Gaxgonq, miz boux bouxcoz ndeu heuhguh Vangz Yizbwnj，20 lai bi. De okseng youq aen ranz caizcawj hung ndeu, dwg lwgdog, bohmeh yawj de baenz aen bauj ndaw fwngz. Lij iq seiz, banhaet hwnqdaeuj, daxmeh bang de daenj buh, vunzhoiq daek raemx daeuj bang de swiq naj, bwnq de gwn ngaiz, maz saeh cungj miz vunz bang de guh, de cungj mbouj yungh ning fwngz. De siengj aeu maz doxgaiq, itdingh aeu bohmeh hawj de, maz cungj aeu dingq de gangj.

6 bi seiz, bohmeh yaek soengq de bae hwnjdangz, de mbouj nyienh bae, bohmeh hix youzcaih de. Ranznden de cungj dwg ranz gungzhoj, miz haujlai lwgnyez, hoeng daxboh de yawj mbouj hwnj vunzgungz, mbouj hawj de bae caeuq gyoengq lwgnyez ranz gungz haenx guhcaemz, engq mbouj hawj de haeuj ranz vunzgungz bae. Aenvih de daj iq couh miz vunz ciuqgoq de gwndaenj, youh mbouj doegsaw, mbouj caeuq vunz doengzban baedauq, ndigah Vangz Yizbwnj mbouj rox geijlai ciengzsik. De 15、16 bi seiz, raen vunz gwih max, hix siengj gwih, bohmeh de couh cawx duz max ndeu hawj de. Vangz Yizbwnj 20 bi seiz, bohmeh de bang de aeu yah. Gvaq song bi, bohmeh de gonqlaeng dai lo, de bienqbaenz bohranz lo.

Vangz Yizbwnj 25 bi bihaenx, ndaw yienh banh doxdax gwih max, de bae bauqmingz camgya. Doeklaeng, de baizmingz ceiq laeng. Vunzlai raen de, cungj riu de. De najhoengz rwznding, ganjgip gwih max dauqma. Dauq daengz ranz, de nyinhnaeuz baezneix camgya doxdax saetbaih, dwg aenvih duz max de buet mbouj vaiq. Yienghneix, de gietdingh cawx duz maxcienleix ndeu, mboujguenj geijlai ngaenz.

Ngoenz daihngeih, Vangz Yizbwnj heuh ciengzgoeng daeuj, doiq de naeuz:“Mwngz daengz gak dieg bae byaijbyaij, bang gou cawx duz maxcienleix ndeu.” Gangj sat, mbon ok 100 liengx ngaenz hawj ciengzgoeng.

Boux ciengzgoeng neix ranz gungzhoj, de roxnyinh, seizneix miz haujlai vunzgungz gwn mbouj imq, daenj mbouj raeuj, mizmbangj lij dai iek. Vangz Yizbwnj yienghneix sai ngaenz, caen mbouj wnggai. Yienghneix, de couh swngzgei okrog bae cawx max, dawz dingzlai ngaenz cawx max faen hawj gyoengq vunzgungz. Lw di ngaenz, de couh cawx aen gvehoengz ndeu dauqma, aeu mbaw baengz ndeu duk ndei, soengq bae hawj Vangz Yizbwnj.

Ciengzgoeng daengz ranz Vangz Yizbwnj, yaeuh de naeuz:“Lauxyez, gou cawx mbouj ndaej maxcienleix, hoeng cawx ndaej aen ‘gyaeqmax’ maxcienleix ndeu. Mwngz yawj, neix couhdwg. Cungj gyaeq neix, hawj boux mehmbwk ndeu daeuj faeg, caetcaet seiqcib gouj ngoenz, couh faeg ok duz maxcienleix ndeu lo. Yah lauxyez bizbwd hungloet, hawj de faeg ceiq habngamj. Hoeng aeu geiqndaej: Gaej biengj deuz mbaw baengz duk ‘gyaeqmax’ neix, mboujnex aen ‘gyaeqmax’ neix couh deng naeuh bae, faeg mbouj ok maxcienleix lo.”

Vangz Yizbwnj hainduj mbouj raen ciengzgoeng yien dauq maxcienleix, gig hozgaek. Seizneix dingq ciengzgoeng naeuz cawx ndaej aen ‘gyaeq maxcienleix’ ndeu dauq, youh angq- fwngfwng lo. Aenvih de mbouj miz maz ciengzsik, gaenbonj mbouj rox duzmax dwg baenzlawz okseng, ndigah, dingq daengz ciengzgoeng baenzneix naeuz, de umj aen “gyaeqmax” neix bae hawj yah de faeg lo.

