歌师歌手来相聚 壮歌歌唱民语情

——南宁市“跟我学壮文”（2016年第1期）培训班结业

8 nyied 29 hauh banhaet, Namzningz Si bi 2016 geiz daih’it “riengz gou hag Sawcuengh” beiz- yinbanh guh 8 ngoenz haenx swnhleih gietnieb. Swcigih Minzyijveij Ying- yungcu、Namzningz Si Minzcunghveij、Namzningz Si Minzyijveij、 Vujmingz Gih Minzcunghgiz (Minzyijgiz) daengj mizgven danhvei lingjdauj nem gyoengq yozyenz geiz beizyinbanh neix camgya le gietnieb denjlij.

25 boux yozyenz daj Hwngyen、 Lungzanh、 Cinghsiu、 Vujmingz daengj 8 aen yienhgih daeuj haenx ginggvaq camgya “riengz gou hag Sawcuengh” beizyinbanh, youq giet- nieb denjlij seiz, gak boux yozyenz cungj gaenxmaenx langhbaij gij cingzgoj 8 ngoenz neix hag ndaej haenx, doenggvaq gij fuengsik sikhaek eu fwen, sikhaek bien fwen, yungh fwen cienz cingz, yungh fwen gangj eiq.

“Yungh fwen daeuj gyau youx, doxcomz youq Vujmingz；Sawcuengh ngamq hag rox, simcingz angqvauvau. Doxgyau gvangq fouz henz, Vahcuengh cienz Bazgvei; Vah bonjdieg gyaeundei, hag ndei beij gim bengz.” Boux duiyouh ganbu Luz Gveivaz daj Lungzanh Yen daeuj haenx, youq gwnz gietnieb yizsi, doenggvaq song hot fwen gag bien gag caux gangjok le gij cingz gikdoengh doiq camgya baez beizyinbanh neix.

“Ceiok cij miz soundaej, hai bak cij rox eu fwen; gou youq gizneix hag Sawcuengh, hag ndaej lai youh ndei.” Luz Yinlij boux nienzgeij ceiq oiq camgya baez beizyin neix hix aj bak couh baenz fwen, yungh sing fwen eu ok gij simndaej hagsib bonjfaenh.

29 hauh banringzgvaq, gyoengq yozyenz caeuq gyoengq lauxhangz daengz Vujmingz Gih Lohgyanghbinh yienhciengz yawjngonz le “ndwen hawfwen Vujmingz” hozdung.

Gyoengq lingjdauj caeuq laux- hangz haengjdingh le gij fuengsik cauxmoq caeuq gij cingzgoj aeundaej geiz beizyinbanh neix, caiqlij maq- muengh doenggvaq baez beizyin neix, mboujduenh cungjgez gingniemh, coglaeng dawz gij gingniemh ndei doigvangq daengz gaengx gih gak dieg.

Namzningz Si Minzyijveij cujyin Moz Swhhungz naeuz, maqmuengh gyoengq yozyenz aeu baez hagsib neix guh diemj hwnjdin moq、 doenghlig moq, youq diegvih guhhong bonjfaenh vih doihengz Sawcuengh ok rengz, vih swnjcienz baujhoh hwngfat vwnzva conzdungj minzcuz maenhndei caeuq cauxguh lai cungj vahgangj saedceij huzndei guh ok gungyen hungloet!

Ciuq cam rox, Namzningz Si Minzyijveij yaek laebdaeb miz bouhloh doicaenh gij hong gvendaengz haenx, caemhcaiq youq bineix 9 nyied、 10 nyied lienzdaemh banh 2 geiz beizyinbanh. Daengzseiz yaek youq Namzningz Sinhvwnz Vangj vangjcan nem veihsin、 Namzningz Yizbau、 Namzningz Vanjbau daengj sinhvwnz meizdij daeng mizgven beizyinbanh ciuseng saenqsik; beizyin yaek doiq ndawbiengz ciusou yozyenz, lij yungh gij fuengsik beizyin mbouj aeu cienz, laebdaeb mizyauq doicaenh gij hong doigvangq vah saw minzcuz daengx gih hwngfat.