Mbanj dou miz daeg coz ndeu heuhguh Daeggang, Daeggang cuhcungh caengz bizyez couh mbouj laebdaeb doegsaw lo. Daeggang 20 bi, dajcaep guh mbouj ndaej, cae reihnaz lau uq, baenzngoenz bae guhdoj, doj saw le couh bae guhcaeg. Guhcaeg baezbaez ngaiz cog. Lij miz vunzwnq naeuz de:“Ngoenz gwq lauhndetndet, gyanh bae cet vunz gwn; ranz gwnz mbouj ndaej caeq, youh bae yaeq ranz laj.”

Miz ngoenz he, miz geij boux boh doengzhag sawqmwh daeuj ranz Daeggang. Daeggang doeksaet caez. Miz boux he riu naeuz:“Daeggang, mwngz bae ranz dou gwn hix mbouj siuj lo, neix dou daeuj caeuq mwngz ndoet mbat laeuj he.” Daeggang najmong naeuz:“Doiq mbouj hwnj, bohmeh gou bae rungh guh hong lo, gou fouz faen ngaenz he, cij ndaej cawj haeux dakdaih sou.” Gyoengqde naeuz:“Neix dou daeuj lwnh diegyouq hawj mwngz nyi, lwgnyez dou cungj bae cangj Dunghguenj guh hong lo. Gvaqlaeng mwngz ndaej bae gizde guhcaemz.” Gyoengqde naengh yaep he couh baema lo. Bingzciengz, bouxcoz ndaw mbanj cungj bae dajcaep liux. Daeggang raen gig godog. Caen dwg: Gyoengqdoih mbouj youq ranz, nanz ra vunz guhcaemz, dandog bae youzraemx, haemh fouz vunz gangjgoj.

Daeggang deng bik bae Dunghguenj gaen doih lo. Youq ndaw cangj, gyoengqde ngoenz guh hong 12 aen cungdaeuz, gig sinhoj, ndwen he cij ndaej 2000 lai maenz ngaenz. Lauxbanj lij ciengz naeuz:“Byawz yiemz cienz siuj hong naek, couh deuz! Byawz rox yungh Dennauj, hong mbaeu youh ndaej ngaenz lai .”

Daeggang iu doih ngoenzsinghgiz bae hag yungh dennauj, mbouj miz vunz nyienh bae, Daeggang couh gag bae hag. Sam ndwen seizgan gvaqbae lo, Daeggang rox aeu dennauj guh hong lo, cienzhong it ndwen lai ndaej 1000 maenz. De gig angq, miz di cienz lw le, de couh geiq dauq hawj bohmeh.

Miz mbat ndeu, Daeggang gyoengqde ngamq sou hong, bouxboux naetnaiq dangqmaz, lauxbanj daeuj naeuz:“Byawz nyienh gyaban 3 aen cung- daeuz, aen cungdaeuz he hawj 50 maenz?” “Laebdaeb guh hong, aen cungdaeuz he cij ndaej 50, mbouj guh, 80 dou caiq ngeix guh mbouj guh.” Lauxbanj cijndaej doengzeiq. Daeggang caeuq cib- geij boux ndang lai cangq couh bae gyaban gwed doxgaiq lo. Gyaban sat, gyoengqde cungj baeg dangqmaz, naiq ndaej yaek dai. Gvaqlaeng, Daeggang naeuz:“Hai, hong dwg hong vaiz, mingh dwg mingh ma. Raeuz aeu cienz de ma, de aeu mingh raeuz bae.”

Daeggang youq ndaw cangj baez guh couh 3 bi. Youq ndaw sinhoj de maj baenz boux maenh’ak ndeu lo. Lauxbauj gig maij de, baij de dang duicangj.

Cieng yaek daengz lo, lauxbanj vihliux lai canh cienz, ciengzseiz apbik minzgungh gyaban, cienz- hong mbouj gya. Lij ngoenz doi ngoenz mbouj fat cienzhong. Gyoengqde hoz gig ndat, hoeng youh mbouj miz maz banhfap. Fat cienzhong hix mbouj fat liux, naeuz gvaq cieng liux dauqma caiq fat gij ngaenz lw. Daeggang gyoengqde laeglemx ngoenz he dawz it、ngeih geu doxgaiq ok cangj bae ranz baengzyoux yo, dawz sat le couh guhcaeg dauq ranzmbanj gvaq cieng, cungj naeuz:“Mbon haex- ndaeng gwn hix mbouj bae guh gij hongcod haenx lo.” Lauxbanj rox liux hix mbouj gamj bauqgingj, cij dangq doxgaiq haenx dwg hawj Daeggang gyoengqde fat cienzhong lo.

Ndwencieng cobet, lauxbanj raen minzgungh dauq cangj gig siuj, mbouj miz geijlai vunz guh hong, gvaq cibgeij ngoenz couh yaek gyauhuq lo, seizneix bae gizlawz ra ndaej baenzlai vunz daeuj guh hong a, cijndei haici daengz ranz Daeggang, gouz gyoengqde dauq bae guh hong. Gyoengqde naeuz:“Dauq bae hix ndaej, aeu gya cienz, ngoenz siuj guh hong 2 aen cungdaeuz, lij aeu ci daeuj ndaw mbanj dap dou bae ndaw cangj. Ciengmoq mwngz daeuj neix, aeu hawj bohmeh dou boux he 100 maenz……” Lauxbanj naeuz:“Mboujbaenz!”“Mbouj baenz couh mbouj bae!” Song baih lwnh bae lwnh dauq, lauxbanj cij ndaej ciuq baihgwnz gangj bae banh, Daeggang gyoengqde cij nyienh dauq bae ndaw cangj guhhong.

Gvaqlaeng, lauxbanj gig mbouj angq, ndawsim gyangznaek naeuz: Mbwn ha, gyoengqneix dauqfanj apbik ndaej engq youqgaenj bw! Hai, comz di goengdaek siuj canh di cienz suenq lo, cienz lajmbwn byawz hix laeuq mbouj ndaej liux ha……