Vah hainduj

Dwen daengz boux guhdoj,

Lwgyah hozndat lai.

Vut cienzcaiz roengz haij,

Dai mbouj miz vunz lawq.

Ngoenzneix gou hwnj daiz,

Lwnh hawj vunzlai dingq.

Gik mbouj dai hix hoj,

Doj mbouj dai hix ndoq.

Vunzlai doengzcaez geiq,

Raeuz mbouj ngah guhdoj.

It mbouj ngah guhdoj,

Loh neix hoj lailai.

Geijlai boux fatcaiz,

Daengz byai baenz gaujvaq.

Ngeih mbouj ngah guhdoj,

Hoj mbouj miz coenz damz.

Yiemq ngaenz vunz youh cam,

Dam caiz sim mbouj an.

Sam mbouj ngah guhdoj,

Ranz lai hoj gvaq vunz.

Ciengz guhdoj gvaqhwnz,

Caenyoux cwnz mbouj ndei.

Seiq mbouj ngah guhdoj,

Hoj daengz da couh raiz.

Bae caeg cwz caeg vaiz,

Gyaeng dai mbouj cuengq dauq.

Haj mbouj ngah guhdoj,

Byaij rox loh ra dai.

Yied doj yied goem lai,

Diuq laeuz dai hix miz.

Roek mbouj ngah guhdoj,

Goj rox naeuz boihseiz.

Aeu yah youh mbouj leih,

Saek seiz yaek aeu mingh.

Caet mbouj ngah guhdoj,

Goj rox naeuz baihgya.

Ranz miz yiengh gijmaz,

Cungj daz bae gai caez.

Bet mbouj ngah guhdoj,

Hoj yienghyiengh mbouj miz.

Lwgyah youh souhvi,

Mbouj raen di ndeu ndei.

Hoj daengz yah couh deuz.

Hwnz lwg daejngeungeu,

Ranz heu lumj ranz miuh.

Gouj mbouj ngah guhdoj,

Cib mbouj ngah guhdoj,

Goj rox boek gyaranz.

Bohmeh sim youh fanz,

Gyaranz youh deng sanq.

Vahsat

Fwen mbouj ngah guhdoj,

Bouxboux cungj aeu rox.

Guhdoj mbouj miz leih,

Vunz gag rox cij ndei.

Daj ngoenzneix doxbae,

Caez geiq doj mbouj guh.

Guh vunz aeu simcingq,

Guhhong cingq haenqrengz.

Haenqrengz ndaej fukluz,

Ciuhvunz yiengj hingfuz.