Veiz Yindonz gag rox baenzneix guh dwg mbouj hawj vunz ngeiz caeuq mbouj hawj vunz rox.

Bouxswhgih cico lijdwg ngeiz Veiz Yindonz lo. De doq hai ci doq liuq bouxmbauq ndangcangq naengh youq baihgvaz haenx, mwh yaek ok camhsoufeiq de sikhaek dingz ci roengzdaeuj.

Veiz Yindonz mbon ok dab ngaenz boh’au hawj haenx, yaengx hawj bouxswhgih yawj, lij naeuz:“Bouxvunz beij mwngz lij miz ngaenz he, mwngz gaej you de ciengj mwngz.”

Bouxswhgih raen ngaenz da hoengz haenx sikhaek dauqcungz fatdoengh ci, hai ci ok singz. Gwnz loh bouxswhgih caeuq bouxnaenghci lwnh mbouj dingz mbouj duenh, lumj bouxdaujyouz nei gangjbedbed, hix lumj bouxhoj youh bungjbauq youh ndaenq bouxmiz nei.

“Gou sinsin hojhoj ngoenz he ngamq canh mbouj daengz sam bak, mwngz baelawz couh canh baenzlai ne? Lwnh hawj gou vei.”De naeuz.

Veiz Yindonz mbouj aiq leixlangh bouxswhgih, hoeng mwh cam daengz coenz neix, de naeuz:“Mwngz mbouj nyinhnaeuz gou dwg lwgbouxmiz roxnaeuz lwgbouxguen lwi?”

Bouxswhgih dingqnyi le, naeuz:“O, daxboh mwngz dwg Lij Gangh.”

Veiz Yindonz naeuz:“Daxboh gou mbouj dwg Lij Gangh, boh’au gou dwg hix baenz ha.”

Bouxswhgih naeuz:“Yienghneix, daeglwg lungzau Lij Gangh, baenz haemh lo, mwngz roengz mbanj bae guh gijmaz?”

Veiz Yindonz naeuz:“Cingj mwngz haep bak ndaej mbouj ndaej? Ndei mbouj ndei?”De nyapnyuk dwk caengzda yawj bouxswhgih gangj mbouj dingz haenx.“Gou hawj mwngz gya bak maenz he, cingj mwngz gaej caeuq gou gangjvah lo, ndei mbouj ndei? Ndaej mbouj ndaej?”

Vih lai ndaej bak maenz he, bouxswhgih haep bak lo.

Haeuj haemh lo, aen ci an’onj dwk buet baenaj, daengci ciuqrongh diuzloh daj gvangq bienq gaeb haenx. Rumz rog conghcueng cihuhu, lumj geij cien ci cienq nyingz gvaqdaeuj nei. Seiz mbouj seiz miz doenghduz vangz gvaq goengloh, gyoengqde ca mbouj geijlai couh yaek ngaiz loekci nienj gvaqbae lo. Gwnz loh gaenq gig noix raen ci caeuq vunz baedauq, lajmbanj caeuq ndawsingz couh gijneix mbouj doxdoengz. Vunz ndawbya seizneix siengj ninz couh ninz, mbouj siengj ninz hix mboujmiz saek yiengh guh. Gyoengqde mbouj lumj vunz ndawsingz nei buekmingh, mboujcaeq lumj bouxswhgih ndawsingz neix, vih canh gij ngaenz bouxvunz lajmbanj, baenz haemh lij soengq bouxvunzmbanj daengz lajmbanj.

5

Gij daeng aen diengz gwnz bya lij ronghsagsag. Aen fazdunggih rog diengz lij fatdienh, aen de cingq yiengj lumj ok roet nei, wnggai dwg yaek mboujmiz youz lo.

Vunz ndaw ranz cingq lwnhgoj, lumjbaenz dwg bouxvunz ndoet laeuj yaek gaeuq caengz gaeuq yaek fiz caengz fiz nei, mbouj yungzheih dingz roengzdaeuj.

