Ndaw mbanj raeuz miz doiq gvanbaz ngawz ndeu, ciengzseiz gag haenh swhgeij coengmingz, guh saeh ciengzseiz gag lingh mbouj doengz vunz, hawj vunz liuh mbouj daengz, mizseiz youq dangqnaj vunzlai saetnaj.

Miz baez ndeu, ndaw mbanj miz vunz guh hoengzsaeh, gvanbaz neix caemh miz faenh gwn. Goenggvan siengj: Aen dungx boux vunz caeuq aen daeh doxdoengz, yied hoengq cang ndaej doxgaiq yied lai, danghnaeuz yaek youq ngoenz laeuj gwn ndaej lai, itdingh yaek hawj aen dungx hoengq liux bae cijndaej. De gag laihnaeuz aen banhfap neix ndei, caemhcaiq lwnhnaeuz mehyah de nyi. Mehyah de baez dingq, riu naeuz:“Goenggvan gou caen coengmingz!”

Gangjsat, gyoengqde sikhaek guh lo, daj ngoenzgonq hoengzsaeh couh mbouj gwn haeux lo. Seizhaenx caen hoj ngauz lo, gvaq ngoenz ndeu couh lumj gvaq bi he nei, hoeng vihliux ngoenzcog gwn ndaej lai, caiq haemz caiq hoj cungj aeu dingj gvaqbae. Gyoengqde iek dwk din fwngz unq liux, deq dwk yaek dai cij daengz ngoenz daihngeih bae gwnhaeux. Hoeng aen dungx iek gvaq mauh, gyoengqde haeuj daiz ngamq gwn ndaej gaiq noh ndeu, couh gwn mbouj roengz lo.

Yawj gij byaek gwnz daiz lailai daihdaih, byaek ndei noh feih, swhgeij cix gwn mbouj roengz, aen dungx lumj miz di in dem. Goenggvan yawj gyoengqvunz gwn dwk feihdauh raixcaix, caemhcaiq itmienh gwn itmienh haenh mbouj dingz, youh dahoengz youh sim’in, doeklaeng nyaenx mbouj ndaej ndaq hwnjdaeuj:“Bang vunz sou caen dam gwn, gou vihliux donq haeux haemh neix, cuk- cuk iek le song ngoenz hwnz ndeu cij ngamq gwn ndaej gaiq noh ndeu, sou yienghneix gwn, lauxsaed gangj, haengjdingh iek ndaej geij ngoenz lu ba?”

Gyoengqvunz mbat nyengh, yaep he cij singj gvaqdaeuj, nyaenx mbouj ndaej riuhaha hwnjdaeuj. De raen le lij mwnhsaengsaeng dwk naeuz:“Riu maz riu, gou dwg gangj vahsaed.” Siengj mbouj daengz, gyoengqvunz riu ndaej sing engq hung lo.

Caiq miz baez ndeu, goenggvan youq ndaw ranzcauq gwnz laeuz cinjbi ronq noh loengh byaek caeuz, hoeng fag cax mwt raixcaix, ronq geij baez gaiq noh cungj mbouj gat. De byaij ok dou daeuj coh laj laeuz hemq:“Mehyah, fag cax mwt lo, mwngz vaiqdi dawz ndaek rinbaenz hwnjdaeuj hawj gou baenz cax.” Mehyah cingq youq laj laeuz sousib hongdawz, dingqnyi goenggvan hemq, couh han naeuz:“W, mwngz caj yaep he.”

Mehyah byaij daengz henz rinbaenz, de siengj: Ndaek rinbaenz hung lumj aen bat nei, baenzlawz dawz hwnj gwnz laeuz bae ne? O, miz banhfap lo. De riuj aen gyoi daeuj, yungh haujlai rengz cijndaej dawz ndaek rin buen haeuj ndaw gyoi bae. De coh gwnz laeuz hemq:“Goenggvan, mwngz dawz diuz cagvaiz henz cauq gveng roengzdaeuj hawj gou, gou cug aen gyoi cang rinbaenz ndei le, mwngz caiq beng hwnjbae, couh ndaej baenz cax lo.”

Cag cug ndei lo, goenggvan yungh caenh rengz daeuj beng, ngamq beng daengz cungqgyang couh naiq lo. Mehyah hemq naeuz:“Deq gou, gou hwnjbae bang mwngz.” De doq gangj doq buet hwnj laeuz bae. Song boux caez yungh rengz, dauqdaej ndaej beng hwnjdaeuj lo. Song boux youh caez yungh rengz buen ndaek rin okdaeuj. Goenggvan itmienh baenz cax itmienh naeuz:“Va, mehyah gou caen coengmingz, siengj ndaej aen banhfap neix okdaeuj. Gou saenq, lajmbwn haengjdingh mbouj miz vunz siengj ok cungj banhfap neix daeuj lo.” Mehyah dingq le, riu dwk ndaeng gonraurau bae.