Hainduj, yah de mbouj nyienh faeg, naeuz:“Faeg ‘gyaeqmax’ aeu caetcaet seiqcib gouj ngoenz, seizgan nanz lai, gou mbouj faeg, gou mbouj ndaej bae youz, dingj mbouj ndaej.” Vangz Yizbwnj haep naeuz:“Mwngz mbouj faeg, gvaqlaeng gou couh mbouj hawj mwngz ok aen rug neix bae, mwngz saenq mbouj saenq?” Yah de baez dingq, lau de baenzneix guh dahraix, cij doengzeiq faeg aen “gyaeqmax” neix.

Faeg ndaej ndwen ndeu, “gyaeqmax” neix naeuh lo, haeusaengsaeng. Yah de hojsouh dangqmaz, mbouj nyienh caiq faeg roengzbae lo. Vangz Yizbwnj ndaq naeuz: “Mehmbwk caengz haq aeu dingq daxboh gangj, doxaeu liux aeu dingq gvan gangj. Mwngz mbouj dingq gou gangj, mbouj caiq faeg ‘gyaeqmax’, gou couh caenh mwngz ok ranz bae. Caiq gangj, mwngz gaenq faeg ndaej ndwen ndeu lo, caiq genhciz 19 ngoenz, couh faeg ndaej ok maxcienleix lo. Ndaej maxcienleix le, de majhung, gou gwih bae camgya doxdax gwih max, ndaej mingz daih’it, mwngz couhdwg yah daeuzmingz, mwngz baenzlawz mbouj nyienh guh ne?” Yah de mbouj miz banhfap, youh deng de bik, cijndei laebdaeb faeg “gyaeqmax”.

Youh gvaq 18 ngoenz, “gyaeqmax” naeuhnadnad、 hau- fwdfwd, yah de caen dingj mbouj ndaej lo, heuh Vangz Yizbwnj daeuj yawj. Vangz Yizbwnj baez haeuj dou rug couh naeuz:“Faeg gyaeq gaenq ndaej 48 ngoenz lo, caiq dingj ngoenz ndeu couh ndaej maxcienleix, caiq haeu hix aeu genhciz roengzbae.” Yah de mbouj caiq gangj, biengj deuz moegdenz, raq heiqhaeu ndeu ci gvaqdaeuj, cung haeuj ndaw ndaeng Vangz Yizbwnj bae. Vangz Yizbwnj nyaenx mbouj ndaej, rueg mbouj dingz. Byaij ok dou rug, heuh ciengzgoeng daeuj vut “gyaeqmax” okbae.

Ciengzgoeng daeuj daengz raen Vangz Yizbwnj rueg mbouj dingz, gig hojsouh, ndawsim caeg angq. De haeujbae umj “gyaeqmax” okdaeuj, yaek dawz ok rog bae vut. Vangz Yizbwnj daj gyae riengzlaeng de byaij, siengj yawj ndaw baengz dwg mbouj dwg aen gyaeq. Vihliux mbouj hawj de fatyienh, ciengzgoeng umj “gyaeqmax” daengz giz nywj haemq lai, ciengzseiz miz duzdouq daeuj gwn nywj gizhaenx vut. “Gyaeqmax” daj gwnz dingjndoi ringx daengz laj dinbya, duzdouq ndeu cingq youq gizhaenx gwn nywj, sawqmwh deng hwk dwk diuqyatyat, buet haeuj ndaw cazrum bae. Ciengzgoeng fwngz vix dwk duzdouq hawj Vangz Yizbwnj yawj, caiqlix naeuz:“Haenx couhdwg maxcienleix. Hojsik de ngoenzneix ngamq ndaej 48 ngoenz, ciengx mbouj lix lo, danghnaeuz daengz ngoenzcog, ndaej 49 ngoenz, de okseng, lauxyez mwngz couh ndaej duz maxcienleix ndeu lo.”

Vangz Yizbwnj coengzlaiz mboujcaengz raen gvaq duzdouq, mbouj rox duzdouq dwg baenzlawz yiengh. De haxbaenh raen duzdouq haenx buet deuz gig vaiq, caeuq duzmax doxdoengz miz seiq cik ga, couh saenq gij vah ciengzgoeng lo. Yienghneix, de got gyaeuj daejnganga, ienqhoij mbouj wnggai ngoenzneix couh heuh ciengzgoeng dawz “gyaeqmax” okdaeuj vut.

（Vangz Gyanghmyauz hoiz）