9 nyied 23 hauh gvaqringz 4 diemj, Gvangjsih Swhfan Yozyen Codaengj Gyauyuz Yozyen gawjhengz 2016 gaep Ban Cuengh Gun Song Vah Saw Haiban Denjlij. Gvangjsih Swhfan Yozyen fudinghgiz diuyenzyenz Cangz Ginhswng、Swcigih Gyauyuzdingh Minzcuz Gyauyuzcu cucangj Veiz Lanzmingz、Gvangjsih Minzcuz Gyauyuz Fazcanj Cunghsinh culij yenzgiuyenz Cinz Gizvwnz, lij miz Codaengj Gyauyuz Yozyen yencangj Couh Sinzdungh、 suhgi Bungz Yinghbyauh 、 fuyencangj Fu Gwzcui、 boux gaemguenj ban Cuengh Gun song vah saw fu’gyausou Liengz Cunhlenz daengj bouxdaeuz, 2016 gaep 168 boux hagseng moq daengj camgya haiban denjlij.

Youq gwnz haiban denjlij, Cangz Ginhswng daiqbiuj hagdangz docih gyauyuzdingh caeuq Gvangjsih Minzcuz Gyauyuz Fazcanj Cunghsinh ciengzgeiz daeuj bangcoh caeuq sonyinx hong hagdangz, hix caemh angqcoux hagseng moq. De maq- muengh hagseng moq guh ndei geij diemj: 1. Simleix cijbyauh yaek cingqciengz caemhcaiq ciengzciengz aeu rox docih vunz, aenvih yinzgwz bouxvunz dwg gyoebhab daejyienh ok gyoebhab suciz. 2. Aeu laebhwnj seiqvunz gyacizgvanh dengcingq, rap hwnj gij sawjmingh caeuq cwzyin guekgya gyauhawj gyoengq doengzhag neix, guh baenz boux ciepban baenghndaej caeuq boux hwnjguh habgek yiengh seveicujyi miz Cungguek daegsaek. 3. Aeu hag ndei conhyez cihsiz caeuq ginwngz, yawhbienh daengzcog ndaej engq ndei yungz haeuj sevei bae. 4. Aeu miz aen ndangdaej cangqrengz, cijmiz bouxvunz aen ndang cangqcwt le, cijndaej engq ndei fazcanj.

Veiz Lanzmingz angqhoh gak boux hagseng moq swnhleih gauj hwnj daihhag, lij cimdoiq Cuengh Gun song vah saw conhyez guh le gangjvah youqgaenj. De naeuz: Seizneix giep- noix lauxsae Cuengh Gun Song vah saw, maqmuengh daihgya aeu miz muzbyauh mingzbeg, dawzndei fueng- yiengq, mboujdan hag ndei hagnieb, lij aeu gauj ndaej bonj cwng guh lauxsae. De maqmuengh gak boux hagseng moq ndaej swnjcienz maenh- ndei vwnzva Bouxcuengh, fazcanj Gvangjsih minzcuz gyauyuz, miz aen sim rox docih bouxwnq, aeu saedcaeq hengzdoengh、binjhingz ndei caeuq cingzcik ndei daeuj bauqdap sevei caeuq lauxsae.

2015 gaep ban Cuengh Gun song vah saw hagseng Dwng Yingzciuh, 2016 gaep hagseng moq Vangz Gen gonqlaeng daiqbiuj gyoengq doengz- hag gangjvah, doxgyau daihag gamj- siengj caeuq gingniemh.

Ban Cuengh Gun song vah saw haiban denjlij, dwg dangz daih’it son’gyauq hagseng moq haeujhag, hawj gyoengq doengzhag gaeuq moq caeuq lauxsae miz le aen bingzdaiz ndeu doxgyau, gijneix doiq gyoengq hagseng moq engq vaiq engq ndei bae roxyiuj caeuq hab’wngq saedceij daihhag, mingzbeg daihhag hagsib muzbyauh, doengzseiz hix vih baez- laeng guh ndei gak hangh hong hagseng moq Cuengh Gun song vah saw dwk roengz giekdaej ndei.

（Cau Yangzmeiz sij Vangz Yingjyiz hoiz）