弄朋特色景观令游客流连忘返

□ Siuhgwz Hungzlieng ingj

Doengh bi neix daeuj, Dasinh Yen Ganhhih Yangh Mingzsw Cunh Mbanjrunghbungz haenqrengz caux- guh “aenmbanj fungsug daegbied daegsaek yienhda” miz fungcingz henzguek ndeu, youq dangjveij cwngfuj baihgwnz sonyinx caeuq haeujcoengh lajde, gaenxmaenx gaijndei yiengh mbanj、banh “nungzgyahloz”, dawz henhoh nem hwngfat aen mbanj saujsu minzcuz caeuq lajmbanj lijyouz、“Guengjsae gyaeundei·swnghdai lajmbanj” giet- hab hwnjdaeuj, gyahung gij mingz- daeuz caeuq doxnangq binjbaiz aenmbanj daegsaek saujsu minzcuz, ndaej haemq ndei doidoengh henhoh caeuq swnjcienz vwnzva saujsu minzcuz. Bi 2014 Mbanjrunghbungz ndaej bingz guh “Cungguek aen- mbanj daegsaek saujsu minzcuz”, bi 2015 ndaej aen mingzdaeuz ndei “Guengjsae aenmbanj okmingz gingj- yawj daegsaek lijyouz”.

Mbanjrunghbungz dieg youq gyangsim Gingjgih Lijyouz Doenghnaz Mingzsw, gungh miz 61 ranz 270 lai vunz. Gaijgwz hailangh gvaqdaeuj, Mbanjrunghbungz couh itcig dwg Ganhhih Yangh aen mbanj guhdaeuz baenzfouq ndeu, gyawj geij bi neix cix leihyungh gij swyenz youhsi youq ndaw gingjgih okmingz de, comz ngaenz guh yiengh mbanj gaij moq gunghcwngz, haenqrengz hwngfat “nungzgyahloz” daegsaek lijyouz, doenggvaq beuj sauq nyapnyaj、bu roen suijniz、gaij raemx gaij diengzhaex, hawj yiengh mbanj bienq moqsag, baenz aen baenz aen ranzlaeuz cang ndaej gyaeuget ndeiyawj haenx youq ndaw faexheu cazva loq raen loq mbouj raen, gij diemq hekninz diemq gwnngaiz gig miz daegsaek Mingzsw haenx gizgiz raen miz. Vunz ndaw mbanj dingzlai bae guh hong fugsaeh lijyouz, mbangj hai diemq hekninz, mbangj banh “nungzgyahloz”, mbangj guh dauj- youz daihhek doenghgij hong neix, souhaeuj bi beij bi lai.

Geij bi neix daeuj, ndaw yienh lij sonyinx vunzlai Mbanjrunghbungz ciengx bitcaw ndaem haeuxhom Mingzsw doenghgij canjyez daegsaek neix, daengx mbanj gungh ndaem haeuxhom youhciz 270 moux, moix bi ciengx bitcaw 8500 lai duz. Doengzseiz lij yungh seizdoeng naz hoengq ndaem byaekgve、va- byaekyouz、luzfeiz doenghgo neix 200 lai moux, hawj ndaw naz heuswd gyaeundei.

Mbanjrunghbungz baengh dieg youq gyang gingjgih caeuq gij lijyouz swhyenz ndei de gaenxmaenx hwngfat “nungzgyahloz”, seizneix ndaw mbanj miz 17 ranz caeuq 20 ranz mbanj henzgyawj Mbanjrunghdaeuj、Mbanj- nazyiz doxgyoeb banh baenz le diuz gai “nungzgyahloz” ndeu, hawj gyoengq hekyouz haeuj mbanj le ndaej cimz gwnz byaekngaiz nungz- gya, comz naengh iengjring, lij ndaej bae ranz nungzgya youq, daejniemh saedceij nungzgya, doengxhaemh lij miz eu fwen、diuqfoux biujyienj dem, ndaw mbanj ngoenz beij ngoenz nauhyied.

Youq hwnjguh aenmbanj daeg- saek saujsu minzcuz ndawde, Mbanjrunghbungz lij yawjnaek cimh- ra、henhoh caeuq hwngfat vwnzva minzcuz, ranghdieg aen mbanj neix ciet hawfwen ndawbiengz ceiq hoenghhwd haenx, caemh heuhguh “cietroengzdoengh”, dwg moix bi liggaeuq ndwencieng ngeihloeg, moix daengz ngoenz de, gyoengq vunz- mbanj gyawjgyae rangh neix cungj daenj ndangdaenj minzcuz moqsag lwenqda comz daengz ndaw Mbanj- runghbungz, eu fwen doiq fwen, raen youx ra youx, guh’angq guhcaemz, nauhyied hoenghhwd; moix bi ciet- fwen sam nyied sam, gyoengq hekyouz caemh doxiu doxcaeh bae daengz Mbanjrunghbungz, caeuq vunzmbanj daem ceiz guh ceiz, naengj haeuxnaengj haj saek, diuq fouxfaexsaux, eu fwen ciengq go, youq ndaw angqyangz gamjsouh gij fungcingz vwnzva minzcuz daegbied de, caemh roxnyinh mizyinx raixcaix.