Doenghbaez gonq, youq aen Mbanjcuengh depgaenh dah hung, miz ranz vunz ndeu, ndawranz miz song mehlwg. Gyoengqde mbouj miz reihnaz dajndaem, cijndaej baengh dwkbya gvaq saedceij. Daeglwg heuhguh Veiz Cang, aenvih gyaranz gungzhoj, mboujcaengz aeu ndaej yah.

Miz ngoenz ndeu, daxmeh Vei Cang bae ranz daiq, Veiz Cang gag bouxdog roengz dah bae dwkbya. Banhaemh, de yaek dauqma seiz, raen henz dah miz aen lwgsae daegbied hung ndeu. Yienghneix, de gip hwnjdaeuj cuengq haeuj ndaw rieng- bya bae dawz dauq ranz.

Daengz ranz le, Veiz Cang aenvih guh hong baenzngoenz naetnaiq dangqmaz, gik bae dajcawj, cij gwn song gaemz ngaiz gyoet couh ninz lo. Mbouj geij nanz, de moengzloengz dwk nyouq daengz raq heiq ngaiz、bya、noh、byaek hom ndeu, byaengq da baez yawj, couh raen gwnz daiz baij dwk ngaiz caeuq bya、noh、byaek homswdswd. De roxnyinh gig geizheih, nanzdauh dwg daxmeh dauqma bang cawj? Hoeng, daxmeh naeuz de bae ranz daiq youq geij ngoenz cij dauqma ne. Dwg bouxlawz cawj ne? Aenvih de dungx iekngaungau, couh mbouj naemj baenzlai, sikhaek hwnqcongz, dawz vanj ngaiz gwnguk hwnjdaeuj. Gwn ngaiz le, de riuj doengjraemx, yaek bae gueng mou, raen duzmou gaenq gwn imq lo, ninz youq ndaw riengh caemrwgrwg. De engq roxnyinh geizheih, haeuj ranz bae ra, hoeng ndawranz hix mbouj miz saek boux vunz lawz.

Ngoenz daihngeih banringz, Veiz Cang roengz dah bae dwkbya dauqma, raen ndawranz baet ndaej seuqsat, gwnz daizngaiz baij dwk ngaiz caeuq byaek ndatfwtfwt. De roxnyinh geiz- heih dangqmaz, gietsim loengh cingcuj gienh saeh neix dwg byawz guh.

Yienghneix, Veiz Cang gwn ngaiz sat le, couh gyajcang bae dwkbya, menhmenh goemq dou okbae.

Byaij daengz byonghroen, Veiz Cang cienq ndang dauqma. Yaek byaij daengz ranz, raen conghheuq gwnz dingj ranz oenqfoedfoed. De menh- menh byaij daengz bakdou, daj geh dou yawj haeujbae, raen dah sau lengj ndeu cingq angqvauvau dwk bang de cawj mokmou. De cung haeuj ranz bae, gaem fwngz dahsau, gig unqswnh dwk cam:“Mwngz dwg bouxlawz? Vih maz daeuj ranz gou?” Dahsau baez raen Veiz Cang, gig najmong couh ngaem gyaeuj roengzdaeuj, naj hoengzfwdfwd dwk han naeuz:“Gou dwg dahsien, aenvih mwngz gaenx- guh、swnzsienh, gou couh laeglemx lizhai gwnzmbwn, bienqbaenz lwgsae, daeujdaengz ranz mwngz, nyienh guh yah mwngz.” Veiz Cang dingq le, ndawsim angq dangqmaz, vuenheij dwk dapwngq. Haemhhaenx, gyoengq- de couh doxaeu lo.

Ngoenz daihngeih, daxmeh Veiz Cang dauqma raen dahbawx le angq dwk riuhehe.

Gij siusik Veiz Cang aeu ndaej yah cienz doh mbanj, gyoengq beixnuengx cungj haenh de seizheiq ndei, ndaej gvaq ndwenngoenz vuenyungz. Hoeng mbanj nden boux caizcawj ndeu baez dingq couh miz siengjfap rwix lo.

Haemh ndeu, boux caizcawj neix swnh Veiz Cang caeuq daxmeh de bae dwkbya mboujcaengz dauqma, daiq geij ndaek mageq roemx haeuj ranz Veiz Cang, ciengj aeu dahsau lwgsae.

Veiz Cang dauq daengz ranz, raen gij doxgaiq ndawranz laemx vang laemx raeh, luenhlablab, hix mbouj raen dahsau lwgsae, aiq dwg deng vunz ciengj bae lo. De sim’in dangqmaz, ngunhlaemx roengz gwnznamh bae. Moengzloengz dwk dingqnyi lwgsae dahsau doiq de naeuz:“Gou deng boux caizcawj mbanj nden ciengj bae, mwngz danghnaeuz daeuj gouq gou, couh dawz siengqrin gwnz saeuq daeuj, de dwg saeuqvuengz gou daj gwnzmbwn daiq daeuj, de ndaej bang mwngz.”

Veiz Cang singj le, couh daiq siengqrin gwnz saeuq buet ok rog bae. Caen geizheih, siengqrin sikhaek couh bienqbaenz boux vunz maenhcoek ndeu, daiq dwk Veiz Cang byaij baenaj. Daengz ranz boux caizcawj mbanj nden, boux maenhcoek cung haeujbae, moeb dai boux caizcawj, gouq ok dahsau lwgsae. Veiz Cang song gvanbaz caiq doxraen, vuenheij raixcaix. Gyoengqde gig docih saeuq- vuengz.

Dauq daengz ranz, dahsau lwgsae aeu fwngz vix gwnzgyaeuj saeuq- vuengz baez diemj, saeuqvuengz sikhaek bienqbaenz siengqrin dauq Veiz Cang cuengq de youq giz dieg gaxgonq.

Vihliux bauqdap gij aencingz saeuqvuengz gouqbang, Veiz Cang caeuq dahsau lwgsae gaj bit gaj gaeq、guh ceiz, loengh byaek daeuj caeq saeuqvuengz. Ngoenzhaenx, cingqdwg liggaeuq ndwenlab ngeihsam.

Aen siusik saeuqvuengz bang Veiz Cang gouq ok dahsau lwgsae cienz ndaej gig vaiq. Vunzlai rox saeuqvuengz ndaej bang guh saeh ndei, hix maqmuengh saeuqvuengz daengzcog ndaej bang ranz bonjfaenh guh saeh ndei. Yienghneix, caezgya cungj youq ndaw ranz gwnz saeuq laeb hwnj aen siengqrin saeuqvuengz, lij hag Veiz Cang song gvanbaz, youq moix bi liggaeuq ndwenlab ngeihsam, cawj bya gaj gaeq、guh ceiz daeuj caeq saeuqvuengz.

（Vangz Gyanghmyauz hoiz）