bouxwnq haeuj sim.

Byaij youq Nanzningz bakloh Mingzsiu, gizneix cij beij Vujsenh lai hoengh di, dingq mbouj raen saek di sing, sim gou gig caem. Yaepyet gou couh gyaez aen deihfueng neix lo, mbouj vihmaz, couhdwg aenvih doek- laeng song bi gou cungj yaek youq gizneix swnghhoz、hagsib. Byaij youq gwnz haw, sawqmwh siengj hwnj song coenz sei——“Lij rox raemx saekloeg siengsim, byongjraemx mbouj bienq yiengh gaxgonq”. Mboujguenj gou youq gizlawz doegsaw, lij aeu yungh rengz bae laebdaeb hag doxgaiq, mboujduenh cinbu, ciuhvunz gou cij gvaq mbouj daengz ngeihcib bi, lij miz haujlai seizgan, mbouj wnggai aenvih baez ndeu gauj mbouj ndei couh itcig saetmuengh caeuq sieng- sim.

Byaij haeuj aen yozyau doek- laeng gou gauj ndaej, gou gig hab’eiq, dauqdaej ndaej laebdaeb doegsaw, lij miz aen daizheiq hawj gou bae baijyienj bonjfaenh. Gou mumjmumj- gyumqgyumq geiq ndaej ngoenzhaenx banringz gvaq, ndit con gvaq mbawfaex mwncup, ciuq daengz gwnz namh raizretret. Gizgyae miz dahsau langh byoem ndaem raezrang byaij daeuj, de daenj vinj raez saek lamz, youq gwnz diuz loh raemhrwd cinghngau ce roengz aen ngaeuz dog de, laj din de dwg funggingj daengx aen baihnamz.

Mbawfaex doek, seizcou yaek daeuj lo.