Gaxgonq, Miz song mehlwg gag youq laj Byanamz, ndawranz gwndaenj mbouj miz, gungzhoj dangqmaz, daxmeh gai fwnz ndaej di ngaenz daeuj soengq daeglwg bae doegsaw.

Seizgan lumj naq nei gvaq ndaej gig vaiq, baez yaepda daeglwg couh majhung baenzvunz lo, de youq ndawsingz dang lauxsae. Gvaq mbouj nanz, daeglwg caeuq boux dahsau gig gyaeundei ndeu doxaeu, saedceij gvaq ndaej vuenyungz dangqmaz.

Ndwenngoenz ndei gvaq mbouj raez, daxmeh bienq geq lo, song da mongmatmat, rwz dingq mbouj raen sing, dinfwngz ning mbouj ndaej geijlai, sim dahbawx hix ngoenz beij ngoenz bienq yak bienq rwix, yiemz daxmeh guh mbouj ndaej maz hongranz caemhcaiq baenzngoenz naenghninz deq gwn, cawj noh mbouj hawj daxmeh gwn, laeglemx bae ndaw dah gaeb duzbing ma cawj hawj daxmeh gwn.

Banhaemh roengzdangz, daeglwg dauqma daengz ranz, daxmeh sing unqngemngem dwk caeuq daeglwg gangj:“Lwg ha, gij noh neix nyangq lai, gou haeb mbouj haeuj, geux mbouj goenq, heuj mwngz ndei, mwngz couh gwn de bae ba.”

Daeglwg baez yawj, dwg duzbing ndaw dah, couh rox dwg maz saeh lo, hozndat lumj feiz, hoeng de mbouj ok saek di sing.

Haetlaeng de cingjgyaj mbouj bae hagdangz, couh bae laeng bya faeg go’ndoek san aen songzmou hung ndeu, dahmaex de raen le couh riuhaha cam naeuz:“Mwngz mbouj bae hwnjdangz, san aen songzmou neix youh hung youh raez guhmaz ne?” De han naeuz:“Duz moumeh raeuz geq lai, gou siengj gai de bae, mwngz yawj gou san aen songz neix hab lwi? O, gou ngonz mwngz caeuq duz moumeh haenx hung doxdoengz, mwngz ndonj haeujbae sawq mbat ndeu yawj, gou yawj hab mbouj hab.” Mehmaex de mbouj ngeix maz couh ndonj haeuj ndaw songzmou bae, daeg de sikhaek dawz cag gyaet baksongz ndaet hwnjdaeuj, mbouj guenj mehmaex de baenzlawz hemq de hix mbouj dingz fwngz, doeklaeng lij gwed bae daengz henz dah dwk mehmaex de roengz ndaw dah bae.

Daj seizhaenx hwnj, henz dah cungj miz duz roeg ndeu heuh:“Daeuj! Daeuj! Daeuj…… Gouq ha! Gouq ha……”