Sinj Nwngznwngz caeuq Suh Niuz cingq ndoet laeuj, caemhcaiq dwg dawz vanj ndoet. Laeujhaeux ndaw vanj lumj raemx ndaw dah nei, mboek le youq rim, rim le youhcaiq mboek, gij laeuj ndaw doengjlaeuj, cix dwg mboek roengzbae.

Suh Niuz siengj mbouj daengz Sinj Nwngznwngz baenz ndoet ndaej laeuj, ngamq hainduj de couh lumj bouxcawjranz nei, baez bungq boi, ndoet geijlai, byongh vanj, ndoet gaemz he, cungj youzcaih de dingh. Suh Niuz cungj ngaiz dingq de liux.

“Sinj……Dahcej, gou daezsingj gvaq mwngz, gingjgaeh gvaq mwngz o, laeujhaeux lajmbanj dou, yienznaeuz mbouj get, hoeng danghnaeuz ndoet fiz, ninz sam ngoenz cungj mbouj ndiu!”Suh Niuz naengh youq henzndang Sinj Nwngznwngz naeuz. Gizsaed ndawsim de cingq naemj, ndoet lai di he, gou mbouj saenq ndoet mbouj gvaq mehmbwk.

Sinj Nwngznwngz naeuz:“Cej couh dwg siengj ndoet fiz bae, ninz sam ngoenz hix mbouj hwnq!”

Suh Niuz naeuz:“Gobiuj ngoenzcog dauqma, couh rox bohgoux baenzlawz yiengh lo.”

Suh Niuz dwen daengz bohgoux swhgeij, couh lumj bungz daengz diuz yienzgimz roxnaeuz diuznyinz dileiz nei, Sinj Nwngznwngz sikhaek ndek aen vanj he dek bae, youh dawz vanj laeuj he hwnjdaeuj, baez ngiengx gyaeuj couh guenq roengz dungx bae, raemxda cungj yaek loenq roengzdaeuj lo. De dwg siengj vaiqdi hawj swhgeij fiz bae.

Suh Niuz mbouj ndaej mbouj ciengj vanj laeuj de gvaqdaeuj, mbouj hawj de baenzneix ndoet.

Sinj Nwngznwngz bamz daengz gwnz ga Suh Niuz daejnganga.

Singdaej mehmbwk gwnz ga lumj duz- yiengzmeh roengzlwg mbouj ndaej nei hemqmeme, gij singdaej neix hix sawj Suh Niuz siengsim raixcaix. De lumjbaenz rumh duzyiengzmeh nei rumh byoemgyaeuj mehmbwk, laihnaeuz baenzneix rumh couh sawj gij haemzhoj mehmbwk noix di he. Caen dwg yienghneix, singdaej Sinj Nwngznwngz daemq roengzdaeuj lo, lumjbaenz mbouj baenzlai haemzhoj lo. Hoeng de lij bamz youq gwnz ga Suh Niuz, sij mbouj ndaej heiz gvaq gizwnq bae, de dangq diuzga Suh Niuz dwg diuzga bouxsai swhgeij roxnaeuz bouxvunzranz swhgeij lo. Mbouj loek, Suh Niuz couh dwg bouxvunzranz bouxsai swhgeij maijgyaez haenx, couh dwg bouxvunzranz swhgeij.

“Caeuq gou lwnh bohgoux mwngz baenz lwi?”Sinj Nwngznwngz sawqmwh naeuz.

“Lwnh gijmaz?”

“Lwnh gij saeh bohgoux mwngz, roxnaeuz youq ndaw da mwngz bohgoux dwg yiengh vunz lawz?”

Suh Niuz ngiengx gyaeuj yawj yiemhranz, laep da naemj haujlai nanz.

