Bonj saw《Heiqlaux Yungh- couh —— Heiqyungh》 ginggvaq bouxswnjcienz Heiqyungh Hungz Giz caeuq lauxhangz Heiqyungh Hungz Yi habrengz sai 3 bi sij baenz, youq bi 2015 ndwen 12 youz Guengjsae Minzcuz Cuzbanjse okbanj. Bonj saw neix miz sam aen yiyi “guekgya gaep”: Hanghmoeg guekgya feih vuzciz vwnzva yizcanj、bouxswnjcienz guekgya gaep sij caeuq guekgya okbanj gihginh haeujcoengh.

Bonj saw miz 92 fanh cih, bouxsij dwg gij lwg Hungz Gauh- mingz, de dwg donzcangj boux daih’it Donzheiqyungh. Gyoengq- de daj gokdoh boux caenndang ginglig, youq ndaw saw yienh’ok gij sojmiz Heiqyungh——lizsij goekgaen、boux vunz biujyienj、gijvah heiqdaiz、gij ciengqfap caeuq yinhyoz、najveh、buhvaq、daizheiq diuhdoh、laeng daizheiq hangzdaeuz、heiqmoeg gizleij daengj, hawj bonj saw neix miz cungj feihdauh nanwt、sohsed caeuq caenciet.

Heiqyungh dwg heiq deih- fueng bizvangz aeu “Vahgun Yunghcouh” daeuj yienj, cij Namzningz miz, daengz seizneix miz saek 200 bi lo, lumj denyingj vujcaz nei ciengzgingj doxhoenx lai, nauhyied dangqmaz, youq ndaw fazcanj youh supsou haujlai Vahcuengh、gojgaeq Mbanj- cuengh、gij yenzsu vwnzva Heiq- cuengh, miz daegsaek digih caeuq daegdiemj saujsoq minzcuz, youq bi 2008 ndaej lied haeuj《Bih Daihngeih Guekgya Feih Vuzciz Vwnzva Yizcanj Mingzloeg》.

Daizheiq rwenzyiengj hom yinhsaw, cienz daengz seizneix louz sug laux. Yawj bonj saw neix, mboujdan rox Heiqyungh dwg maz, engq doenggvaq Heiqyungh rox ndaej cungj vwnzva、duenh lizsij caeuq faenh cingznaek baihlaeng de.