9 nyied 6 hauh banringzgvaq, Ginhsiu Yauzcuz Swciyen Vahyauz lanzmoeg bouxcujciz genjleh doxdax youq Aen Cungsim Yisuz Yauzcuz aen yienh neix banh, cib lai boux bouxcoz Yauzcuz daj ndaw yienh Mbanjyauz daeuj haenx camgya doxdax.

Doxdax yungh gij fuengsik gangjdoeg Vahbujdungh、 gangjdoeg Vahyauz、 gaujguen cam vwndiz、 doxgyau doxlwnh daengj, ginggvaq baenz caengz baenz caengz genjleh, doeklaeng seiq boux camgya doxdax ndaej hingz haenx ndaej doigawj hawj yienh densidaiz, vih lanzmoeg Vahyauz yaek boqcuengq haenx caepcawq ndei vunzcaiz. Doengzseiz, boux camgya doxdax maenhndei couh miz gihvei cujciz aen yienh neix “Yauzduh sinzyin” “Yauzyin sinhbaiz” daengj binjbaiz biujyienj cezmuz.

Baez doxdax neix youz Ginhsiu Byayauz Youzmenz Vwnzva Cuzcinvei aen yienh neix cujciz guh, muzdiz dwg genjleh bouxcujciz Vahyauz cezmuz maenhndei, vih Vahyauz lanzmoeg yaek boqcuengq haenx dwkroengz giekdaej, doengzseiz fatyiengz vwnzva conzdungj Yauzcuz, cienzndenq gij yinxdaeuz vahgangj conzdungj Yauz- cuz, gikfat gij gikcingz caeuq gyaezngah beixnuengx Mbanjyauz hagsib Vahyauz, caux ok vanzging ndei yungh Vahyauz, vih swnjcienz vwnzva Vahyauz daezhawj bienhleih.

(Cau Yilanz/赵玉兰)