(9)

韦运团明白这是为了不让人怀疑和不被人发现。

出租车司机还是怀疑了韦运团。他边开车边瞅了又瞅副座上的身强力壮的小伙子，在准备出收费站的时候果断把车停了下来。

韦运团掏出叔叔给的一大把钱，亮给司机看，还说：“一个钱比你多得多的人，你不用担心会抢劫你。”

见钱眼开的司机立即重新启动汽车，将车开出城。一路上司机对他的乘客说话不停，像一名口若悬河的导游，也像一名巴结又仇视富人的穷人。

“我一天辛辛苦苦也就挣不超过三百，你怎么就能挣那么多？告诉我门道和路数喂。” 他说。

韦运团极少搭理司机，但是在被问到这句的时候，他说：“你不觉得我是富二代或官二代吗？”

司机听了，说：“哦，你爸是李刚。”

韦运团说：“我爸不用是李刚。我叔叔是也可以。”

司机说：“那么，请问李刚的侄子，这么晚了，去乡下干什么呀？”

韦运团说：“请你闭嘴好不好？可不可以？”他烦躁地瞪着不断给他增加烦恼的司机。“我给你加一百块钱，请你不要和我说话了，好不好？得不得？”

为了附加的一百元钱，司机愉快地闭嘴了。

汽车安稳地行驶在夜色中，强烈的灯光照射着由宽变窄的路途。窗外的风刮得呼呼响，像是数千支箭飞速掠过。不时有昼伏夜出的动物穿越公路，它们全部都有惊无险地避免了汽车的碾压。公路上已少有往来的车辆和行人，这是夜晚的山区和城市最大的不同。山区的人这个时候想睡就可以睡了，不想睡的也没事可干。他们不用像城里人那样拼命，不用像现在开出租车的城里司机，为了赚一个乡下人的钱，连夜将乡下人送往乡下。

5

山上的棚屋现在依然亮着灯。棚屋外的柴油发动机正努力地运转发电，它不间断地发出放屁的声音，应该是快没油了。

而屋里的人谈话却正在兴头上，像是酒过了三巡，喝酣的时候，是轻易停不下来的。

沈能能和苏牛的确还喝着酒，而且是拿着碗喝。碗里的米酒像湖泊的水位，降了又升，升了又降，而塑料桶的酒，只是下降。

苏牛没想到沈能能那么能喝，从一开始就是她主动，反客为主，掌控酒局。每一次碰杯，喝多少，半碗，三分之一碗，全由她定。苏牛只有服从的份。

“沈……姐姐，我可是提醒过你，警告过你哦，我们这农村的土茅台，别以为度数低，就猛喝海喝，喝醉了可是三天起不来的哦！”苏牛坐在沈能能的旁边说。他的心里其实在想，来吧，只管放马过来，一个女人家，我还喝不过你？

沈能能说：“姐就是想喝醉，三天不起来！”

苏牛说：“表哥明天回来，就会有舅舅的消息了。”

苏牛提及自己的舅舅，就像是触碰了琴弦或地雷的引线一样，沈能能突然神经质地打烂了一个碗，又捧起一个装酒的碗，含泪地咕嘟咕嘟往肚里灌酒。她是想尽快把自己弄醉。

苏牛不得不抓住她手中的酒碗，夺下酒碗，控制她不能再喝了。

失去寄托的沈能能趴在苏牛的腿上哭。

腿上女人的哭声像难产母羊的咩叫，声声让苏牛揪心，甚至伤心。他像抚摸母羊一样抚摸女人的毛发，以为这样能减轻抚摸对象的痛苦。的确，沈能能渐渐降低了哭的音量，像是痛苦得到了缓解。但是她仍然趴在苏牛的腿上，不舍得移开，像是把苏牛的腿当成了自己男人的腿或亲人的腿。没错，苏牛就是自己心爱男人的亲人，就是自己的亲人。

“跟我说说你的舅舅好吗？”沈能能忽然说。

“说什么？”

“你对你舅舅的印象，或者你心目中的舅舅是个什么样的人？”

苏牛仰头向着屋顶，闭着眼睛想了好长时间。

（9）