Youq Sanglinz Yen Muzsanh Yangh miuh Luzhih ndawde, daed geq daeng heu, hoenzyieng heux- humx, labcuk ronghsagsag. Gvanhyinh naengh dwk, Niuzsanh gvih youq gwnz nywj. Cijraen Niuzsanh hab fwngz baiq sam baez, caegcaeg gouz dwk naeuz:“Gvanhyinh naezyou ha, gouz mwng soengq daeglwg hawj gou ba! Bi daihngeih, gou itdingh daiq doenghduz caeuq yienglab daeuj hawj mwngz!”

Gangj sim’eiq le, Niuzsanh cuengq cienz youq aen buenz gwnz daiz Gvanhyinh, youh yot diuz ciem ndeu. Niuzsanh cijraen gwnz ciem sij cih “git” ndeu, ndawsim angq dangqmaz, goenggingq dwk song fwngz ndenq diuzciem hawj bouxgejciem. Bouxgejciem ciep gvaqdaeuj, sijsaeq yawj le, fanhai bonj saw saekhenj haenx, naeuz:“Ra raen lo, ra raen lo”, couh doeg hawj Niuhsanh dingq:“Ngux nyied va hai hoengzyanyan, byaifaex gaenq venj mak saekheu. Caj daengz bimoq mbawraeu hoengz, cienz coeng ciep daih dwg daeglwg. Boux soujmiuh baez dingq couh naeuz:“Diuz ciem neix ndei raixcaix! Bouxcawj caen miz fukheiq.” Niuz- sanh cam:“Itdingh dwg lwgsai lwi? Danghnaeuz baujcwng dwg lwgsai gou couh lai hawj cienz. Boux soujmiuh riu dwk naeuz:“Neix dwg mimiz, mbouj ndaej aeu cienz daeuj gietdingh. Saenq couh miz, mbouj saenq couh mbouj miz, gou nyinhnaeuz bouxcawj lij guh ndeisaeh gonq, yienghneix cijmiz ndeicawq. “Gou saenq, gou saenq!” Niuzsanh naeuz, sikhaek gvih roengzdaeuj, baiq geij baez, couh baema ranz lo.

Niuzsanh aeuyah gaenq ndaej 5 bi lo, daengz seizneix aen dungx mehyah de caengz hung gvaq. Mbanj ndaw mbanj rog, vunz gangjsebseb, naeuz rag ranz Niuzsanh yaek goenq lo, mehyah Niuzsanh dwg duz gaeqmaen mbouj rox okgyaeq ndeu, boihseiz lai lo! Niuzsanh dingq le siengsim yaek dai, raen gyoengq hauxseng bouxboux doxaeu, mbouj daengz song bi cungj miz lwg, Niuzsanh ndawsim gig gip. “Daegsam, sou vihmaz cungj mbouj cagaenj ha? Wnggai hawj daxmeh umj lan lo!” Daxmeh Niuzsanh ciengzseiz youq henz rwz Niuzsanh naeuz. “Hwhw! Mbouj youqgaenj, mbouj youqgaenj! Dou siengj guh hong rom di cienz le caiq aeu lwg.” Niuzsanh cungj ra lijyouz han dwk. “Gou nyinhnaeuz sou lijdwg aeu lwg vaiq di! Gou dingqnyi vunz baihrog doeng gangj sae naeuz, vah gyoengqde caen dwg caegrwz.” “Rox lo.” Niuzsanh dap naeuz.

Gyanghaemh, Niuzsanh doiq mehyah naeuz:“Ngoenzneix gou gouz ndaej diuz ciem ndei ndeu, naeuz gou yaek ndaej daeglwg lo!” Mehyah de angq raixcaix, baez got Niuzsanh.

Ngoenz daeb ngoenz gvaqbae lo, aen dungx mehyah Niuzsanh lij mbouj miz maz doenghdanh. Niuzsanh naeuz:“Diuz mingh raeuz caen hoj ha, daengz seizneix lij caengz miz lwg. Mehyah de cam:“Yienghneix baenz- lawz banh ne?” “Bae yihyen ba!” Niuhsanh naeuz. Ngoenz daihngeih mbwn caengz rongh, song vunz couh naengh banci bae ndawsingz lo. Bae daengz yihyen, gvaqhauh、genjcaz、vaqniemh、gyaucienz、aeu yw. Canghyw naeuz dwg mehyah Niuhsanh miz di vwndiz, gwn yw diuzcez sam ndwen yienghneix couh gojnaengz mizndang lo!

Baez baenqda ndaej seiq ndwen seizgan. Mehyah Niuzsanh angq- vauvau dwk rag Niuzsanh, youq henz rwz de gangj gijvah. “Caen lwi?” Niuzsanh cam. “Wnggai dwg!” “Haha! Ndei lai lo!” Niuzsanh angq- vauvau hwnjdaeuj.

Raen aen dungx mehyah ngoenz beij ngoenz hung hwnjdaeuj, Niuzsanh angq dwk lumj boux lwgnyez nei. Dauqdaej ndaej byoq gaemz heiq ndeu lo, beij bauqcouz lij sangj ha! Ndawsim de raeujrubrub. Niuzsanh ngoenzngoenz cawj gij byaek ndei hawj mehyah de, maz saeh hix mbouj hawj mehyah de guh.

Ngoenz ndeu, Niuzsanh youq gwnz haw diuz ganjdensen gwnzde raen mbaw gvangjgau ndeu, gwnz gvangjgau sij miz: Mimiz gending lwg ndaw dungx, cinj yaek dai! De laeglemx cau denva haumaj roengz- daeuj, ma daengz ranz couh caeuq mehyah de doxyaeng.

Niuhsanh naeuz:“Bae yawjyawj ba! Mbouj bengz, baez ndeu couh geij bak maenz ngaenz.” Mehyah de naeuz:“Mbouj dwg yousim ngaenz. Yiengh- neix ndei lwi?” Niuzsanh naeuz:“Gou siengj aeu boux daeglwg gonq, bingh mwngz ndei lo, doeklaeng maij aeu dahlwg roxnaeuz daeglwg cungj mbouj youqgaenj.” Mehyah de naeuz:“Mwngz caeu ciem mbouj dwg naeuz dwg daeglwg ndeu ma?” Niuzsanh naeuz:“Gaej saenq cungj haenx! Seizneix aeu siengjsaenq gohyoz!” Mehyah de naeuz:“W. Gou hix siengj ciengx daeglwg ndeu gonq.”

Niuzsanh couh ciuq dwk denva gvaqbae, baihhaenx gangj cingcuj diegyouq le, gyoengqde couh ganj gvaqbae lo. Genjcaz、vaqniemh、B cauh、gyaucienz. Ndaek vunz lumj canghyw haenx naeuz dwg dahlwg ndeu. Niuzsanh haeb heuj naeuz:“Mbouj aeu dahlwg neix!” Boux haenx youh naeuz:“Gyau cienz, mbouj in 600 maenz, seizneix caezgya guh aen neix. Mehyah Niuzsanh hix mbouj miz yigen, doeklaeng deng doi haeuj ndaw rug bae. Yaep ndeu cienz daeuj gij singyaem lumj gaj mou nei, najbyak Niuzsanh cungj ok hanh liux.

Bakdou hai lo, cijraen ndaek vunz lumj canghyw haenx naj bienq heu liux, naeuz:“Loek! Loek! Loek! Mbouj dwg lwgmbwk.”

“Mwngz gangj dwg……? Niuz- sanh muengz cam. Vah lij caengz gangj sat, song da gaenq yap feiz, gyad naengh youq gwnz namh lo.