Denhdwngj Yen Dozganh Yangh Mbanjbuzlit vunzlai naihhaemz guh 24 bi, baengh fwngz geuh mbaq gwed vat diuz deihgoengq ok bya ndeu, lienh- comz ok cungj cingsaenz Mbanjbuzlit “Cingznyienh naihhaemz buekguh mbouj nyienh youq ndaw haemzhoj coegcamz”. Cib lai bi gvaqdaeuj, gyoengq vunzmbanj mbouj deq mbouj baengh, laebdaeb naihhaemz haenq- rengz buekguh, baez yiengh baez yiengh gaijgez le gij vwndiz byaij roen hoj、yawjbingh hoj、ndaemganq hoj、gwnraemx hoj、doegsaw hoj、ranzyouq hoj, vutvak le aenmauh gungzndoq, angqyangz byaij coh biengz siujgangh.

Dwen daengz Mbanjbuzlit, hauj- lai vunz cungj rox, cingsaenz Mbanj- buzlit “Cingznyienh naihhaemz buek- guh mbouj nyienh youq ndaw haemzhoj coegcamz” dwg aen sigij gonq Guengjsae raeuz aen yienghndei banggungz gunggeng ndeu. Daj bi 1973 hwnj, vunzlai mbanj neix youq Nungz Siyingh daengj sam nyaemh cunh dangjcihbu suhgi daiqlingx lajde, gag baengh goengrengz bonj- faenh, seizhwngq seiznit cungj mbouj dingz dwk geuh rin vat doeng diuz deihgoengq raez 460 mij、gvangq 4.6 mij、sang 4 mij ndeu, fuengbienh vunzmbanj haeujok rog bya, vunz- mbanj gaxgonq yungh baenz diemj lai song diemj cung bin bya ok mbanj bienqbaenz cij yungh geij faen cung, gaijbienq le gij yiengh gungzhoj doeklaeng aenmbanj. Bi 1997, Mbanjbuzlit ndaej laeb guh daengx guek diegbya yienghndei banggungz gunggeng, cunhcihsuh Nungz Siyingh ndaej senj dang bouxdaibyauj cibhaj daih dangj raeuz.

Vih dawz gij cingsaenz Mbanj- buzlit swnjcienz roengzbae, bi 2013 ndaw mbanj soucomz gij doxgaiq vat deihgoengq yungh gvaq haenx, laebhwnj “bozvuzgvanj deihgoengq”. Gij gangciem geuh rin hed goz haenx, aen huzraemx mwh guhhong yungh haenx, aen daengmax damq roen geuh rin yungh haenx, aen loengxfaex gien ngaenz comz ngaenz yungh haenx, fagcanj、aengei vat rin daeh rin yungh gvaq haenx…… yiengh dem yiengh venj baij youq gwnz dat song henz ndaw deihgoengq, yap haeuj lwgda vunzraeuz. Song henz gwnz dat bak deihgoengq, lij faenbied aeu benjrin gaek miz gij siengq guhhong doengh bi haenx caeuq sawcih gaisau vat deihgoengq cingzgvang. “Bozvuzgvanj deihgoengq” Mbanjbuzlit baenz le Denjdwngj Yen dangjyenz ganbu naihhaemz buekguh gyauyuz gihdi, seiz mbouj seiz couh miz danhvei cujciz dangjyenz ganbu bae yawjngonz hagsib, guh naihhaemz buekguh gyauyuz hozdung, doengzseiz caemh yinx gij dangjyenz ganbu diegwnq bae yawjngonz, daengx guek mizmingz.

Mbanjbuzlit doeng roen le, vunzmbanj lij laebdaeb vat cingj yinx raemx, gaijgez gwnraemx hoj vwndiz; vunzmbanj gaenxmaenx guh ndei gak cungj swnghcanj, ndaem haeuxyangz guhceh、ndaem oijdangz caeuq ok rog dajgoeng, souhaeuj caemh bi beij bi lai. Daengx mbanj 120 ranz 500 lai vunz, moix bi cungj miz 200 lai vunz okrog dajgoeng, moix bi ndaej ngaenzhong maranz 100 lai fanh maenz; lij miz 100 lai vunz seiz hong soeng bae si yienh henzgyawj guh hong raemj oij、dajcaep, moix ndwen ndaej souhaeuj 3000 maenz hwnj- roengz. Seizneix daengx mbanj miz ciiq、cisamloek、ciseiqloekiq、ci- mozdoz doenghgij ci neix 200 lai gyaq, bi 2013 daengx mbanj moix vunz bingzyaenz cinghsouhaeuj couh daengz 5000 lai maenz, saedceij vunzlai bi ndei gvaq bi.

Geij bi neix daeuj, Mbanjbuzlit lij guh ndei gij hong “lajmbanj seuqcingh”, cang moq rogciengz aenranz, miz dingzlai ranz cang le aenndatraemx ndatndit, ranzranz vat miz caujgiciz, ndaw mbanj roen luengq cungj bu hwnj suijniz; guh le lanzgiuzcangz、daizheiq、vwnzdij hoz- dungsiz doenghgij vwnzva sezsih neix, hawj yiengh mbanj moqsag. Gvaq cieng gvaq ciet, seizhoengq roxnaeuz doengxhaemh, vunzmbanj cungj comz bae guh vwnzdij hozdung, ciengq go diuq foux yienjheiq, dwk lanzgiuz dwkbej, gak boux gag angq, nauhyied vuenyungz.

Bineix, Mbanjbuzlit youh caeuq gunghswh hung doxgap, dawz benq reih bakmbanj laebbaenz le aen suen mbaetsou lwgmak seiqgeiq ndeu, dangqnaj gaenq cienzbouh ndaem le makleiz、maknimhenj、makbugmaed、makcengz doenghgij dingomak neix, caiq gvaq song sam bi dem, gizneix couh ndaej bienqbaenz aen suenmak homfwtfwt yinx vunz ndeu, baenz diemjrongh gyoengq vunzmbanj dem- lai souhaeuj ndeu.