Doeg siujyoz seiz raeuz gaenq hag gvaq bien faenzcieng ndeu heuhguh 《Yizgungh Senj Bya》, aen goj gangj Yizgungh vih ok rog bienz couh yaek canj Byadaihangzsanh caeuq Byavangzvuhsanh song goengq bya daengj youq baihnaj ranz bae, mbouj lau hojnanz, gaemgaenj mbouj cuengqsoeng, heuh daengx ranz vunz mbouj dingz bae vat bya, doeklaeng faenh sim’eiq neix dajdoengh denhdi, denhdi heuh song bouxsien gig miz rengz bae buen song goengq bya deuz.

Gizsaed, daj Banzguj dingj hwnj aenmbwn, song goengq bya hung sang haenx couh itcig daengj youq baihnaj ranz Yizgungh lo. Hoeng gyoengq bangeq Yizgungh coengzlaiz hix mbouj gamj bae naemj dwg mbouj dwg aeu canj song goengq bya hung sang haenx bae. Aenvih mboujlwnh baenz- lawz yawj, bouxvunz caeuq goengq bya doxbeij, bouxvunz saedcaih dwg iq lai lo. Caiqgangj, vunz caeuq goengq bya hung sang doxdingj, vunzwnq youh baenzlawz yawj aen hingzveiz neix ne? Caiqlix vunzwnq gangj vah raeblaeng, couhcinj bonjfaenh souh ndaej, vunz ndawranz souh ndaej mbouj ndaej, caemhcaiq doengzeiq caez ok rengz guh lwi? Gijneix cungj mbouj roxyiuj. Gij youheiq neix itcig youq ndawsim gyoengq bangeq Yizgungh, hawj gyoengqde maz siengjfap hix mbouj gamj miz, maz cungj mbouj gamj bae sawq. Ngoenz dem ngoenz gvaqbae, gyoengqde cij gamj haet hwnqdaeuj, byaij roen gyae, bin gvaq song goengq bya hung sang haenx bae bya baihhaenx guh reihnaz, haemh yaek laep caiq bin gvaq song goengq bya, byaij roen gyae dauq ranz. Roen youh gyae youh lingq, itdingh miz vunz yienq naeuz diuz roen bya neix nanz byaij lai, cix mbouj miz vunz gamj naeuz “Vih ok rog bienz di, dou aeu bae canj song goengq bya neix bae”.

Yizgungh lij coz seiz caeuq gyoengq bangeq de doxdoengz, lau yienghneix lau yienghhaenx, lau vunzwnq luenh gangj, lau saehcingz guh mbouj baenz. Lauheiq mizseiz mbei de hung gvaq mbwn, roxnyinh song goengq bya haenx gig gazsaeh, cix vanzlij mbouj gamj miz aen siengjfap canj song goengq bya bae, engq mbouj gangj bae guh. Ndwenngoenz dawz gij youheiq deuz, daengz Yizgungh 90 bi seiz sawqmwh roxsingj, gietdingh comzgyonj gij rengz daengx ranz, canj song goengq bya haenx bae. De baez hai bak, vunz ndawranz couh cienzbouh doengzeiq lo. Yienzlaiz, aen siengjfap haenx itcig caegcaeg yo youq ndawsim gyoengq vunzlai, cijdwg mbouj miz bouxlawz gamj gangj ok bak. Doeklaeng, Yizgungh daengx ranz moix ngoenz muengz dwk bae vat namh、 caq rin rag rin namh roengz bya, couhcinj hanh conh dumz daengx ndang, gyoengqde hix angqvauvau.

Yienghneix yawj, vunz caen dwg itcig cungj miz aen sibgvenq rwix ndeu, couhdwg bungz daengz hojnanz, danghnaeuz ndwenngoenz lij gvaq ndaej bae, couh nyaenx roengzbae, mbouj siengj roxnaeuz mbouj miz mbei bae gaijbienq. Hoeng, sijsaeq siengjsiengj raeuz couh fatyienh, vunz youq lajmbwn, danghnaeuz itcig lau doeng lau sae, couh ciengxlwenx guh mbouj baenz maz saeh. Guh saeh couh lumj diuz roen laj din raeuz nei, aeu raeuz yamq dem yamq bae byaij cij byaij baenz roen. Yizgungh guh gietdingh seiz, gaenq geq ndaej go nywj gwnz bya hix mbouj miz rengz ciemz okdaeuj lo. Hoeng, ndawranz Yizgungh youh mbouj dwg gag de boux vunz ndeu, cingq lumj Yizgungh dap “vunzgvai” ndaw mbanj——“Couhcinj gou dai le, lij miz daeglwg gou; daeglwg youh seng lwglan gou, lwglan youh seng lwglaenj gou, lwglwg lanlan mbouj sat mbouj caenh, song goengq bya haenx cix mbouj rox bienq sang bienq hung, dou vihmaz lau canj mbouj bingz song goengq bya haenx ne?”

Ndigah, baenz seiqvunz, gij saeh ceiq daeng ndaej haenh, mbouj dwg maz cungj miz, dwg miz mbei bae najdoiq hojnanz, bae haekfug. Dangyienz, danghnaeuz aeu bae haekfuk hojnanz, ciengeiz gaej dawz maqmuengh cuengq youq gwnz ndang bouxsien, dauqdaej bouxsien youq ndaw swnghhoz yienhsaed dwg mbouj miz, cijdwg bouxvunz vih haenh aen hingzveiz Yizgungh senj bya, hawj aen goj neix miz aen souciengz ndei, ndigah cijmiz bouxsien bang senj bya. Hoeng, raeuz lij miz beixnuengx caeuq youxdoih, gyoengqde couhdwg “bouxsien” raeuz, raeuz bungz daengz hojnanz, gyoengqde itdingh rox bang raeuz, mboujguenj dwg ok rengz roxnaeuz ok ngaenz, miz saek seiz cihciz caeuq gujli engq miz yungh.

Gou doeg gvaq bien faenzcieng ndeu, mingzcoh gaenq lumz lo, hoeng, ndawde miz coenz vah ndeu hawj gou yaenqsiengq gig laeg——Danghnaeuz duz noucoengz haenx itcig ndoj youq go faex ndeu, mbouj gamj yunghrengz diuq okbae, diuq daengz go faex wnq bae ra gwn, lau diuq gvaqbae seiz doek daengz gwnznamh, lau deng sieng, lau deng duz noucoengz wnq riu, yienghneix duz noucoengz neix couh ciengxlwenx mbouj roxyiuj bonjfaenh diuq ndaej geijlai gyae. Maqmuengh raeuz caenhliengh guh duz noucoengz gamj diuq okbae haenx, miz mbei diuq ok dieg seizneix youq, bae yawjyawj funggingj dieg- wnq, ciengeiz gaej guh “vunzgvai” riu Yizgungh huk haenx, bonjfaenh mbouj gamj guh, miz vunz guh, mbouj bae bang cixbah, lij bae buet raemxgyoet hawj vunz dem.