Youxdoih gawj bouh denyingj yungh le 3 bi seizgan bae ingj ndeu hawj gou, coh denyingj neix heuhguh 《Raeuz Song Vunz》. Denyingj cujyau dwg gangj aen goj daxbuz 90 lai bi gag youq aen swhozyen Baekging ndeu caeuq dahsau youq Baekging doegsaw ngamq miz 20 lai bi ndeu. Dahsau siengj youq henz yozyau co ranz, de youq ngoenz seizdoeng ndeu ra daengz aen swhozyen daxbuz youq, aen goj song vunz hix couh baenzneix haidaeuz le, lumj seiqgeiq doxlwnz nei, song vunz yienznaeuz mboujseiz doxceng doxnauh, gamjcingz cix bienq ndaej yied daeuj yied ndei, miz maz saeh mwngz ndaej baengh gou, gou hix ndaej baengh mwngz. Daengz seizcou bi moq, dahsau ra ndaej aen diegyouq engq ndei ndeu, daj ndaw swhozyenz buen okbae lo. Dahsau buen deuz liux, daxbuz sikhaek baenzbingh, mbonq hix hwnq mbouj ndaej. Satlaeng denyingj, louz hawj bouxyawj gij gingdouz aen swhozyen baet ndaej seuqsak、yaemzrwg ndeu caeuq aen dou gaeuq deng dahsau najsaek gagdog gven.

Yawj denyingj seiz, yawj daengz ndaw bingzmu song boux vunz ndwenngoenz gvaq ndaej gig nauh- yied, mboujseiz hawj gou gamjdoengh dangqmaz. Dahsau vihliux guh ndei gij hong yozyau, heuh daxbuz hawj de luzsieng, dahsau cam:“Bingzseiz mwngz guh maz saeh lwi?” Daxbuz dap:“Mbouj guh maz.” Dahsau caiq cam:“Mbouj ndaej, mwngz caiq siengjsiengj.” Daxbuz dap:“Mbwq seiz, gou ceiq siengj miz saek boux vunz sou huq gaeuq roxnaeuz boux byaij loek ranz daeuj roq dou ranz gou, yienghneix gou couh ndaej caeuq de gangjgangj vah.” Geij coenz vah neix hawj gou gvaengzda sikhaek dumz hwnjdaeuj. Doeklaeng dahsau daj ndaw swhozyen buen deuz, daxbuz bingh dai, engq dwg hawj gou daejngungu, cij aenvih gou siengj daengz buz gou.

Buz gou ndaej 90 bi bihaenx loeg nyied ngoenz ndeu, ciengxlwenx dwk lizhai dou lo. De lij lix seiz, fuengzcug gou youq ndaw mbanj dwg dandog aen fuengzcug 5 daih cungj youq ndeu, buz baez dai, sojmiz cungj bienq lo. Gij bi mbouj miz giva seng lwgnyez haenx, buz gou gungh seng 10 boux lwgnyez, ciengx hung 8 boux. Youq ndaw fuengzcug dou, buz gig miz viyiemz, maz saeh cungj cam de le caiq guh gietlwnh. Daeglwg、lwgbawx、dahlwg、lwggwiz hix cungj hauqswnh, mbouj miz bouxlawz gamj yungh sing sang daeuj caeuq de gangj vah. Daengz ngoenzciet ndwencieng, gyoengq ciuhlwg engq dwg cungj daeuj ranz yawj buz, soengq cienz soengq doxgaiq. Daj vunz baihrog daeuj yawj, buz dwg boux vunz miz fukheiq ndeu. Dwg, daj gij doxgaiq yungh gwn daeuj yawj, buz itcig fouqmiz, hoeng, ndawsim de siengj maz, cix mbouj miz bouxlawz roxyiuj. Buz 20 bi seiz haq hawj goeng gou, song vunz caez gvaq le 50 lai bi, baenzgya laebnieb, seng lwgngyez ciengxson lwgnyez. 17 bi gonq, goeng gou sawqmwh baenz binghgaenj gvaq- seiq le, doeklaeng buz gou couh gag boux vunz ndeu gvaq.

Boh gou dwg daeglwg ceiq iq, ndaw lajmbanj miz fungsug, vunzgeq itbuen caeuq daeglwg ceiq iq youq. Hoeng, bohmeh gou dwg vunzguhnaz, baenzngoenz youq ndaw reih ndaw naz guhhong, gwn haeux yietnaiq cungj mbouj dinghseiz, vihliux hawj buz habseiz gwn haeux, goeng dai le boh gou couh genjdanh gaijcauh song fungh rug baihgvaz ranz gou, aen rug baihndaw hawj buz guh ranzcawj, aen rug baihrog hawj buz guh ranzding, lij youq rog dou nda aen loengz gaeq ndeu hawj buz ciengx geij duzgaeq daeuj gaijmbwq. Geij bi gonq, boh gou lid song fungh rug haenx dauqlaeb baenz fungh rug hung ndeu, ndaw rug vanzlij hawj buz cawj haeux daihhek, cijdwg ranzcawj caeuq ranzding mbouj miz faq ciengz daeuj lanz lo. Buz couhdwg youq gizneix, gvaq geij bi mbouj miz goeng gou.

Lumj haujlai vunz nienzgeij ca mbouj lai haenx ityiengh, buz mbouj nyinh saw, cij rox gangj Vahcuengh bonjdeih、Vahgveiliuj genjdanh, mbouj rox gangj hix dingq mbouj doeng Vahgun bujdungh. Dou sam beix- nuengx lij iq seiz, daengx ranz caez yawj densi, cungj miz boux vunz ndeu naengh youq henz ndang buz, gej hawj de dingq ndaw densi seizneix gangj maz. Doeklaeng, dou sam beixnuengx lizhai ranz ok rog bae doegsaw, bohmeh gou youh nyaengq guhhong nyaengq bae ra cienz daeuj hawj dou doegsaw, mbouj miz seizgan buenx buz gangjgoj caeuq yawj densi. Buz dingq mbouj doeng gij vunz ndaw densi gangj maz, naengh youq henz densi mbouj daengz 10 faencung couh mbouj dingz baiqdalaep, caiq doek- laeng, mboujlwnh bouxlawz baenzlawz gienq, de cungj mbouj nyienh gag boux vunz ndeu hwnj laeuz bae yawj densi lo.(caengz sat)