Geij bi neix daeuj, Liujcwngz Yen doenggvaq aeu aen fuengsik ra canghhek yinx cienzngaenz haifat, mboujduenh gyalai roengzngaenz, hwnjguh ranghdieg fungcingz lijyouz aeu Mbanjdandaeuz Gujcai Mulauj- cuz Yangh guh cungsim haenx, caemhcaiq ciuq gij daegdiemj minzcuz、yinzvwnz Mbanjdandaeuz bae guh cingjcoih ranz gaeuq、 guh diuzroen haeuj mbanj doenghgij sezsih giekdaej neix, ndaej baenz mbanjguhyiengh minzcuz fungcingz naekgywg、swnghdai vanzging maenhndei、minzcuz doxgiet doxhuz. Bi 2011, Mbanjdandaeuz ndaej bingz guh Liujcouh Si gaiq daihroek “cib aen mbanj gyaeundei”; bi 2014 ndaej Guekgya Minzveij dingh guh buek daih’it “Cungguek aenmbanj daeksaek saujsu minzcuz”.

Liujcwngz Yen Gujcai Mulauj- cuz Yangh dwg daengx guek aen Mulaujcuz Yangh dog ndeu, ndoeng faexraeu、ranz gaeuqgeq、ngoenz cietheiq dwg “sam ndei” Gujcai. Mbanjdandaeuz youq cungqgyang aen yangh neix, seiqhenz miz luengqhongh cien mij faexraeu Mbanjbungzbo、ndoengfaex ciuhnduj Mbanjsinhveiz、ranz gaeuq Mbanj- gujse, doxcomz yienh’ok gij minzcuz conzdungj vwnzva caeuq minzsuz minzfungh Mulaujcuz, dwg aen gingj haifat Gujcai Mulaujcuz Yangh lijyouz ceiq ndei ndeu. Mbanj- dandaeuz liz yienhsingz Liujcwngz 18 goengleix gyae, youq Ciuhcingh Daugvangh 7 bi (gunghyenz 1827 nienz) hainduj laeb mbanj. Daengx mbanj seizneix miz 150 lai ranz 308 vunz, miz 120 lai aen ranz gaeuq, lij miz gij laeuzbauq、coengceiz、aenmiuh gaeuqgeq louzce ndaej haemq ndei haenx, dwg aen mbanjhumx Mulaujcuz ranz gaeuq lai caiqlij louzce ndaej ndei seizneix raen miz haenx ndawde aen ndeu. Daengx mbanj miz sam aen laeuzdou gaeuq, cungj dwg Daugvangh nienzgan hwnjguh, gwnzde faenbied gaek miz geij cih Sawgun, caengz cien baihrog ciengz gaenq miz mbangj lotloenq hedvauq, louz roengz gij riz gaeuq ndwenngoenz. Seizneix ndaw mbanj gaeuq gaenq mbouj miz vunz youq, vunzmbanj cungj senj haeuj mbanj moq youq, hoeng vih henhoh ndei gij yiengh gaeuq aenmbanj, gyoengq vunzmbanj lij caezsim okrengz youq ndaw mbanj gaeuq coih mieng baizraemx, cingj- coih ranz gaeuq caeuq dauq guh ndei aen ranzvaih, doengzseiz ndaw mbanj lij guh le cunh vwnzvasiz、lanz- giuzcangz、daizheiq、diuzmieng dwk- raemx haeuj daemz、mienghung baiz raemxuq, vanzlij guh le nungzgyahloz hanghmoeg caeuq gak cungj lijyouz boiqdauq sezsih, hawj vunzmbanj youq ndaej cwxcaih, bouxhek youz ndaej sim’angq.

Mbanjdandaeuz cawz ndwen- cieng daengj ngoenzciet nauhyied le, lij miz aen ciet nauhyied daegbied ndeu, couhdwg liggaeuq ndwencib co’ngeih “cietyihfan” Mulaujcuz. Moix bi daengz ngoenzneix, gyoengq vunzmbanj cungj caez comz youq henz coengceiz ndaw mbanj, gaj yiengz gaj vaiz loengh byaek nyaengqnyi’nyi, roq gyong roq laz ciengq go diuq foux angqvauvau, guhsax guhbaiq goengcoj bauj bingzan caeuq angqhoh ndaw bi soucingz ndei, mbaenjgouz bi laeng dajndaem dajciengx yiengh- yiengh guh baenz.