9 nyied 10 hauh daengz 12 hauh， Aen Hoih Canghfanhoiz Saemjdingh Swz Moq Vahcuengh Sawcuengh Bi 2016 Nienz youz Cunghgoz Minzcuz Yijvwnz Fanhyiz Giz cawjbanh、 Denhdwngj Yen Minzcuz Giz bangbanh de youq Denhdwngj Yen ciuhai. Baez hoih neix cujyau dwg vihliux gvancez lozsiz gij vwnzgen cingsaenz Cunghyangh Minzcuz Gunghcoz Veiyi caeuq 《Guekgya Minzveij Gij Cijdauj Yigen Gvendaengz Caenh’itbouh Guhndei Hong Minzcuz Yijvwnz Fanhoiz》， caenh’itbouh guh ndei hong hawj saw vah minzcuz swz moq Sawcuengh gveihfanva、 biucinjvaq、 saenqsikvaq， caenh’itbouh coicaenh guekgya daihcwngq fuengcim、 faplwd fapgvi youq siujsoq minzcuz ndaej gvancez lozsiz. Cunghgoz Minzcuz Yijvwnz Fanhyiz Giz fugizcangj Lij Vanyingh, Cunghgung Cungzcoj Siveij cangzveij、Si Yinzminz Cwngfuj fusicangj Vangz Gijbingz、Cunghgung Denhdwngj Yenveij fusuhgi、Yen Yinzminz Cwngfuj yencangj Mwz Cwngzcu daengj mizgven dungzci camgya aen hoih haimuq caemhcaiq gangjvah. Gaenh 30 boux cangh- fanhoiz Vahcuengh Sawcuengh daj Baekging、Guengjsae、Yinznanz daeuj haenx camgya baez hoih neix.

Lij Vanyingh gangjvah seiz daj dangqnaj gij cingzgvang moq hong saw vah minzcuz fanhoiz daengx guek、geij aen vwndiz laj hingzseiq moq hong saw vah minzcuz itdingh aeu dawzndei、gij cizcwz boux guh hong saw vah minzcuz aeu cietsaed rapdawz daengj sam aen fuengmienh gaisau cingzgvang hong saw vah siujsoq minzcuz guek raeuz. Vangz Gijbingz、Mwz Cwngzcu faenbied gaisau Cungzcoj Si、Denhdwngj Yen mizgven sevei ginghci hwngfat caeuq hong saw vah siujsoq minzcuz cingz- gvang.

Baez hoih neix gyoengq canghfanhoiz itgungh saemjdingh le swz moq Sawcuengh ca mbouj geijlai miz 950 diuz youq 《Faenh Gozminz Ginghci Caeuq Ndawbiengz Fazcanj Daih Cibsam Aen Haj Bi Gveihva Ganghyau Cunghvaz Yinz- minz Gunghozgoz》 daengj vwnzgen ndawde genj aeu，nangqdaengz cwngci、 ginghci、 ginhsw、 gohgi daengj lingjyiz. Youq daujlunvei gwnzde，gyoengq canghfanhoiz lij doiq fanhoiz swz moq Sawcuengh daezok haujlai yigen caeuq genyi. Cunghyangh Minzcuz Dayoz boux- gyausou、 bozswswngh daujswh Lij Ginjfangh nyinhnaeuz，youq aen saenqsik seizdaih cihsiz dekcaq，sevei bienqdoengh gig vaiq，gij saehfaed moq mboujduenh yienh’ok，fanjyingj youq saw vah gwnzde，swz moq caeuq vah hangznieb mboujduenh okyienh， gibseiz cinjdeng fanhoiz swz moq Sawcuengh，dawz gij saenqsik caeuq cihsiz moq cienzboq daengz dieg Bouxcuengh，coicaenh sevei ginghci hwngfat，vihneix， youq guh fanhoiz ndawde aeu cawqleix ndei gij vwndiz demgya roxnaeuz gemjnoix saenqsik yienzlaiz， cawqleix ndei gij gvanhaeh baujlouz eiqsik yienzlaiz caeuq doengswnh dawzbak， yienghgonq fugcoengz yienghlaeng， ciuqei gij biujdap sibgvenq Vahcuengh. Guengjsae Minzcuz Dayoz boux- gyausou、 bozswswngh daujswh Mungz Yenzyau nyinhnaeuz，fanhoiz swz moq Sawcuengh， it dwg youh doengswnh youh caenhliengh baujlouz eiqsik yienzlaiz， ngeih dwg ndaej yungh saw minzcuz daeuj doiqwngq de ceiqndei dwg aeu baujlouz cungj gangjfap saw vah minzcuz， hoeng hix aeu lingz- vued cawqleix. Cungguek Minzcuz Yijvwnz Fanhyiz Giz bouxyizsinj Gvanh Swgingh nyinhnaeuz， fanhoiz swz moq Sawcuengh aen fuengfap gig youqgaenj ndeu couhdwg aeu cungfaen fatyienh haivat caeuq yinhyungh Vahcuengh yienzlaiz， ciuq gij goucau sibgvenq Vahcuengh bae dajcauh swz moq， lumjbaenz “网约车” youq seiz daezgyau dwg hoiz baenz “aen ci okco gwnz vangj iekdingh”， raeuz saemjdingh baenz “civangjiek”.

Baez hoih neix, lij gawjhengz Cunghgoz Minzcuz Yijvwnz Fanhyiz Giz Aen Hoih Yenzdauj Sawcuengh Vahcuengh Cinwngz Fanhoiz Yonjgen Bi 2016, yiengq gyoengq lauxhangz gaisau gij cwngzgoj geij bi neix Fanhyiz Giz youq saenqsikvaq gensez fuengmienh aeundaej, yienhciengz baijok aen hidungj Cuengh Gun cinwngz sueng yiengq fanhoiz、aen hidungj youq gwnz vangj fanhoiz，dingqaeu gij yigen caeuq genyi gyoengq lauxhangz.

Baez hoih neix, Cunghgoz Minzcuz Yijvwnz Fanhyiz Giz lij soengq 《Sawloih Gun Cuengh Ciuhneix》、 《Faenh Gozminz Gingh- ci Caeuq Ndawbiengz Fazcanj Daih Cibsam Aen Haj Bi Gveihva Ganghyau Cunghvaz Yinzminz Gunghozgoz》、2016 nienz 《Cwngfuj Gunghcoz Baugau》daengj 600 lai cek saw Sawcuengh hawj Cungzcoj Si.

（Cunghgoz Minzcuz Yijvwnz Fanhyiz Giz hawjgauj）