Ciengzrin、saeurin、ranzfaex, mbanj gaeuqgeq、vunz simsoh、yiengh gyaeundei… Gijneix mbouj dwg gingj ndaw densigi, cix dwg gij yiengh gingj gyaeundei mbanj gaeuqgeq Mbanj- dienmax Gujli Cunh Bwzgwngh Yangh Yinhcwngz Yen.

Mbanjdienmax dieg youq henz Dahraemxhoengz, daengx mbanj 47 ranz 128 vunz, gungh miz 41 aen ranz, 32 aen ranzcanx gaeuq, aen ranzcanx ceiq gaeuq de gaenq guh ndaej bak bi. Aenmbanj sam mbiengj goengqbya hophumx, goengqbya baihsaebaek caeuq ranghbya Majsanh Yen Ginhcaih Yangh Mbanj- runghyaenq doxrangh doxlienz, hungloet sangvid, lumj duz max ndeu daj gwnzmbwn buet roengzdaeuj nei, goengq bya ceiq sang haenx heuhguh Byadienmax, gwnz dat lij gaek miz “Mbwn caemz byaheu bibi gyaeu, max youq gwnzdieg bibi hoengh” doenghgij cihsaw neix, ndigah aenmbanj couh heuhguh “Mbanj- dienmax”. Gij ranz gaeuq ndaw mbanj dwg yiengh ranzcanx, aeu benjfaex roxnaeuz faexcuk dap baenz sam caengz, aeu rin guh giekdaej, saeurin dingjdaemx saeufaex, ing bya hwnjguh, gig miz daegsaek, yawj hwnjbae gij yiengh gaeuqgat vaihvad, hoeng lij maenhdwt youq ndaej vunz. Seizneix ndaw mbanj gyoengq bouxcoz bouxrengzak dingzlai okrog dajgoeng ra ngaenz, ndaw mbanj caenh miz vunzlaux caeuq lwgnyez 40 lai vunz youq ranz, buenx aen mbanj gaeuq gvaq saedceij.

Riengzdwk guek raeuz ginghci hwngfat ndaej vaiqriengj caeuq vunzmbanj okrog dajgoeng demlai, vunzmbanj caemh siengj gvaq gij saedceij ndei youq gij ranzlaeuz ciensiu suijniz caep haenx, ndaw mbanj cix miz vunz ceklid ranzcanx bae hwnjguh ranzlaeuz, danghnaeuz mbouj gibseiz habngamj bae baujhoh, ranzcanx couh ngoenz beij ngoenz noix caiqlij mbouj lw saek aen. “Seizneix mbouj ra ndaej vunz daeuj bang coih ranzcanx gaeuq, gou youh mbouj nyienh ceklid dauqlingh hwnjguh, caenh baenzneix caeuq gij ranz gaeuq neix doxbuenx gvaq saedceij lo.” Vangz Yizmou boux daxgoeng gaenq ndaej goujcib lingz bi neix naeuz, aenvih aen ranz gaeuq guh ndaej gyaqciq, gyoengqde caemh siengj banhfap ra ngaenz cingj vunz daengz ndaw mbanj dajcoih, caemh miz vunz yienq de ceklid ranz gaeuq bae hwnj ranzlaeuz moq, hoeng de cingznyienh youq ndaw ranz gaeuq vaiqvad haenx, cix mbouj sij ndaej ceklid bae, caenhrengz louzce bauj- hoh ndei.

Mbanjdienmax lizsij gyaenanz, caemh miz duenh lizsij gwzming ndeu, banlaux gwzming Vangz Yizcangh camgya Gujswh Gijyi gvaq neix couhdwg youq aen mbanj neix doekseng, de youq ndaw mbanj fathwnj vujcangh gwzming gvaq. Dunzcangj Vangz Gvancingz naeuz, Mbanjdienmax youq diegbya, ginghci doeklaeng lai, vunzmbanj souhaeuj caenh baengh dajndaem haeuxyangz, bouxcoz bouxrengzak cix okrog dajgoeng ra ngaenz demlai ndaw ranz souhaeuj, seiqhenz mbanj dingzlai dwg ndoibya caeuq ndoengfaex, maqmuengh baihgwnz caeuq gwnz- biengz gak gyaiq yawjnaek ranz gaeuq ndaw mbanj, bangcoengh ndaw mbanj cauxguh baenz aen mbanj gaeuq lijyouz gingjdenj ndeu, baenzneix gawq ndaej baujhoh mbanj gaeuq, caemh ndaej doidoengh mbanj gaeuq hwngfat, hawj vunzlai ndaw mbanj miz seizheiq ndei demlai souhaeuj, saedceij gvaq ndaej bi beij bi ndei.

Youq ndaw Mbanjdienmax youzbyaij, gij ranz gaeuqgeq vaihvad haenx, gij gingj gyaeundei mbouj miz gyuekuq、bya sang faex heu haenx, yiengh vunzmbanj gvaq saedceij caux feiz dajcawj、aeu muhrin muh haeuxyangz aeu aendoiq daem haeux daem mba haenx, hawj vunz roxnyinh gig mizyinx, caemh maqmuengh aen mbanj gaeuqgeq neix ndaej baujhoh ndei hwngfat vaiq vunzmbanj saedceij angqyangz vuenyungz.