Mbanjgyanghdouz caeux youq bi 2005 couh ndaej bingz guh “Cungguek aenmbanj gaeuqgeq gig ngamj guh lijyouz”, bi 2006 ndaej Gozvuyen goengbouh guh “daengx guek cungdenj vwnzvuz baujhu danhvei”, “vwnzva gyaez va’mbu Gyanghdouzcouh” ndaej lied haeuj Guengjsae buek daih’it feihvuzciz vwnzva yizcanj mingzloeg, bi 2015 ndaej aen mingzdaeuz “daengx guek aenmbanj youqndwi ceiq gyaeundei”. Geij bi neix daeuj, youq dangjveij cwngfuj baihgwnz haeujcoengh lajde, Mbanjgyanghdouz dawz hong henhoh aenmbanj gaeuqgeq caeuq lijyouz haifat doxcaemh bae guh, aeundaej yaugoj haemq ndei, dan bi 2015 couh miz 15 fanh vunz bae ndaw mbanj cetyouz.

Mbanjgyanghdouz youq hamq baihsae Dahhohlungz dep Hawgiuj- vuz Cinghswhdanz Cin Lingzconh Yen, liz yienhsingz 20 goengleix、singz Gveilinz 32 goengleix. Seizneix daengx mbanj miz 180 ranz 800 lai vunz. Aen mbanj neix dwg gij lwglan boux vwnzyozgyah、cez- yozgyah、bouxcaux lijyoz okmingz guek raeuz Couh Dunhyi haenx comzyouq, Ciuhmingz Hungzvuj bidaeuz (gunghyenz bi 1368), gij lwglan Couh Dunhyi daj Huznanz senj daeuj youq caemhcaiq hwngfat daengz seizneix. Ndaw mbanj lij louzce miz gij ranz cien caep vax gang seiz Ciuhmingz Ciuhcingh hwnjguh haenx 180 aen, daengx mbanj aenranz cienheu vaxmong, faex benj dapgaq, yiemhranz doxdaeb, gaeuqgeq ndeiyawj.

Byaij haeuj ndaw mbanj bae, couh hawj vunz gamjsouh daengz raq heiq gaeuqgeq ranzvunz mizmingz ndeu, daegbied dwg gij ranz gaeuqgeq doxdaeb bingzbaiz、doucueng deu ven guenghva、roeniq bu rinmaxluenx haenx, gizgiz loh gij romcomz vwnzva lizsij ranzcaep Yenz Mingz Cingh sam ciuh neix okdaeuj. Mbanjgeq funghgingj gyaeundei, baihbaek miz Ndoivuengzgya baenz bi faex heuswdswd raemxmboq sawrwenx laerat haenx, baihnamz ing Byagouj- sien, baihsae nangq Gyaiqhajceij, baihdoeng daengj Byabizgya. Naj mbanj doenghnaz gvangqyub, sam diuz dah raemx sawyau lumj diuzsaihau nei, hopngomx aenmbanj lae coh baihnamz, baihlaeng mbanj faexgeq sang hung, mwncup heuswd. Gij daegbied yienhda haenx cix dwg gwnz goemqdou gak aen ranz cungj venj miz gep baiz ranzgviq caeuq vuengzdaeq fung hawj haenx, “Genhswngh”、“Dungzcih”、“Cih- yen”、“Ranzdaisij” doenghgij baiz neix miz 200 lai gep, caiqlij miz “bohlwg hanlinz”、“seiq daih gijyinz” doenghgij baizdou neix dem; engq hawj vunz da’byaengq haenx dwg ca mbouj geijlai ranzranz dwg ranz dang hak lingx fungjloeg ne, seizhaenx ndaw mbanj 80% ranz cungj miz vunz dang hak gvaq, mboujdan miz vunz dang hak hung, caiqlij bouxboux mbouj dam mbouj nduk seuqcingh guhhak, caen hawj vunz boiqfug. Ndigah seizneix ndaw mbanj lij miz “Gai Siucaiz”、 “Luengq Gijyinz”、“Laeuz Cinsw”. 《Lwnh Gyaez Va- mbu》dwg bien faenzcieng okmingz gwnzbiengz riuzcienz Couh Dunhyi, ndigah ndaw mbanj miz aen ranz “Coengceiz Gyaez Va’mbu” ndeu, dwg miuhcoj ranz singq Couh, ndawde venj baiz deu miz bien faenzcieng 《Lwnh Gyaez Va’mbu》caeuq vah son guhvunz ciuhcoj, comz caeqbaiq、 son’gyauq youq ndawde, baenz aen gihdi youqgaenj “vwnzva gyaez va’mbu”. Cawz aenranz coengceiz le, ndaw mbanj lij miz ranz daisij、ranz ancazsij、ranz fungcwng dafuh、ranz dungzcihfuj、ranz haj daih cihyen、ranz gaijyenz、laeuz lwgsau doenghgij ranz neix, vanzlij miz Giuzhohlungz、cingjmaenzleij、cingj- coengmingz caeuq Byabizgya、Byayaenqhak doenghgij dieg gingj ndeiyawj neix dem, hawj vunz yawj le raraen di rizgeq ndeu, gamjsouh ndaej di ronghyab vwnzva lijyoz Couh Dunhyi ndeu.